អន្តរជាតិ
×![]()
រដ្ឋាភិបាលឥណ្ឌូណេស៊ី នៅថ្ងៃទី០១ តុលា បានបញ្ជាក់ថាអ្នកទោសជាង១២០០នាក់ បានរត់គេចចេញពីពន្ធនាគារចំនួន៣កន្លែង ក្នុងកោះ Sulawesi ដែលរងគ្រោះដោយរញ្ជួយដី និងរលកស៊ូណាមិតាំងពីថ្ងៃសុក្រទី ២៨ ខែកញ្ញា។
ករណីហែកគុកទ្រង់ទ្រាយធំនេះបានកើតឡើង ក្រោយពីរញ្ជួយដីប្រមាណ៧,៧រ៉ិចទ័រ បានបង្កើតរលកយក្សស៊ូណាមិវាយប្រហារលើក្រុង Palu នៃកោះ Sulawesi កាលពីថ្ងៃទី២៨ កញ្ញាកន្លងទៅ។
យោងតាមទីភ្នាក់ងារព័ត៌មាន AFP មន្ត្រីនៃក្រសួងយុត្តិធម៌ លោកស្រី Sri Puguh Utami បាននិយាយថា អ្នកទោសទាំងនោះបានរត់គេចចេញពីពន្ធនាគារចំនួនពីរក្នុងក្រុង Palu និងមួយផ្សេងទៀតក្នុងក្រុង Donggala ដែលតំបន់នេះក៏រងការធ្វើប្រហារដោយគ្រោះធម្មជាតិនេះផងដែរ។
«ដំបូងឡើយវាគ្មានបញ្ហាអ្វីនោះទេ... ប៉ុន្តែមិនយូរប៉ុន្មានក្រោយគ្រោះរញ្ជួយដីវាយប្រហារ ទឹកបានហូរចូលទីធ្លាពន្ធនាគារ ដែលបង្កឲ្យអ្នកទោសទាំងនោះភិតភ័យ ហើយរត់ទៅកាន់ដងផ្លូវតែម្តង។ ខ្ញុំប្រាកដណាស់ថាអ្នកទោសទាំងនោះបានសម្រេចចិត្តហែកគុក ដោយសារពួកគេភ័យខ្លាចគ្រោះថ្នាក់ដែលបង្កឡើងដោយគ្រោះរញ្ជួយដីនេះ»។ នេះបើតាមការបញ្ជាក់របស់លោកស្រី Utami។
ទន្ទឹមនឹងនេះ មន្ត្រីក្រសួងយុត្តិធម៌ឥណ្ឌូណេស៊ីរូបនេះបានបង្ហើបថា ពន្ធនាគារមិនមានចំណីអាហារគ្រប់គ្រាន់សម្រាប់អ្នកទោសឡើយ ហើយខណៈនេះក្រុមអាជ្ញាធរកំពុងស្វះស្វែងរកចំណីអាហារពីហាងទំនិញនានានៅជុំវិញពន្ធនាគារដែលនៅបើកទ្វារ ដើម្បីផ្គត់ផ្គង់ដល់អ្នកទោស។
គួរបញ្ជាក់ដែរថា គិតត្រឹមថ្ងៃអាទិត្យទី ៣០ ខែកញ្ញា ចំនួនអ្នកស្លាប់បានកើនឡើងដល់ ៨៣២ នាក់ហើយ ក្រោយពីគ្រោះមហន្តរាយរញ្ជួយដីកម្រិត ៧,៧រ៉ិចទ័រ និងរលកយក្សស៊ូណាមិ វាយប្រហារទៅលើឥណ្ឌូណេស៊ី។ ក្រុមសង្គ្រោះកំពុងបន្តដុតដៃដុតជើងជួយរុករកនិងជួយសង្គ្រោះអ្នកដែលជាប់នៅក្នុងបំណែកអាគារបែកបាក់ ខណៈដែលរដ្ឋាភិបាលឥណ្ឌូណេស៊ីសម្រេចដង្ហោយរកជំនួយពីសហគមន៍អន្តរជាតិដើម្បីគាំទ្រប្រតិបត្តិការសង្គ្រោះ ដោយសារគ្រោះមហន្តរាយនេះធ្ងន់ធ្ងរពេក៕
Tag:
ឥណ្ឌូណេស៊ី
អ្នកទោសហែកគុក
គ្រោះរញ្ជួយដី
រលកស៊ូណាមិ
© រក្សាសិទ្ធិដោយ thmeythmey.com
