ជាតិ
លោក សម រង្ស៊ី ថា ពលរដ្ឋកំពុងរងគ្រោះដោយសារអាហារគីមី តែរដ្ឋាភិបាល ចាត់ទុកជាព័ត៌មានបំភ្លៃការពិត
×![]()
ដោយ: ថ្មីៗ
ភ្នំពេញ៖ អតីតមេដឹកនាំគណបក្សសង្គ្រោះជាតិ លោក សម រង្ស៊ី រិះគន់រដ្ឋាភិបាល លើបញ្ហាអសមត្ថភាពគ្រប់គ្រងសុវត្ថិភាពចំណីអាហារ ដែលកំពុងធ្វើឲ្យពលរដ្ឋរងគ្រោះ ដោយសារបញ្ហាគីមី។ រដ្ឋាភិបាល ចាត់ទុកការលើកឡើងរបស់លោក សម រង្ស៊ី ថា ជាការបំភ្លៃព័ត៌មាន ដើម្បីកេងចំណេញផ្នែកនយោបាយ។
«ចំណីអាហារនៅប្រទេសកម្ពុជា ដូចជាបន្លែ ផ្លែឈើ សាច់ ត្រី ច្រើនតែបង្កប់ដោយជាតិគីមី ប្រកបដោយគ្រោះថ្នាក់ ដូច្នេះយើងត្រូវសម្គាល់ជាតិគីមីទាំងអស់នោះ នៅក្នុងទំនិញ អីវ៉ាន់ហូបចុក ដែលលក់នៅតាមទីផ្សារ។ សំនួរគឺ នរណាត្រូវធានាសុវត្ថិភាពចំណីអាហារសម្រាប់ពលរដ្ឋ ហើយត្រូវធានាយ៉ាងដូចម្ដេច?»។ នេះជាការលើកឡើងរបស់លោក សម រង្ស៊ី ដែលចង់សំដៅទៅលើការដឹកនាំរបស់រដ្ឋាភិបាល ក្នុងការខ្វះសមត្ថភាព ទប់ស្កាត់ការនាំចូលបន្លែ និងចំណីអាហារមានសារធាតុគីមី ចូលមកកម្ពុជា។
អមជាមួយការរិះគន់នេះ លោក សម រង្សី ក៏បានបង្ហោះឃ្លីបវីដេអូ ដែលសម្ដេច ហ៊ុន សែន ធ្លាប់និយាយឲ្យពលរដ្ឋពហិកាចំពោះបន្លែ និងម្ហូបអាហារ មានសារធាតុគីមីហាមឃាត់ និងជំរុញឲ្យពួកគេមានការប្រុងប្រយ័ត្ន និងចេះជ្រើសរើស ឬមើលផលិតផលទំនិញម្ហូបអាហារ ឲ្យបានសមស្របផងដែរ។ ក្នុងន័យនេះលោក សម រង្ស៊ី បានបន្តរិះគន់ប្រមុខរដ្ឋាភិបាលថា ខ្វះការទទួលខុសត្រូវ និងការយល់ដឹងពីការដឹកនាំ ក្នុងការចាត់វិធានការលើបញ្ហាទប់ស្កាត់ចំណីអាហារគីមីនេះ។ សម្រាប់លោក សម រង្ស៊ី រដ្ឋាភិបាលត្រូវមានការរៀបចំក្រសួង ស្ថាប័ន វិទ្យាស្ថាន យន្តការ និងមន្ទីពិសោធន៍ ដើម្បីដោះស្រាយបញ្ហានេះ។
តាមរយៈវីដេអូឃ្លីប ដែលមានរយៈពេលជិត២០នាទីនោះ លោក សម រង្ស៊ី បានយករបៀបគ្រប់គ្រងរបស់ប្រទេសដទៃ មកធៀបនឹងការដឹកនាំរបស់ប្រមុខរដ្ឋាភិបាលកម្ពុជា ដូច្នេះថា៖«លោក ហ៊ុន សែន និយាយបែបនេះ អំពីសុវត្ថិភាពចំណីអាហារ អំពីហានិភ័យសម្រាប់ប្រជាជលរដ្ឋ ដែលជាអ្នកប្រើប្រាស់ បង្ហាឲ្យឃើញថា គាត់អត់យល់អ្វីទាល់តែសោះ គាត់មិនមានស្មារតីទទួលខុសត្រូវទេ គាត់គួរណាស់សិក្សាអំពីបទពិសោធន៍ នៃប្រទេសជឿនលឿន មិនមែនតែនៅសហរដ្ឋអាមេរិក និងទ្វីបអឺរ៉ុបទេ។ សូម្បីប្រទេសជិតខាងកម្ពុជា ដូចជាប្រទេសឥណ្ឌា ប្រទេសហ្វីលីពីន ប្រទេសវៀតណាម និងប្រទេសថៃ គេមានអ្នកដឹកនាំ មានចំណេះវិជ្ជាខ្ពង់ខ្ពស់ ដែលមានស្មារតីទទួលខុសត្រូវ ហើយគេចាត់វិធានការរៀបចំឲ្យមានស្ថាប័ន ឲ្យមានក្រសួង ឲ្យមានវិទ្យាស្ថាន ឲ្យមានយន្តការ ឲ្យមានមន្ទីពិសោធន៍ ដើម្បីការពារសុខភាពប្រជាពលរដ្ឋនៅប្រទេសរបស់គេ»។
ថ្លែងបែបនេះហើយ អតីតមេដឹកនាំបក្សប្រឆាំងរូបនេះ ក៏ឆ្លៀតអំពាវនាវឲ្យពលរដ្ឋជំរុញរដ្ឋាភិបាលដោះស្រាយបញ្ហាទាំងនេះទៀតផង។
ទាក់ទងនឹងការលើកឡើងរបស់លោក សម រង្ស៊ី ខាងលើនេះ ក្រសួងពាណិជ្ជកម្មកម្ពុជា ក៏បានចេញមុខប្រតិបត្តិតបថា រដ្ឋាភិបាល បានខិតខំទប់ស្កាត់បញ្ហាសុវត្ថិភាពចំណីអាហារ ដើម្បីការពារសុខភាពប្រជាពលរដ្ឋជាយូរមកហើយ។ ក្រសួង ក៏រិះគន់តបថា ការលើកឡើងរបស់អតីតបក្សប្រឆាំងរូបនេះ គ្រាន់តែបំភ្លៃព័ត៌មាន ទាំងមិនយល់ពីស្ថានការកម្ពុជា ក្នុងគោលបំណងកេងចំណេញផ្នែកនយោបាយប៉ុណ្ណោះ។
លិខិតរបស់អគ្គនាយកដ្ឋានកម្ពុជាត្រួតពិនិត្យទំនិញ នីហរ័ណ អាហរ័ណ និងបង្ក្រាបការក្លែងបន្លំ នៃក្រសួងពាណិជ្ជកម្ម បានបញ្ជាក់ដូច្នេះថា៖«ចំពោះបញ្ហាពាក់ព័ន្ធនិងសុវត្ថិភាពម្ហូបចំណីអាហារ រដ្ឋាភិបាល បានរៀបចំគ្រប់គ្រាន់ និងច្បាស់លាស់ប្រកបដោយលក្ខណៈបច្ចេកទេស និងវិទ្យាសាស្ត្រ ដើម្បីធានាសុវត្ថភាព សុខភាពព្រមទាំងផ្ដល់ឲ្យបានពេញលេញនូវអាហារមានគុណភាពជូនប្រជាពលរដ្ឋ»។
បន្ថែមពីនេះក្រសួងពាណិជ្ជកម្ម ក៏បានលើកយកយន្តការមួយចំនួន ដែលក្រសួងបានអនុវត្តកន្លងមក មកបកស្រាយថា រដ្ឋាភិបាល បានរៀបចំច្បាប់ និងបទបញ្ញតិពាក់ព័ន្ធ ស្ដង់ដារទំនិញ យន្តការសម្រាប់ការអនុវត្តនានា ដោយរាប់ទាំងការគ្រប់គ្រង ត្រួតពិនិត្យផលិតផលទំនិញម្ហូបអាហារ បន្លែ ត្រី សាច់ នាំចូលទំនិញលក់ក្នុងទីផ្សារ។ ស្ថាប័ន ក្រសួង អង្គភាពទទួលខុសត្រូវច្បាស់លាស់ លើបញ្ហាសុវត្ថិភាពម្ហូបអាហារ។ រដ្ឋាភិបាល បានរៀបចំមន្ទីពិសោធន៍ខ្នាតធំ និងខ្នាតតូច នៅតាមច្រកព្រំដែន ដែលក្នុងនោះមានឧបករណ៍សម្រាប់មន្ត្រីកាំកុងត្រូល ប្រើប្រាស់វិភាគនៅនឹងកន្លែង។ រដ្ឋាភិបាល បានសហការជាមួយអាជ្ញាធរសុវត្ថិភាពម្ហូបអាហារ នៃបណ្ដាប្រទេសនានា លើពិភពលោក ដើម្បីទទួលបានព័ត៌មាន និងវិធានការទាក់ទង ក្នុងការទប់ស្កាត់បញ្ហាចំណីអាហារគីមី រួមទាំងការផ្សព្វផ្សាយអប់រំ ពលរដ្ឋឲ្យបានដឹងពីបញ្ហានេះផងដែរ។
«ចំពោះការលើកបង្ហាញពីការធ្វើការរបស់មន្ត្រីពិសោធន៍នៅស្រុកគេ ក៏គ្រាន់តែចង់សម្ញែងអួតអាង បំភ្លៃការពិតថា មានតែស្រុកអាមេរិក ឬប្រទេសនេះ ប្រទេសនោះ ហើយមកបង្អាប់បង្អោនជាតិសាសន៍យើងប៉ុណ្ណោះ ហើយដែលជាក់ស្ដែងកម្ពុជា មានមន្ទីពិសោធន៍ម្ហូបអាហារ ដែលមានសមត្ថភាពវិភាគឃើញសារធាតុគីមី មេរោគចម្លង កត្តាគ្រោះថ្នាក់ជារូបវន្តផ្សេងៗ មិនចាញ់ប្រទេសជឿនលឿន ទាំងលើឧបករណ៍យកមកបំពាក់ប្រើប្រាស់នៅមន្ទីពិសោធន៍ និងមន្ត្រីជំនាញ សុទ្ធតែបានឆ្លងកាត់ការរៀនសូត្រ មានបទពិសោធន៍ពីក្នុង និងក្រៅប្រទេស»។ នេះជាការបញ្ជាក់របស់ក្រសួងពាណិជ្ជកម្ម ដែលឆ្លើយតបទៅនឹងការលើកឡើងរបស់លោក សម រង្ស៊ី។
កន្លងមកមន្ត្រីជំនាញក្រសួង ក៏ធ្លាប់ចាប់ជនខិលខូចមួយចំនួន ដែលផ្សព្វផ្សាយព័ត៌មានមិនពិត ពីរឿងអង្ករប្លាស្ទិក ប្រេងឆាគីមី និងស៊ុបគីមីជាដើម ក្រោយរកមិនឃើញពីករណីនេះ។
កម្ពុជានាំចូលបន្លែពីប្រទេសជិតខាងពី២០០តោន ទៅ៤០០តោនក្នុងមួយថ្ងៃ សម្រាប់យកមកផ្គត់ផ្គង់ទីផ្សារក្នុងស្រុក។ មូលហេតុដែលនាំចូលនេះ ដោយសារតែតម្លៃកសិផលរបស់ប្រទេសជិតខាងនេះ មានតម្លៃថោក។ សម្រាប់ការនាំចូលបន្លែពីក្រៅប្រទេសនេះ កម្ពុជាត្រូវចំណាយថវិកាជាង២០០លានដុល្លារក្នុងមួយឆ្នាំ។ នេះជាការបញ្ជាក់របស់រដ្ឋាភិបាល។
ក្នុងរយៈពេល៨ខែ ឆ្នាំ២០១៨នេះ មន្ត្រីកាំកុងត្រូល និងអាជ្ញាធរពាក់ព័ន្ធ បានដកហូតទំនិញខូចគុណភាពទូទាំងប្រទេសជាង ៥២តោន ។ទំនិញខូចគុណភាពទាំងនោះ ភាគច្រើនហួសកាលបរិច្ឆទប្រើប្រាស់ ហើយមានសារធាតុគីមី។ នេះបើតាមប្រធាននាយកដ្ឋានផ្នែកស្ថិតិនៃនាយកដ្ឋានកាំកុងត្រូល លោក ឃួន សាវុធ៕
Tag:
សម រង្ស៊ី
ពាណិជ្ជកម្ម
គីមី
© រក្សាសិទ្ធិដោយ thmeythmey.com
