ជាតិ
សង្គមជាតិ
ជនជាតិឡាវម្នាក់ ត្រូវជាប់គុកមួយជីវិតនៅកម្ពុជា ដោយសារនាំចូលគ្រឿងញៀនជាង៥០គីឡូក្រាម
× ភ្នំពេញ៖ បុរសជាជនជាតិឡាវម្នាក់ ឈ្មោះ លួន សុផា (Luon Sopha) ត្រូវជាប់ពន្ធនាគារអស់មួយជីវិតនៅកម្ពុជា ពីបទជួញដូរគ្រឿងញៀន៥៤គីឡូក្រាមនៅកម្ពុជា។ ចៅក្រមនៃសាលាដំបូងរាជធានីភ្នំពេញ បានបើកសវនាការ និងប្រកាសសាលក្រមដាក់ទោសបុរសនោះ នៅថ្ងៃទី២ ខែតុលា ឆ្នាំ២០១៨។
ក្រៅពីដាក់ទោសមួយជីវិត ចៅក្រម នៅតម្រូវឲ្យបុរសជាជនជាតិឡាវនោះ បង់ប្រាក់១២,៥០០ដុល្លារ ចូលទៅរដ្ឋផងដែរ។ រូបគេ មានមានរយៈពេល១ខែ ដើម្បីប្តឹងជំទាស់ទៅសាលាឧទ្ធរណ៍។
បុរសឈ្មោះ លួន សុផា ដែលមានអាយុ៣១ឆ្នាំ និងគ្នីគ្នាពីរនាក់់ទៀត ត្រូវបានសមត្ថកិច្ចចាប់ខ្លួន កាលពីអំឡុងខែឧសភា ឆ្នាំ២០១៧។ ប៉ុន្តែ ក្រោយមក មានម្នាក់បានស្លាប់ ហើយម្នាក់ទៀត ត្រូវបានដោះលែងវិញ ដោយនៅសល់តែបុរសឈ្មោះ លួន សុផា ប៉ុណ្ណោះ ដែលត្រូវផ្តន្ទាទោស។
គួររម្លឹកថា កាលពីអំឡុងខែកញ្ញា ឆ្នាំ២០១៨ កន្លងទៅ តុលាការកម្ពុជា ក៏បានកាត់ទោសបុរសជាជនជាតិវៀតណាមឈ្មោះ ហ្វឿង មិញគក់ ឲ្យជាប់ពន្ធនាគារអស់មួយជីវិតផងដែរ ដោយសារតែបាននាំគ្រឿងញៀនរហូតដល់ទៅជាង១ពាន់គីឡូក្រាម ចូលមកកម្ពុជា៕
Tag:
ឡាវ
តុលាការ
គ្រឿងញៀន
© រក្សាសិទ្ធិដោយ thmeythmey.com