ជាតិ
ក្រសួងពាណិជ្ជកម្មប្រាប់ពីមូលហេតុនៃការកើនថ្លៃប្រេងឥន្ទនៈនៅកម្ពុជា
× ភ្នំពេញ៖ ថ្មីៗនេះ តម្លៃប្រេងឥន្ទនៈលក់រាយនៅកម្ពុជា បានកើនថ្លៃជាបន្តបន្ទាប់។ ការកើនថ្លៃនេះ ដោយសារតែកម្ពុជា បានទទួលរងឥទ្ធិពលពីការប្រែប្រួលតម្លៃប្រេងឥន្ទនៈលើទីផ្សារអន្តរជាតិ ដែលមានការកើនឡើងគួរឲ្យកត់សម្គាល់ ទៅតាមបរិបទនយោបាយពិភពលោក។ នេះយោងតាមសេចក្តីជូនដំណឹងរបស់ក្រសួងពាណិជ្ជកម្ម នាថ្ងៃទី៣តុលា។
ក្រសួងពាណិជ្ជកម្ម បានបញ្ជាក់ថា ចាប់ពីពាក់កណ្តាលខែកញ្ញា ឆ្នាំ២០១៨មក ប្រេងសាំង ១បារ៉ែល(ចំណុះ១៥៩លីត្រ) ដែលកម្ពុជានាំចូល បានកើនថ្លៃពី៨៦.៩៨ ដល់៨៩.៥២ដុល្លារអាមេរិក និងប្រេងម៉ាស៊ូត បានឡើងថ្លៃពី៩២.១៧ ដល់៩៦.៦៨ដុល្លារអាមេរិក។ នេះជាតម្លៃមិនទាន់បានបូកបញ្ចូលពន្ធនៅឡើយ។ តម្លៃប្រេងទាំងនេះ ត្រូវបានក្រសួងពាណិជ្ជកម្មបញ្ចុះ ១៦០រៀល(៤សេន) ក្នុងមួយលីត្រ នៅពេលលក់រាយនៅកម្ពុជា ដើម្បីសម្រួលដល់ការប្រើប្រាស់ប្រចាំថ្ងៃរបស់ប្រជាពលរដ្ឋ។
ក្រសួងពាណិជ្ជកម្ម ក៏បានអះអាងថា តម្លៃលក់រាយប្រេងឥន្ទនៈនៅកម្ពុជា គឺក្រសួងមិនមែនជាអ្នកកំណត់ទេ។ ក្រសួងគ្រាន់តែមានភារកិច្ចស្រង់តម្លៃឡើងចុះ នៃប្រេងឥន្ទនៈទៅតាមទីផ្សារអន្តរជាតិ យកមកគណនា តាមប្រកាសអន្តរក្រសួង ស្តីពីការកំណត់រូបមន្តសម្រាប់កែសម្រួលថ្លៃប្រេងលក់រាយនៅកម្ពុជា ដែលបានចុះកាលពីថ្ងៃទី២២ ខែមិថុនា ឆ្នាំ២០១៨ ប៉ុណ្ណោះ។
គួរបញ្ជាក់ថា បច្ចុប្បន្នប្រេងឥន្ទនៈនៅកម្ពុជា មានតម្លៃលើសពី៤០០០រៀលក្នុងមួយលីត្រ នៅក្នុងរយៈពេលប៉ុន្មានថ្ងៃនេះ ដែលក្នុងនោះប្រេងសាំងសុបពែរតម្លៃ៤៥០០រៀល ទៅ៤៦០០រៀល ក្នុងមួយលីត្រ ខណៈប្រេងសាំងធម្មតា៤៤០០រៀលក្នុងមួយលីត្រ៕
© រក្សាសិទ្ធិដោយ thmeythmey.com