ជាតិ
សង្គមជាតិ
រដ្ឋមន្ត្រីមហាផ្ទៃ ផ្តល់ថវិកា៨ម៉ឺនដុល្លារដល់សមត្ថកិច្ច ដែលបង្ក្រាបក្រុមជួញដូរអាវុធ រូបពីទំព័រហ្វេសប៊ុកសម្តេច ស ខេង
× ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃ បានផ្តល់ថវិកា៨ម៉ឺនដុល្លារ សម្រាប់ជាការលើកទឹកចិត្តដល់កម្លាំងនគរបាល ដែលបានពេញប្រតិបត្តិការក្នុងការឃាត់មនុស្ស៩នាក់ ក្រោមការសង្ស័យថាជួយដូរអាវុធខុសច្បាប់ នាពេលថ្មីៗនេះ។ នេះបើតាមព័ត៌មាន ដែលបង្ហោះលើទំព័រហ្វេសប៊ុករបស់រដ្ឋមន្ត្រីក្រសួងមហាផ្ទៃ។
ក្នុងប្រតិបត្តិការនេះ សមត្ថកិច្ច បានរឹបអូសអាវុធ៣០ដើម រួមទាំងឧបករណ៍ និងសម្ភារផ្សំគ្រឿងផ្ទុះមួយចំនួនទៀត។ ប្រតិបត្តិការខាងលើ ធ្វើឡើងក្រោមកិច្ចសហការរវាងកម្លាំងនគរបាលនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃអគ្គស្នងការដ្ឋាននគរបាលជាតិ ជាមួយកម្លាំងនគរបាលរាជធានីភ្នំពេញ កម្លាំងនគរបាលខេត្តកំពត និងកម្លាំងនគរបាលខេត្តពោធិ៍សាត់ ដោយមានការបញ្ជាផ្ទាល់ពីលោក នេត សាវឿន អគ្គស្នងការនគរបាលជាតិ។
ក្រោយចាប់ខ្លួន មនុស្សទាំង៩នាក់ ដោយក្នុងនោះ មានម្នាក់ជាមេខ្លោង ក៏ត្រូវបានសមត្ថកិច្ច បញ្ជូនទៅសាលាដំបូងរាជធានីភ្នំពេញ។ មកដល់ពេលនេះ សំណុំរឿងរបស់ពួកគេ បានទៅដល់ដៃចៅក្រមស៊ើបសួរហើយ។
លោក លី សុផាណា អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានសរសេរសារទៅកាន់អ្នកកាសែតតាមបណ្តាញតេឡេក្រាមថា អ្នកទាំងនោះ ត្រូវបានចោទចំនួនពីរបទល្មើស គឺបទរៀបចំចាត់តាំងក្រុមជនប្រដាប់អាវុធ សន្និធិអាវុធ និងរឿងផ្ទុះដោយគ្មានការអនុញ្ញាត និងបទចូលរួមក្នុងក្រុមជនប្រដាប់អាវុធ៕
Tag:
ស ខេង
សន្តិសុខ
អាវុធខុសច្បាប់
© រក្សាសិទ្ធិដោយ thmeythmey.com