បទយកការណ៍ / បទសម្ភាសន៍
អ្នកលក់ផ្កាក្នុងរដូវភ្ជុំឆ្នាំនេះពិបាករកចំណូលព្រោះមិនសូវមានអ្នកទិញ
× ភ្នំពេញ៖ អ្នកលក់ផ្កាឈូកនិងផ្កាម្លិះ នៅបរិវេណវត្តសន្សំកុសល ក្នុងឱកាសបុណ្យកាន់បិណ្ឌភ្ជុំបិណ្ឌឆ្នាំ២០១៨នេះ ហាក់រកចំណូលមិនសូវបានដូចឆ្នាំមុនៗឡើយ។ រកចំណូលមិនសូវបានដោយសារតែមិនសូវមានពុទ្ធបរិស័ទទៅវត្ត ហើយអ្នកដែលទៅក៏មិនសូវទិញទៀត។
ដើម្បីបានជ្រាបច្បាស់សូមស្ដាប់បទយកការណ៍ដែលរៀបចំដោយកញ្ញា ប៉ូ សាគុន ដូចតទៅ៖
នៅខ្លោងទ្វារក្នុងបរិវេណវត្តសន្យំកុសល អ្នកលក់ផ្កាឈូក និងផ្កាម្លិះជាច្រើនរូបបានដាក់ផ្ការបស់ខ្លួនក្នុងធុងទឹកតម្រៀបគ្នាជាជួរ ដែលមានផ្កាព័ណ៌ស ព័ណ៌ក្រហម និងព័ណ៌ផ្កាឈូក។ អ្នកលក់ភាគច្រើនបានរត់តាមម៉ូតូ ឡាន និងម៉ូតូកង់បី ដើម្បីហៅភ្ញៀវឱ្យទិញផ្ការបស់ខ្លួន តាំងពី យានជំនិះទាំងនោះ មិនទាន់ចូលដល់ខ្លោងទ្វារវត្តស្រួលបួលម្ល៉េះ។ ក្រុមអ្នកលក់ផ្កាហាក់សប្បាយចិត្តច្រើន នៅពេលឃើញម៉ូតូកង់បីដឹងមនុស្សចូលវត្ត ជៀសជាងឃើញឡាន ឬម៉ូតូធម្មតា។ ការណ៍នេះទំនងជាអ្នកជិះលើម៉ូតូកង់បីតែងតែទិញផ្ការបស់ពួកគេច្រើនហើយមើលទៅ។ តែពេលខ្លះពួកគេទាំងនោះជួនលក់បានច្រើន ហើយពេលខ្លះក៏លក់មិនដាច់សោះដែរ។
ត្រូវបត់ផ្កាឈូកធ្វើម៉ូដផង ហើយពេលខ្លះត្រូវរត់ទៅលក់ផ្កាផង អ្នកស្រី ឈិន កែវ ដែលប្រកបរបរលក់ផ្កាឈូកតាំងពីឆ្នាំ២០១៣មក ឱ្យដឹងថា ក្នុងរដូវភ្ជុំបិណ្ឌឆ្នាំនេះ អ្នកស្រីលក់ផ្កាឈូកដាច់ច្រើនតែនៅថ្ងៃសៅរ៍និងថ្ងៃអាទិត្យតែប៉ុណ្ណោះ។ ត្រូវលក់ទាំងប្ដីប្រពន្ធនិងកូនផង ដោយត្រូវបែងចែកគ្នាទៅវត្តផ្សេងៗ ក្នុងមួយថ្ងៃអ្នកស្រីអាចរកប្រាក់ចំណេញបានប្រមាណ១០ម៉ឺនរៀល។ ផ្កាឈូកដែលកាច់ពីទំនប់កប់ស្រូវទាំងនេះ ឈ្មួញកណ្ដាល បានយកមកលក់បន្តនៅមុខព្រះបរមរាជវាំង ដោយបែងចែកតម្លៃជាបីប្រភេទ។ ផ្កាឈូក១០០ស្រទាបតម្លៃ៥០,០០០រៀលក្នុងមួយរយដើម ផ្កា១០០ស្រទាបដដែលតែប្រភេទតូចតម្លៃ៣០,០០០រៀល និងផ្កាឈូកខ្មែរ តម្លៃ២៥,០០០រៀលក្នុងមួយរយដើម។ ចំណែកតម្លៃលក់ចេញវិញ ជាមធ្យមអ្នកស្រី កែវ លក់បីទង២៥០០រៀល។ ធ្លាប់មានពិសោធន៍លក់ផ្កាឈូកយូរឆ្នាំ អាជីវករមកពីខេត្តកំពង់ស្ពឺរូបនេះ ថាពិធីបុណ្យកាន់បិណ្ឌភ្ជុំបិណ្ឌឆ្នាំនេះ លក់មិនសូវដាក់ដូចឆ្នាំមុនៗឡើយ ហើយអ្នកស្រីក៏មិនបានដឹងពីមូលហេតុដែរ។ អ្នកស្រី កែវ បញ្ជាក់បន្ថែម៖ «ខ្ញុំលក់យូរឆ្នាំហើយ។ ឆ្នាំនេះលក់ដាច់តែថ្ងៃសៅរ៍និងថ្ងៃអាទិត្យ ព្រោះមានមនុស្សច្រើន។ លក់បីនាក់ ប្ដីហើយនឹងកូនទៅលក់នៅវត្តផ្សេងៗទៀត។ ឆ្នាំនេះមិនទាន់ហ៊ានថាចំណេញបានប៉ុន្មានទេ»។
ចំណែកអ្នកស្រី នាង ស៊ីណាត វិញ ជាអ្នកលក់ផ្កាម្លិះក្នុងរដូវកាន់បិណ្ឌភ្ជុំបិណ្ឌឆ្នាំនេះ ក៏បានត្អូញត្អែរពីបញ្ហាលក់ផ្កាមិនសូវដាច់នេះដែរ។ តាមពិតទៅរាល់ឆ្នាំអ្នកស្រី ស៊ីណាត លក់ផ្កាបោះដុំឱ្យឈ្មួញកណ្ដាល នៅតាមបណ្ដាខេត្តផ្សេងៗតែប៉ុណ្ណោះ។ ប៉ុន្តែឆ្នាំនេះឈ្មួញកណ្ដាលទិញផ្ការបស់អ្នកស្រីមិនអស់ឡើយ ជាហេតុនាំឱ្យស្ត្រីរូបនេះត្រូវយកផ្កាទាំងនោះ មកលក់នៅវត្តដោយខ្លួនឯង។ មិនសូវមានពិសោធលក់ផ្កាទៅអតិថិជនផ្ទាល់ អ្នកស្រី ស៊ីណាត ហាក់ដូចជានៅអៀនបន្តិចពេលដែលស្រែកហៅគេឱ្យទិញផ្ការបស់ខ្លួនម្ដងៗ។
ខណៈពេលដែលអ្នកលក់ដទៃទៀត ទាំងក្មេងទាំងចាស់ បានរត់ទៅរកអតិថិជនរបស់ខ្លួនយ៉ាងញាប់ជើង និងនិយាយបញ្ចុះបញ្ចូលពួកគេឱ្យទិញផ្ការបស់ខ្លួនរៀងៗខ្លួន អ្នកស្រី ស៊ីណាត បានត្រឹមតែឈរនៅមួយកន្លែងសម្លឹងមើលទៅអ្នកលក់ទាំងនោះតែប៉ុណ្ណោះ។ ស្ត្រីដែលមានដើមផ្កាម្លិះ មកពីភូមិកោះក្របី រូបនេះ ថាខ្លួនត្រូវលក់ផ្កាបោះដំផង លក់រាយផង និងត្រូវត្រឡប់ទៅបេះផ្កាសម្រាប់លក់នៅថ្ងៃស្អែកបន្តផង។ កាលពីឆ្នាំមុន ក្នុងមួយរដូវភ្ជុំអ្នកស្រី ស៊ីណាត អាចលក់ផ្កាបានប្រមាណជាងមួយលានរៀល តែឆ្នាំនេះអ្នកស្រីមិនទាន់អាចប៉ាន់ប្រមាណបាននៅឡើយទេ។ ក្រៅពីលក់ផ្កាក្នុងពិធីបុណ្យធំៗបែបនេះ អ្នកស្រី ស៊ីណាត ក៏លក់ផ្កាម្លិះនៅថ្ងៃសីលផងដែរ។ «ខ្ញុំមិនសូវមកលក់ផ្ទាល់ទេ ខ្ញុំច្រើនលក់បោះដុំឱ្យគេនៅតាមខេត្ត។ ឆ្នាំនេះគេយកផ្កាមិនអស់ ខ្ញុំមកលក់នៅវត្តខ្លះហើយបោះឱ្យអ្នកលក់នៅទីនេះខ្លះ»។ នេះជាការបញ្ជាក់របស់អ្នកស្រី ស៊ីណាត។
កំពុងតែឈររអ៊ូជាមួយអ្នកលក់ដទៃទៀត ព្រោះតែការលក់មិនដាច់ ម៉ោងជិត១០ព្រឹកទៅហើយនោះអ្នកស្រី គឹម ពុម្ភ ទើបតែលក់ផ្កាម្លិះបានប្រាក់ប្រមាណ៥,០០០រៀលតែប៉ុណ្ណោះ។ ស្ត្រីសម្បុរស្រអែម វ័យប្រមាណ៥០ឆ្នាំរូបនេះ ទិញផ្កាពីឈ្មួញតម្លៃ១,០០០រៀលទៅ២,០០០រៀល ប្រភេទផ្កាភួង ចំណែកផ្កាដោតធម្មតាតម្លៃ២០០រៀល ឬ ៥០០រៀល។ តម្លៃលក់ចេញវិញ អ្នកស្រី ពុម្ភ យកចំណេញប្រមាណ៥០០រៀលទៅ១,០០០រៀលតែប៉ុណ្ណោះក្នុងមួយភួង។ ស្ត្រី ដែលមកពីស្រុកកៀនស្វាយរូបនេះ អះអាងថាកាលពីឆ្នាំមុន អ្នកស្រីលក់ផ្កាដាច់ច្រើន តែឆ្នាំនេះមិនសូវដាច់ឡើយ។ មិនមែនមកពីមិនសូវមានមនុស្សទៅវត្តឡើង តែអ្នកស្រី ពុម្ភ សង្កេតឃើញថា អ្នកដែលមកវត្តគឺមិនសូវទិញផ្កាតែម្ដង។ បើសិនជាលក់មិនដាច់រាល់ថ្ងៃ ផ្កាដែលអ្នកស្រី ពុម្ភ លើកពីឈ្មួញមកនេះ មានតែផ្លូវបោះចោលតែប៉ុណ្ណោះ ព្រោះផ្កាប្រភេទនេះមិនអាចទុកបានយូរថ្ងៃ ព្រមទាំងត្រូវត្រាំទឹកកកជាប្រចាំផង។ អ្នកស្រី ពុម្ភ បន្ថែម៖ «គេលក់ដាច់ ក្មេងៗគេរត់ ហើយយើងចាស់ហើយរត់ដូចគេម៉េចកើត។ ឆ្នាំមុនលក់ដាច់ណាស់ ឆ្នាំនេះលក់មិនដាច់មិនដឹងមូលហេតុអី។ គេមកវត្តដែរ តែគេអត់ទិញ។ផ្កានេះតែទុកយូរចោលហើយ»។
Tag:
កាន់បិណ្ឌភ្ជុំបិណ្ឌ
ផ្កាឈូក
ផ្កាម្លិះ
សេដ្ឋកិច្ច
© រក្សាសិទ្ធិដោយ thmeythmey.com