វឌ្ឍនាកា, ដានី, វណ្ណសាក់, ប៉ូលីន និងគ្រីយ៉ា ស្ថិតក្នុងបញ្ជីក្រុមជម្រើសជាតិ

កីឡាជាតិ

ជាតិ

វឌ្ឍនាកា, ដានី, វណ្ណសាក់, ប៉ូលីន និងគ្រីយ៉ា ស្ថិតក្នុងបញ្ជីក្រុមជម្រើសជាតិ

02, Oct 2018 , 2:22 pm

រូបភាព

ដោយ:

សហព័ន្ធកីឡាបាល់ទាត់កម្ពុជា បង្ហាញបញ្ជីឈ្មោះក្រុមកីឡាករជម្រើសជាតិ សម្រាប់ត្រៀមជំនួបមិត្តភាពអន្តរជាតិជាមួយក្រុមទីម័រខាងកើតនាថ្ងៃទី១២ ខែតុលា។ ខ្សែប្រយុទ្ធ ចាន់ វឌ្ឍនាកា បានជាប់ជម្រើសជាតិឡើងវិញ ក្រោយអវត្តមានក្រោមការដឹកនាំរបស់លោក Keisuke Honda លើកដំបូង ខណៈអ្នកចាំទី ជា វណ្ណសាក់ ត្រូវបានជ្រើសរើសជំនួស ស៊ូ យ៉ាទី ដែលមានរបួស។

ខ្សែប្រយុទ្ធឆ្នើមកម្ពុជា ចាន់ វឌ្ឍនាកា ដែលអវត្តមានជាមួយក្រុមជម្រើសជាតិក្រោមការដឹកនាំលើកដំបូងរបស់លោក Keisuke Honda នាជំនួបមិត្តភាពអន្តរជាតិជាមួយម៉ាឡេស៊ីកាលពីថ្ងៃទី១០ ខែកញ្ញា ត្រូវបានគ្រូបង្វឹកលោក Felix កោះហៅឲ្យប្រមូលផ្តុំហ្វឹកហាត់ជាមួយក្រុមជម្រើសជាតិសាឡើងវិញ។ ការអវត្តមានលើកដំបូងរបស់ខ្សែប្រយុទ្ធបឹងកេតរូបនេះ អាចបណ្តាលមកពីរូបគេមិនសូវបានបង្ហាញខ្លួនដោយសាររបួស ពេលលោក Felix ចូលមកដឹកនាំក្រុមជម្រើសជាតិ។

អ្នកចាំទី ជា វណ្ណសាក់ ដែលជួយវិសាខាឲ្យឡើងពីក្របខណ្ឌលីគទី២មកលេងលីគកំពូល ក៏ទទួលបានឱកាសបង្ហាញខ្លួនជាមួយក្រុមជម្រើសជាតិក្រោមការដឹកនាំរបស់លោក Keisuke Honda នៅលើកនេះផងដែរ។ កៅអីជម្រើសជាតិរបស់ ជា វណ្ណសាក់ កើតឡើងក្រោយអ្នកចាំទី ស៊ូ យ៉ាទី របស់ណាហ្គាវើលរងរបួសដៃខាងឆ្វេង នាជំនួបសប្តាហ៍រវាងណាហ្គាវើលជាមួយវិសាខាក្នុងពានរង្វាន់ក្របខណ្ឌខេមបូឌានលីគ។

បើតាមបញ្ជីឈ្មោះកីឡាករជម្រើសជាតិទាំង២៤រូប ដែលសហព័ន្ធកីឡាបាល់ទាត់កម្ពុជាបង្ហាញនៅថ្ងៃទី២ ខែតុលា ឆ្នាំ២០១៨ មានការផ្លាស់ប្តូរសមាសភាព៤រូបនិងបន្ថែម១រូប បើធៀបនឹងបញ្ជីឈ្មោះរបស់លោក Honda កាលពីលើកមុន។ កីឡាករថ្មីទាំងនេះរួមមានខ្សែបម្រើ គួច ដានី (ណាហ្គាវើល), សារ៉េត គ្រីយ៉ា (ព្រះខ័នរាជស្វាយរៀង), អ៊ន ចាន់ប៉ូលីន (ភ្នំពេញក្រោន), ជា វណ្ណសាក់ (វិសាខា) និងខ្សែប្រយុទ្ធ ចាន់ វឌ្ឍនាកា (បឹងកេត) ។ កីឡាករទាំងនេះដាក់ជំនួសអ្នកចាំទី ស៊ូ យ៉ាទី, លី វ៉ាហេទ, ជ័យ ចិត្រា និង អ៊ុក សុវណ្ណ។

កីឡាករជម្រើសជាតិទាំង២៤រូប ដែលត្រូវបានកោះហៅឲ្យប្រមូលផ្តុំសម្រាប់ត្រៀមប្រកួតមិត្តភាពអន្តរជាតិជាមួយទីម័រខាងកើតនាថ្ងៃទី១២ ខែតុលា ឆ្នាំ២០១៨ រួមមានអ្នកចាំទី៖ កែវ សុខសិលា, អ៊ុំ វិចិត្រ និង ជា វណ្ណសាក់, ខ្សែការពារ៖ សេត រ៉ស៊ីប, ហុង ផេង, ស ពិសិដ្ឋ, នេន សុធារ័ត្ន, សឿយ វិសាល, ឆេង ម៉េង, សារ៉េត គ្រីយ៉ា, ខ្សែបម្រើ៖ ឈិន ឈឿន, គួច សុកុម្ភៈ, សុះ ស៊ូហាណា, អ៊ិន សូដាវីដ, ប្រាក់ ធីវា, ធារី ចន្ថាប៊ីន, ទិត្យ ឌីណា, គួច ដានី, អ៊ន ចាន់ប៉ូលីនជា និងខ្សែប្រយុទ្ធ៖ ចាន់ វឌ្ឍនាកា, រ៉ឹង ប៊ុនហៀង, កែវ សុខផេង, ប្រាក់ មុន្នីឧត្តម, ស៊ិន កក្កដា៕