ជាតិ
សង្គមជាតិ
លោក គី តិច ជាប្រធានក្រុមមេធាវីរដ្ឋាភិបាលដែលមានឋានៈស្មើទេសរដ្ឋមន្ត្រី រូបពីឆ្វេងទៅស្តាំ និងពីលើចុះក្រោម លោក គី តិច លោក ឈិត បូរ៉ាវុធ លោក សួង ចាន់ថន លោក ឡុង ដារ៉ា លោក ដូង លឿង លោក វិច សុវាចា លោក អេន សុភាព និង លោក គូន សារឿន
× ភ្នំពេញ៖ សម្តេច សាយ ឈុំ ប្រធានព្រឹទ្ធសភា ដែលកំពុងទទួលរាជានុសិទ្ធិជាប្រមុខរដ្ឋស្តី បានចុះហត្ថលេខាជំនួសព្រះមហាក្សត្រ លើព្រះរាជក្រឹត្យមួយ នៅថ្ងៃទី១ ខែតុលា ឆ្នាំ២០១៨នេះ ស្តីពីការតែងតាំងសមាសភាពមេធាវីរដ្ឋាភិបាលអាណត្តិថ្មី។ យោងតាមព្រះរាជក្រឹត្យ លោក គី តិច គឺជាប្រធានក្រុមមេធាវីរដ្ឋាភិបាល ដែលមានឋានៈស្មើទេសរដ្ឋមន្ត្រី។
សមាសភាពមេធាវីរដ្ឋាភិបាល នៅមានសមាជិក៧រូបទៀត រួមមាន លោក ឈិត បូរ៉ាវុធ និងលោក សួង ចាន់ថន (ឋានៈស្មើរដ្ឋមន្ត្រី), លោក ឡុង ដារ៉ា (ឋានៈស្មើរដ្ឋលេខាធិការ), លោក ដូង លឿង លោក វិច សុវាចា លោក អេន សុភាព និង លោក គូន សារឿន (ឋានៈស្មើអនុរដ្ឋលេខាធិការ)។ នេះបើតាមព្រះរាជក្រឹត្យដដែល។
កាលពីរដ្ឋាភិបាលស្ថិតក្នុងអាណត្តិមុន លោក គី តិច ក៏ជាប្រធានមេធាវីរដ្ឋាភិបាលដែរ ដោយកាលនោះលោក មានឋានៈស្មើត្រឹមរដ្ឋមន្ត្រីមន្ត្រីទេ។ ការតែតាំងលោក គី តិច ជាប្រធានមេធាវីរដ្ឋាភិបាល ធ្វើឡើងក្នុងអំឡុងខែមីនា ឆ្នាំ២០១៨ ពោលគឺនៅក្រោយ៤-៥ខែប៉ុណ្ណោះ នៃការរំលាយគណបក្សសង្គ្រោះជាតិ។
លោក គី តិច គឺជាមេធាវី១រូប ក្នុងចំណោមមេធាវីទាំង៨រូប ដែលតំណាងឲ្យក្រសួងមហាផ្ទៃ ក្នុងការដាក់បណ្តឹងទៅកាន់តុលាការកំពូល កាលចុងឆ្នាំ២០១៧ ដើម្បីទាមទារឲ្យរំលាយគណបក្សសង្គ្រោះជាតិ។ ក្រុមមេធាវីទាំងនោះ បានទទួលជោគជ័យ ដោយតុលាការកំពូលសម្រេចរំលាយគណបក្សប្រឆាំងចោល ហើយមេដឹកនាំ១១៨រូបនៃគណបក្សនេះ ត្រូវហាមមិនឲ្យធ្វើនយោបាយរយៈពេល៥ឆ្នាំ។
លើសពីនេះ លោក គី តិច តែងតែទទួលការពឹងពាក់ពីសម្តេច ហ៊ុន សែន ប្រមុខរដ្ឋាភិបាល និងជាប្រធានគណបក្សប្រជាជនកម្ពុជា ក្នុងការប្តឹងលោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងនិរទេស។ ចំណែក លោក គឹម សុខ អ្នកវិភាគនយោបាយ ក៏ធ្លាប់ជាប់ពន្ធនាគារ ក្រោមបណ្តឹងរបស់សម្តេច ហ៊ុន សែន ដែលមានលោក គី តិច ជាមេធាវី ដែរ។
សូមរម្លឹកថា លោក គី តិច ដែលមានវ័យ៥២ឆ្នាំ និងចូលធ្វើជាមេធាវីតាំងពីឆ្នាំ១៩៩៨មក ក៏ធ្លាប់ជាប់ឆ្នោតធ្វើជាប្រធាននៃគណៈមេធាវីកម្ពុជាផងដែរ៕
Tag:
មេធាវី
គី តិច
សាយ ឈុំ
© រក្សាសិទ្ធិដោយ thmeythmey.com