អ៊ីស្រាអែលអួតថា ខែលការពារមីស៊ីល S-300 រុស្ស៊ីមិនអាចទម្លាក់យន្តហោះF-35 ខ្លួនបានឡើយ

អន្តរជាតិ

អ៊ីស្រាអែលអួតថា ខែលការពារមីស៊ីល S-300 រុស្ស៊ីមិនអាចទម្លាក់យន្តហោះF-35 ខ្លួនបានឡើយ

05, Oct 2018 , 8:39 pm

រូបភាព

ដោយ:

មន្ត្រីជំនាញផ្នែកសន្តិសុខជាតិអ៊ីស្រាអែល នៅថ្ងៃទី០៣ ខែតុលាបាននិយាយថា យន្តហោះបំបាំងកាយរបស់យោធាអ៊ីស្រាអែល F-35 នឹងអាចគេចផុតពីការវាយប្រហាររបស់ប្រព័ន្ធការពារមីស៊ីល S-300 របស់រុស្ស៊ី និងអាចបំផ្លាញប្រព័ន្ធទាំងនោះទៀតផង។

កាលពីថ្ងៃទីអង្គារ ទី០២ ខែតុលាកន្លងទៅ រដ្ឋមន្ត្រីការពារជាតិរុស្ស៊ី Sergei Shoigu បាននិយាយថា ក្រុងមូស្កូបានចាប់ផ្តើមបញ្ជូនខែលការពារមីស៊ីល S-300 ទៅឲ្យកងទ័ពស៊ីរី ក្នុងគោលបំណងពង្រឹងសន្តិសុខប្រទេសនោះ។

ភ្លាមៗក្រោយការប្រកាសនេះ រដ្ឋមន្ត្រីកិច្ចសហប្រតិបត្តិការតំបន់របស់អ៊ីស្រាអែល Tzachi Hanegbi ឆ្លើយតបវិញថ្ងៃទី ៣ ខែតុលាថា យន្តហោះចម្បាំងខ្លួនគេរួចពីប្រព័ន្ធការពារមីស៊ីលនេះ។ លោកបានបញ្ជាក់ដូច្នេះថា ៖ «អ្នកដឹងទេថា យើងមានយន្តហោះបំបាំងកាយដែលល្អបំផុតលើពិភពលោក។ ខែលមីស៊ីលទាំងនោះពុំមានសមត្ថភាពតាមចាប់ពួកវាបាននោះទេ»។ លោកនិយាយបែបនេះគឺសំដៅទៅយន្តហោះប្រយុទ្ធ F-35 ដែលអ៊ីស្រាអែលទិញពីសហរដ្ឋអាមេរិក។

យោងតាមសារព័ត៌មានរុស្ស៊ី Sputnik រដ្ឋមន្ត្រីការពារជាតិអ៊ីស្រាអែលមិនពេញចិត្តឡើយ ចំពោះការបញ្ជូនប្រព័ន្ធ S-300 ទៅឲ្យស៊ីរី ហើយរដ្ឋមន្ត្រីនេះបានសង្កត់ធ្ងន់ថា សកម្មភាពរបស់រុស្ស៊ីនេះនឹងមិនអាចទប់ស្កាត់សកម្មភាពយោធារបស់ខ្លួននៅស៊ីរីឡើយ។

គួររម្លឹកដែរថា វិមានក្រែមឡាំង កាលពីថ្ងៃទី២៤ ខែកញ្ញាកន្លងទៅ បានប្រកាសថាខ្លួននឹងផ្តល់ប្រព័ន្ធខែលមីស៊ីល S-300 ទៅឲ្យស៊ីរី ដើម្បីពង្រឹងប្រព័ន្ធការពារដែនអាកាសស៊ីរី។ ការប្រកាសនេះគឺដើម្បីឆ្លើយតបនឹងហេតុការណ៍មួយ ក្រោយពីយន្តហោះយោធារុស្ស៊ី Il-20 មួយគ្រឿងត្រូវបានបាញ់ធ្លាក់ដោយកងទ័ពស៊ីរីដោយអចេតនា។ ប៉ុន្តែក្រុងមូស្កូបានចោទប្រកាន់ អ៊ីស្រាអែលដែលបង្កឲ្យមានបញ្ហានេះកើតឡើង៕