អ្នកនាំពាក្យ៖ ការតតាំងរបស់បរទេស គ្មានអ្វីក្រៅពីការឈ្លានពានអធិបតេយ្យកម្ពុជានោះទេ

ជាតិ

នយោបាយជាតិ

អ្នកនាំពាក្យ៖ ការតតាំងរបស់បរទេស គ្មានអ្វីក្រៅពីការឈ្លានពានអធិបតេយ្យកម្ពុជានោះទេ

02, Oct 2018 , 8:39 pm

រូបភាព

លោក ផៃ ស៊ីផាន អ្នកនាំពាក្យរដ្ឋាភិបាល

ដោយ: ថ្មីៗ

ភ្នំពេញ៖ ជាថ្មីម្តងទៀត លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា បានប្រតិកម្មនឹងអន្តរជាតិមួយចំនួន ដែលមិនព្រមបញ្ឈប់ការរិះគន់មកលើរដ្ឋាភិបាលកម្ពុជា។ សម្រាប់លោក ផៃស៊ីផាន ការឈឺឆ្អាលរបស់អន្តរជាតិទាំងនោះ មិនដែលមានបំណងល្អចំពោះកម្ពុជាឡើយ។

តាមរយៈគណនីហ្វេសប៊ុក អ្នកនាំពាក្យរដ្ឋាភិបាលកម្ពុជា បានបង្ហោះសំណេរយ៉ាងដូច្នេះថា៖«ការតតាំងមតិទាំងនោះ គ្មានអ្វីក្រៅពីការបង្កើតព្រឹត្តិការណ៍ព័ត៌មាន និងការឈ្លានពានអធិបតេយ្យភាពរបស់កម្ពុជាតែប៉ុណ្ណោះ ដែលមិនអាចទទួលយកបាន»។

លោក បន្តថា កម្ពុជារក្សាសិទ្ធិគ្រប់បែបយ៉ាង ដើម្បីរក្សាភាពជាម្ចាស់របស់ខ្លួន។ លោក សង្កត់ធ្ងន់បែបនេះថា៖«គ្មានស្ថាប័ន ឬអង្គការ ដាច់ដោយឡែកណាមួយ មានសមត្ថកិច្ច និងសិទ្ធិ ក្នុងកិច្ចគ្រប់គ្រងជោគវាសនាកម្ពុជា ក្រៅពីស្ថាប័ននីតិបញ្ញត្តិ នីតិប្រតិបត្តិ និងតុលាការរបស់កម្ពុជាតែប៉ុណ្ណោះ»។

ប្រតិកម្មរបស់លោក ផៃ ស៊ីផាន ធ្វើឡើងបន្ទាប់ឃើញសហគមន៍អន្តរជាតិខ្លះ នៅតែបន្តទិតៀនរដ្ឋាភិបាលកម្ពុជា។ លើសពីនេះ លោក ក៏បានឆ្លើយតបនឹងប្រជាពលរដ្ឋខ្មែរនៅក្រៅប្រទេសផងដែរ ដែលមិនពេញចិត្តរដ្ឋាភិបាលកម្ពុជាអាណត្តិទី៦។ ហើយមូលហេតុ ដែលជំរុញឲ្យលោក ឆ្លើយតបពេលនេះ ទំនងដោយសារតែលោកទើសទាល់នឹងប្រជាពលរដ្ឋខ្មែរទាំងនោះ ដែលបានគ្នាំធ្វើបាតុកម្មប្រឆាំងនឹងរដ្ឋាភិបាលកម្ពុជា នៅទីក្រុងញូវយ៉ក សហរដ្ឋអាមេរិក។

សម្តេចនាយករដ្ឋមន្ត្រី ហ៊ុន សែន បានដឹកនាំគណៈប្រតិភូកម្ពុជា ទៅចូលរួមប្រជុំលើកទី៧៣នៃមហាសន្និបាតអង្គការសហប្រជាជាតិ កាលពីថ្ងៃទី២៧ ដល់ថ្ងៃទី៣០ ខែកញ្ញា ឆ្នាំ២០១៨កន្លងទៅ។ ទោះជាមានអ្នកទៅប្រឆាំងនៅមុខទីស្នាក់ការអង្គការសហប្រជាជាតិក្តី តែគណៈប្រតិភូកម្ពុជា ក៏មានអ្នកស្រឡាញ់ ទៅគាំទ្រដែរ។

លោក សុខ ឥសាន អ្នកនាំពាក្យគណបក្សប្រជាជនកម្ពុជា បានចំអកឲ្យអ្នក ដែលធ្វើបាតុកម្មទាំងនោះថា មិនអាចរំខានដល់បេសកកម្មរបស់គណៈប្រតិភូកម្ពុជា នៅសហរដ្ឋអាមេរិក។ លោក បានសរសេរសារទៅកាន់អ្នកកាសែតតាមបណ្តាញតេឡេក្រាម បែបនេះថា៖«មានបងប្អូនខ្មែររាប់ពាន់នាក់ ដែលស្រឡាញ់យុត្តិធម៌ និងគាំទ្រគណបក្សប្រជាជនកម្ពុជា បានទៅស្វាគមន៏គណៈប្រតិភូកម្ពុជាយ៉ាងមហោឡារឹក ដែលធ្វើឲ្យពួកប្រឆាំងបាក់មុខមិនស្ទើរទេ»។

បើនិយាយទៅ ចាប់តាំងពីការរំលាយគណបក្សសង្គ្រោះជាតិ និងការបិទសិទ្ធិនយោបាយរបស់ថ្នាក់ដឹកនាំ១១៨នាក់នៃគណបក្សនេះមក រដ្ឋាភិលបាលកម្ពុជា បានរងការរិះគន់ សម្ពាធ និងទណ្ឌកម្មពីបណ្តាសហគមន៍អន្តរជាតិនានា។ យ៉ាងណាក៏ដោយ រដ្ឋាភិបាលកម្ពុជា តែងការពារខ្លួនថា អ្វីៗដែលរដ្ឋាភិបាលនិងតុលាការ បានធ្វើជាដែនសមត្ថកិច្ចរបស់កម្ពុជា និងត្រឹមត្រូវទៅតាមច្បាប់។

ជាពិសេស នាពេលថ្មីៗនេះ ប្រមុខរដ្ឋាភិបាលកម្ពុជា បានទៅថ្លែងនៅមហាសន្និបាតអង្គការសហប្រជាជាតិ ដោយបញ្ជាក់ពីភាពត្រឹមត្រូវរបស់រដ្ឋាភិបាលកម្ពុជា និងសមិទ្ធផលនានា ដែលសម្រេចបាន៕