ឈុន សុធារ័ត្ន, ខៀវ វិបុល និង Masahiro ចូលនិវត្តន៍ពីអាជីពកីឡាករបាល់ទាត់

កីឡាជាតិ

ជាតិ

ឈុន សុធារ័ត្ន, ខៀវ វិបុល និង Masahiro ចូលនិវត្តន៍ពីអាជីពកីឡាករបាល់ទាត់

02, Oct 2018 , 9:59 pm

រូបភាព

កីឡាករ ខៀវ វិបុល, ឈុន សុធារ័ត្ន និង Masahiro Fukasawa (ពីឆ្វេងទៅស្តាំ)

ដោយ:

កីឡាករបរទេសនិងកម្ពុជាចំនួន៣រូប ដែលលេងក្នុងក្របខណ្ឌខេមបូឌានលីគបានប្រកាសចូលនិវត្តន៍ពីអាជីពកីឡាករបាល់ទាត់ ក្រោយចប់រដូវកាលឆ្នាំ២០១៨។ ទោះបីបញ្ចប់អាជីពជាកីឡាករ តែកីឡាកររបស់បឹងកេតពីររូបរួមមានខ្សែបម្រើ ឈុន សុធារ័ត្ន និងខ្សែការពារ ខៀវ វិបុល នៅបន្តអាជីពក្នុងវិស័យកីឡាបាល់ទាត់ដដែល ដោយពួកគេធ្វើជាគ្រូជំនួយ និងគ្រូយុវជនថ្នាល។

ក្រោយចប់ការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីគរដូវកាលឆ្នាំ២០១៨ យ៉ាងហោចណាស់មានកីឡាករ៣រូប ដែលលេងក្នុងក្របខណ្ឌនេះ បានប្រកាសចូលនិវត្តន៍ពីអាជីពជាកីឡាករ។ កីឡាករទាំងនោះរួមមាន ប្រធានក្រុមអង្គរថាយហ្គឺរ Masahiro Fukasawa, ខ្សែបម្រើ ឈុន សុធារ័ត្ន និងខ្សែការពារ ខៀវ វិបុល របស់ក្លិបបឹងកេត។

ខ្សែបម្រើជប៉ុន Masahiro Fukasawa បានមកប្រកបអាជីពក្នុងពានរង្វាន់ក្របខណ្ឌខេមបូឌានលីគតាំងពីឆ្នាំ២០១៣។ មុនចុះកិច្ចសន្យាលេងឲ្យក្លិបអង្គរថាយហ្គឺរចន្លោះពីឆ្នាំ២០១៦-២០១៨ កីឡាករវ័យ៤១ឆ្នាំរូបនេះ ធ្លាប់រួមរស់ជាមួយណហ្គាវើលរយៈពេល៣ឆ្នាំពី ២០១៣-២០១៦។ ក្រោយចំណាយពេលពីរឆ្នាំរួមរស់ជាមួយអង្គរថាយហ្គឺរខ្សែបម្រើរូបនេះ បានបង្ហាញខ្លួនចំនួន៣១លើក។ មុនមកប្រកបអាជីពនៅកម្ពុជាកីឡាករដែលជោគជាំដោយបទពិសោធលេងបាល់ទាត់រូបនេះ ធ្លាប់លេងឲ្យក្លិបនៅជប៉ុន, កាណាដា, ថៃ, ឥណ្ឌូណេស៊ី និងសិង្ហបុរី។

សម្រាប់កីឡាករ ឈុន សុធារ័ត្ន និងខ្សែការពារ ខៀវ វិបុល របស់បឹងកេត ទោះបីពួកគេប្រកាសចូលនិវត្តន៍ពីអាជីពជាកីឡាករក៏ដោយ តែពួកគេទៅមិនឆ្ងាយពីវិស័យកីឡាបាល់ទាត់ឡើយ។ ខ្សែបម្រើ ឈុន សុធារ័ត្ន ដែលផ្ទេរពីក្លិបបៀលប្រាយយូណាយធីតមករួមរស់ជាមួយបឹងកេតតាំងពីឆ្នាំ២០១៣ នឹងធ្វើជាគ្រួជំនួយ ខណៈ ខៀវ វិបុល ដែលលេងឲ្យបឹងកេតតាំងពីនៅលីគទី២ធ្វើជាគ្រូបង្វឹកក្រុមយុវជនថ្នាលនៅក្លិបបឹងកេតដូចគ្នា។ នេះបើតាមការបញ្ជាក់របស់លោក ហៅ សុជាតិ គ្រូបង្វឹកក្រុមបឹងកេត។

ចំពោះលោក ហៅ សុជាតិ ការវិវត្តខ្លួនពីកីឡាករមកធ្វើជាគ្រូបង្វឹករបស់កីឡាករទាំងពីររូបខាងលើ វាជារឿងមួយដ៏ល្អសម្រាប់ពួកគេនិងវិស័យកីឡាបាល់ទាត់។ «វាជាចំណុចល្អមួយសម្រាប់គាត់ ដោយសារបច្ចុប្បន្នពួកគាត់មានអាយុច្រើន។ ជាក់ស្តែងដូចជា វិបុល គាត់មានជំងឺជង្គង់ ដ៏ពិបាកព្យាបាល បើគាត់វះកាត់ត្រូវចំណាយពេលច្រើនក្នុងការសម្រាកព្យាបាល ព្រោះគាត់មានអាយុច្រើន។ ដូច្នេះនេះជាឱកាសមួយដ៏ល្អសម្រាប់ពួកគាត់ក្នុងការអភិវឌ្ឍន៍ខ្លួន ដើម្បីចាប់អាជីពជាគ្រូបង្វឹកទៅថ្ងៃអនាគត»។ នេះជាការបញ្ជាក់បន្ថែមរបស់លោក ហៅ សុជាតិ៕