អន្តរជាតិ
សិង្ហបុរី៖ អាស៊ានស្នើមីយ៉ាន់ម៉ារកមុខអ្នកទទួលខុសត្រូវវិបត្តិរ៉ូហ៊ីងយ៉ា រដ្ឋមន្រ្តីការបរទេសសិង្ហបុរី វីវៀន បាឡាគ្រីស្នាន់ (រូបភាព AFP)
× ប្រមុខការទូតនៃរដ្ឋសមាជិកអាស៊ាននៅពេលថ្មីៗនេះ បានទទូចឲ្យមីយ៉ាន់ម៉ារកមុខអ្នកទទួលខុសចំពោះការធ្វើទុក្ខបុកម្នេញលើជនជាតិរ៉ូហ៊ីងយ៉ា ដើម្បីកាត់ទោសតាមច្បាប់។ នេះបើតាមការលើកឡើងរបស់រដ្ឋមន្ត្រីការបរទេសសិង្ហបុរី វីវៀន បាឡាគ្រីស្នាន់ នៅថ្ងៃទី២ ខែតុលា។ ជាមួយនឹងក្ដីបារម្ភចំពោះស្ថានភាពយ៉ាប់យ៉ឺនរបស់ជនភាគតិចរ៉ូហ៊ីងយ៉ា អាស៊ានកំពុងរង់ចាំលទ្ធផលស៊ើបអង្កេតរបស់រដ្ឋាភិបាលក្រុងណៃពិដោវិញម្ដង ព្រោះមីយ៉ាន់ម៉ាបានទាត់ចោលការស៊ើបអង្កេតរបស់អង្គការសហប្រជាជាតិ។
រដ្ឋមន្ត្រីការបរទេសអាស៊ាន កាលពីថ្ងៃទី២៩ ខែកញ្ញា បានបើកកិច្ចប្រជុំមិនផ្លូវការនៅក្រៅជំនួបប្រចាំឆ្នាំលើកទី៧៣ មហាសន្និបាតអង្គការសហប្រជាជាតិនៅទីក្រុងញូវយ៉ក ហើយវិបត្តិមនុស្សធម៌នៅមីយ៉ាន់ម៉ា ត្រូវបានលើកយកមកពិភាក្សា។ ប្រមុខការទូតសិង្ហបុរី វីវៀន បាឡាគ្រីស្នាន់ និយាយថា ប្រមុខការទូតអាស៊ានក៏ស្នើមីយ៉ាន់ម៉ាឲ្យស្វែងរកអ្នកនៅពីក្រោយអំពើហិង្សានៅរដ្ឋ Rakhine ដើម្បីទទួលខុសត្រូវពេញលេញចំពោះទង្វើដែលធ្វើឲ្យមីយ៉ាន់ម៉ារងប្រតិកម្មពេញពិភពលោក។
ថ្លែងទៅកាន់សភាសិង្ហបុរីនៅថ្ងៃទី២ ខែតុលា លោក វីវៀន រំឭកពីកិច្ចប្រជុំនៅអាមេរិកថា រដ្ឋមន្ត្រីការបរទេសអាស៊ានពិតជាបារម្ភជាពន់ពេកចំពោះសកម្មភាពហិង្សានៅរដ្ឋ Rakhine ដែលជាវិបត្តិបង្កើតមនុស្សផ្ទាល់។ លោកបន្តថា ដំណោះស្រាយស្ថិតលើរដ្ឋាភិបាលមីយ៉ាន់ម៉ាផ្ទាល់ ហើយនេះជាការទទួលខុសត្រូវដែលអាស៊ាននឹងឲ្យមីយ៉ាន់ម៉ាបំពេញឲ្យបាន ហើយក្រុងណៃពិដោចាំបាច់ធ្វើកិច្ចការត្រឹមត្រូវសម្រាប់ប្រជាជនងាយរងគ្រោះ គ្មានកំហុស និងគ្មានរនាំងការពារខ្លួននោះ។
បើតាមទីភ្នាក់ងារព័ត៌មាន Kyodo លោក វីវៀន អះអាងថា អាស៊ានកំពុងរង់ចាំលទ្ធផលស៊ើបអង្កេតរបស់គណៈកម្មការឯករាជ្យនៃរដ្ឋាភិបាលមីយ៉ាន់ម៉ា ជាពិសេសរង់ចាំពិនិត្យរបាយការណ៍របស់សមាជិកពីរនាក់ដែលជាជនជប៉ុន និងហ្វីលីពីន។ ទោះជាតែងតាំងដោយរដ្ឋាភិបាលទីប្រឹក្សារដ្ឋ អ៊ុងសាន ស៊ូជី មែន ប្រមុខការទូតសិង្ហបុរីចង់ឲ្យគណៈកម្មការនេះមានអំណាចពេញលេញដើម្បីស៊ើបអង្កេត និងវែកមុខអ្នកទទួលខុសត្រូវ។
រដ្ឋាភិបាលក្រុងណៃពិដោ បានបដិសេធលទ្ធផលស៊ើបអង្កេតរបស់បេសកកម្មឯករាជ្យដែលបង្កើតដោយអង្គការសហប្រជាជាតិ ហើយដែលរកឃើញកំហុសរបស់ក្រុមយោធាលើប្រតិបត្តិការដ៏ហិង្សានៅរដ្ឋ Rakhine ។ អ្នកស៊ើបអង្កេតអន្តរជាតិមួយក្រុមនេះចោទយោធាមីយ៉ាន់ម៉ាថា មានចេតនាប្រល័យពូជសាសន៍ជនមូស្លីមរ៉ូហ៊ីងយ៉ា និងបានស្នើឲ្យកាត់ទោសមេទ័ពសំខាន់ៗ៦នាក់ រាប់ទាំងអគ្គមេបញ្ជាការកងទ័ព មីន អ៊ុងឡាំង ផង។
សម្រាប់ដំណោះស្រាយវិញ លោក វីវៀន បញ្ជាក់ថា អ្វីដែលត្រូវការពេលនេះ គឺដំណោះស្រារយៈពេលវែង ហើយអាស៊ានក៏ប្រាប់មីយ៉ាន់ម៉ារួចហើយពីការធ្វើមាតុភូមិនិវត្តន៍ដោយស្ម័គ្រចិត្តរបស់ជនជាតិរ៉ូហ៊ីងយ៉ាពីជំរំនៅបង់ក្លាដែស។ ជាមួយគ្នានេះ អាស៊ានក៏ត្រៀមខ្លួនរួចរាល់ហើយដើម្បីជួយសម្រួលបញ្ហានេះតាមតែអាចជួយទៅបាន៕
Tag:
អាស៊ាន
មីយ៉ាន់ម៉ា
Vivian Balakhrishan
© រក្សាសិទ្ធិដោយ thmeythmey.com