អន្តរជាតិ
អាមេរិកព្រមានអ៊ីរ៉ង់ ក្រោយបារាំងបានចោទថា រៀបផែនការបំផ្ទុះគ្រាប់បែកនៅប៉ារីស ប្រធានាធិបតីអ៊ីរ៉ង់ ហាសាន់ រូហានី ចាប់ដៃសមភាគីបារាំង អេម៉ានុយអែល ម៉ាក្រុង (រូបភាព AFP)
×
សហរដ្ឋអាមេរិក នៅថ្ងៃទី២ ខែតុលា បានផ្ញើសារព្រមានអ៊ីរ៉ង់ បន្ទាប់បារាំងបានចោទទីភ្នាក់ងារចារកម្មអ៊ីរ៉ង់ថា នៅពីក្រោយផែនការវាយប្រហារគ្រាប់បែកក្នុងរដ្ឋធានីប៉ារីសកាលពីបីខែមុន។ អាមេរិក ដែលកំពុងបង្កើនការគាបសង្កត់លើអ៊ីរ៉ង់កាន់តែខ្លាំងនោះ ប្រាប់អ៊ីរ៉ង់ថា សកម្មភាពបែបនេះនឹងមិនត្រូវបានលើកលែងឡើយ។ ក្រុងតេហេរ៉ង់បានបដិសេធភ្លាមៗចំពោះករណីនេះ ហើយបើកទ្វារជជែកជាមួយបារាំង ដើម្បីជម្រះមន្ទិល។
អាជ្ញាធរបារាំង នៅថ្ងៃទី២ ខែតុលា បានផ្អឹបទ្រព្យសម្បត្តិជនជាតិអ៊ីរ៉ង់ពីរនាក់ ដែលត្រូវសង្ស័យថា ជាភ្នាក់ងារចារកម្មរបស់រដ្ឋាភិបាលក្រុងតេហេរ៉ង់ ជុំវិញករណីគម្រោងបំផ្ទុះគ្រាប់បែកក្នុងការជួបជុំកាលពីបីខែមុន។ ការជួបជុំនេះ រៀបចំឡើយដោយក្រុមសកម្មជនប្រដាប់អាវុធមួយក្រុមឈ្មោះ People's Mujahedin of Iran (MEK) ដែលអ៊ីរ៉ង់ចាត់ទុកជាក្រុមភេរវករ តែមហាអំណាចលោកខាងលិចបានលុបឈ្មោះក្រុមនេះចេញពីបញ្ជីក្រុមភេរវកម្មទៅវិញ។
អាមេរិកឯណោះវិញ ក៏នៅមិនស្ងៀមដែរចំពោះហេតុការណ៍នេះ ខណៈកំពុងតែដាក់សម្ពាធលើក្រុងតេហេរ៉ង់ផងនោះ។ ទីប្រឹក្សាសន្តិសុខជាតិចំណុះសេតវិមានបានសរសេរតាមបណ្ដាញ Twitter នៅថ្ងៃទី២ ខែតុលា ថា បារាំងបានចាត់វិធានការខ្លាំងប្រឆាំងផែនការបរាជ័យនៅប៉ារីស ហើយតេហេរ៉ង់ត្រូវដឹងថា សកម្មភាពហួសហេតុនេះ នឹងមិនអាចរួចខ្លួន។ ឯក្រសួងការបរទេសអាមេរិកបានហៅករណីចាប់ជនសង្ស័យនេះថា ជាភស្តុតាងបង្ហាញថា អ៊ីរ៉ង់ជាប្រទេសគាំទ្រភេរវកម្មដ៏ធំ។
ក្រោយមានរកណីចាប់ខ្លួនខាងលើ ក្រុងតេហេរ៉ង់ក៏ស្នើទៅកាន់ក្រុងប៉ារីសដើម្បីជួបជជែកគ្នា ដោះស្រាយការសង្ស័យ។ ជាមួយនឹងការបដិសេធពាក់ព័ន្ធ អ្នកនាំពាក្យក្រសួងការបរទេសអ៊ីរ៉ង់ Bahram Ghasemi បានប្រាប់ AFP ថា បើសិនមានការយល់ច្រឡំដោយសារបញ្ហាដែលមិនបានកើតឡើង ដែលជាផែនការអាក្រក់របស់អ្នកណាម្នាក់ ឬដោយសារកំហុសក្ដី អ៊ីរ៉ង់ និងបារាំងអាចអង្គុយចុះ ហើយពិភាក្សាគ្នាបាន។
ជុំវិញផែនការបំផ្ទុះដដែលនេះ មន្ត្រីអ៊ីរ៉ង់ខាងលើចាត់ទុកជាគម្រោងការដែលសំដៅបំផ្លាញទំនាក់ទំនងវិជ្ជមានរវាងអ៊ីរ៉ង់ និងបារាំង ព្រមទាំងប្រទេសសមាជិកអឺរ៉ុបផ្សេងទៀត។ លោក Ghasemi ក៏បានចង្អុលទៅកាន់នយោបាយបង្កហេតុរបស់អាមេរិកចំពោះអ៊ីរ៉ង់ដែលបង្កើតជាផែនការនេះឡើង សំដៅបណ្ដុះភាពបែកបាក់រវាអ៊ីរ៉ង់ និងអឺរ៉ុប។
បញ្ហានេះទំនងជាត្រូវអាមេរិកប្រើដើម្បីដាក់សម្ពាធកាន់តែខ្លាំងថែមទៀតលើអ៊ីរ៉ង់ ក្រៅពីសំណុំរឿងកិច្ចព្រមព្រៀងនុយក្លេអ៊ែរឆ្នាំ២០១៥ ដែលអាមេរិកដើរចេញឆ្នាំ២០១៨ ។ អាមេរិកគំរាមដាក់ទណ្ឌកម្មលើអ៊ីរ៉ង់ និងប្រទេសដែលហ៊ានរកស៊ីជាមួយអ៊ីរ៉ង់ ជាពិសេសការទិញប្រេងពីអ៊ីរ៉ង់តែម្ដង។ អឺរ៉ុបដែលជម្នះការគំរាមរបស់អាមេរិកនោះ កំពង់រកផ្លូវដើម្បីគេចពីទណ្ឌកម្មរបស់អាមេរិក និងការពារក្រុមហ៊ុនខ្លួនដែលនៅតែប្រកបរបរនៅអ៊ីរ៉ង់៕
Tag:
អាមេរិក
អ៊ីរ៉ង់
បារាំង
© រក្សាសិទ្ធិដោយ thmeythmey.com