អន្តរជាតិ
×![]()
ដោយ: ថ្មីៗ
ថ្ងៃអង្គារទី ២ ខែតុលា អាជ្ញាធរគ្រប់គ្រងគ្រោះមហន្តរាយឥណ្ឌូណេស៊ីបានបញ្ជាក់ថា អ្នកស្លាប់ដោយសាររញ្ជួយដីកម្រិត ៧,៧ រ៉ិចទ័រ និងរលកយក្សស៊ូណាមិនៅក្រុង Palu កើនដល់លើស ១២០០នាក់ហើយ។
តុល្យការនៃចំនួនអ្នកស្លាប់ដោយសារគ្រោះមហន្តរាយធម្មជាតិរញ្ជួយដី និងស៊ូណាមិគិតចាប់ពីថ្ងៃសុក្រទី ២៨ ខែកញ្ញា ដល់ថ្ងៃអង្គារទី ២ តុលា នៅកោះ Sulawesi បានកើនដល់លើស ១២០០នាក់ហើយ។ នេះបើតាមការចុះផ្សាយរបស់សារព័ត៌មាន BBC ដែលស្រង់សម្តីទីភ្នាក់ងារគ្រប់គ្រងគ្រោះមហន្តរាយ។
អាជា្ញធរបានបន្ថែមផងដែរថា ក្រៅពីអ្នកស្លាប់កើនឡើងដល់រាប់ពាន់នាក់នេះ ប្រជាជនកាន់តែច្រើនដែលរងគ្រោះ និងបាត់បង់ជម្រកក៏កំពុងប្រឈមនឹងការខ្វះខាតស្បៀងអាហារ ទឹកស្អាត ប្រេងឥន្ធនៈ និងថ្នាំសង្កូវជាដើម។
ប្រជាជនកាន់តែច្រើនទន្ទឹងរង់ចាំជំនួយសង្គ្រោះនៅព្រលានយន្តហោះ ប៉ុន្តែកាលពីថ្ងៃអាទិត្យយន្តហោះយោធាដឹកជំនួយមនុស្សធម៌មិនអាចចុះចតនៅព្រលាននោះកើតព្រោះចំនួនមនុស្សច្រើនពេក។
រឿងដែលគួរឲ្យសង្វេគនោះគឺ ជនរងគ្រោះដែលបាត់បង់លំនៅដ្ឋាន និងប្រឈមកង្វះខាតស្បៀងអាហារនោះបានបង្ខំចិត្តនាំគ្នាចូលលួចចំណីអាហារ ទឹក និងប្រេងតាមហាង ខណៈដែលប៉ូលិសបានត្រឹមសំឡឹងមើល និងមិនដាច់ចិត្តចូលទៅហាមឃាត់ ឬអន្តរាគមន៍ឡើយចំណែក អាជ្ញាធរក៏កំពុងព្យាយាមកប់សាកសពជនរងគ្រោះដែលស្លាប់រាប់រយរាប់ពាន់នាក់ដែរ ដើម្បីទប់ស្កាត់ឲ្យបាននូវជំងឺរាតត្បាតដែលនឹងអាចកើតឡើង។ ក្រុមសង្គ្រោះក៏កំពុងបន្តប្រតិបត្តិការរបស់ខ្លួនផងដែរដើម្បីស្វែងរកអ្នកបាត់ខ្លួនដែលកំពុងជាប់ក្រោមបំណែកអាគារដែលបែកបាក់ក្រោយរញ្ជួដីនោះ។
ខាងកាកបាទក្រហមឥណ្ឌូណេស៊ី បានប្រាប់អ្នកសារព័ត៌មានផងដែរថា នៅថ្ងៃអង្គារនេះ ក្រុមសង្គ្រោះបានរកឃើញសាកសពក្មេងៗសិស្សសាលាចំនួន ៣៤នាក់ នៅក្រោមបំណែកសំណង់វិហារគ្រឹស្តដែលជាមជ្ឈមណ្ឌហ្វឹកហ្វឺន។ ពួកគេស្ថិតក្នុងចំណោមសិស្ស ៨៦នាក់ដែលស្ថិតក្នុងវិហារ និងបានបាត់ខ្លួនក្រោយរញ្ជួយដី។ គេក៏នៅមិនទាន់ដឹងដែរថា សិស្ស ៥២នាក់ផ្សេងទៀតដែលបាត់ខ្លួននោះកំពុងស្ថិតនៅទីណាដែរ។
ដោយឡែក បន្ទាប់ពីរញ្ជួយដីធ្ងន់ធ្ងរកើតឡើងនៅថ្ងៃសុក្រនៅកោះ Sulawesi នាព្រឹកថ្ងៃអង្គារនេះទៀត ករណីរញ្ជួយដីពីរបានវាយប្រហារកោះ Suma ដែលមានប្រជាជនរស់នៅប្រមាណ ៧៥ម៉ឺននាក់។ រលករញ្ជួយទីមួយ កម្រិតត្រឹម ៥,៩រ៉ិចទ័រ ហើយទីពីរមានកម្រិត ៦,០ រ៉ិចទ័រ។ កោះSumba នេះស្ថិនតៅចម្ងាយប្រហែល ១៦០០គីឡូម៉ែតប៉ុណ្ណោះពីកោះ Sulawesi ។
Tag:
ឥណ្ឌូណេស៊ី
Palu
រញ្ជួយដី
ស៊ូណាមិ
Sulawesi
© រក្សាសិទ្ធិដោយ thmeythmey.com
