អន្តរជាតិ
បារាំងបើកការស៊ើបអង្កេត ក្រោយបាត់មេប៉ូលិសអន្តរជាតិនៅចិន លោក ម៉ឹង ហុងវៃ ប្រធាន Interpol ដែលបាត់ខ្លួន (រូបភាព AFP)
× ប៉ូលិសបារាំង កំពុងបើកការស៊ើបអង្កេតករណីបាត់ខ្លួនមេប៉ូលិសអន្តរជាតិ (Interpol) ដែលជាជនជាតិចិន ម៉ឹង ហុងវៃ (Meng Hongwei) ។ លោក ម៉ឹង ត្រូវបានរាយការណ៍ថា បានបាត់ខ្លួនបន្ទាប់ពីធ្វើដំណើរពីបារាំងទៅកាន់ដឹកដីកំណើតរបស់ខ្លួននៅចុងខែកញ្ញា។ សារព័ត៌មានហុងកុងផ្សាយថា លោក ម៉ឹង ត្រូវបានអាជ្ញាធរចិនចាប់ខ្លួនបាត់ទៅហើយ។
លោក ម៉ឹង ហុងវៃ ជាជនជាតិចិនទីមួយ ដែលកាន់តំណែងប្រធានប៉ូលិសអន្តរជាតិ។ ភរិយារបស់លោកបានទាក់ទងទៅកាន់ប៉ូលិសនៅទីក្រុងលីយ៉ុង ដែលជាទីស្នាក់ការរបស់ Interpol បន្ទាប់ពីបាត់ដំណឹងពីស្វាមីរបស់ខ្លួនតាំងពីថ្ងៃទី២៩ ខែកញ្ញាមក។ បើតាមទីភ្នាក់ងារព័ត៌មាន Reuters មន្ត្រីដែលពាក់ព័ន្ធការស៊ើបអង្កេតនេះអះអាងថា តាមការសន្និដ្ឋានបឋមរបស់អ្នកស៊ើបអង្កេតលោកខាងលិច គឺលោក ម៉ឹង ទំនងជាធ្វើឲ្យអាជ្ញាធរចិនទាស់ចិត្ត ទើបត្រូវឃាត់ខ្លួនតែម្ដង។
នេះមិនមែនជាលើកទីមួយឡើយ ដែលមន្ត្រីជាន់ខ្ពស់ចិនបាត់ដំណឹងសូន្យឈឹងបែបនេះ រហូតដល់ពេលលើសមួយសប្ដាហ៍ ឬរាប់ខែក៏មាន។ ព័ត៌មានពាក់ព័ន្ធការឃាត់ខ្លួន ច្រើនត្រូវបានអាជ្ញាធរចិនបញ្ចេញក្រោយការស៊ើបអង្កេតរបស់ខ្លួន ហើយច្រើនទាក់ទងអំពើពុករលួយ។ ករណីនេះ ទំនងជាអាចកើតឡើងលើលោក ម៉ឹង ផងដែរ។
សារព័ត៌មានហុងកុង South China Morning Post ដែលបានស្រង់ប្រភពមិនបញ្ចេញឈ្មោះ ផ្សាយថា លោក ម៉ឹង ជាអនុរដ្ឋមន្ត្រីសន្តិសុខសាធារណៈរបស់ក្រុងប៉េកាំងផងនោះ ត្រូវបានឃាត់ខ្លួនដោយអាជ្ញាធរចិន ពេលទៅដល់ចិនភ្លាមៗ។ ប្រភពព័ត៌មានដដែល មិនបានបញ្ជាក់ទេថា លោក ម៉ឹង ត្រូវបានស៊ើបអង្កេតលើសំណុំរឿងអ្វី ឬត្រូវបានឃុំខ្លួននៅទីណាឡើយ ឯមន្ត្រីចិនក៏មិននិយាយអ្វីពីបញ្ហានេះនៅឡើយដែរ។
ពាក់ព័ន្ធការបាត់ខ្លួននេះ Interpol ដែលជាស្ថាប័នមានសមាជិក១៩២ប្រទេសនិយាយថា ខ្លួនទទួលបានព័ត៌មានពីការបាត់ខ្លួនរបស់លោក ម៉ឹង នេះហើយ។ ប៉ុន្តែ Interpol ក៏បញ្ជាក់ដែរថា នេះជាបញ្ហារវាងអាជ្ញាធរបារាំង និងចិន។
សូមបញ្ជាក់ដែរថា Intepol គឺជាអង្គការអន្តរជាតិដ៏ធំមួយ ដែលជាធម្មតាការងាររបស់អង្គការនេះផ្ដោតលើការស្វែងរកមនុស្សបាត់ខ្លួន ឬការតាមចាប់ជនល្មើស។ ប៉ុន្តែអង្គការនេះ មិនមានអំណាចផ្ទាល់ក្នុងការអនុវត្តការងាររបស់ខ្លួន ហើយពឹងផ្អែកលើប្រទេសសមាជិកវិញ។ លោក ម៉ឹង ដែលជាមន្ត្រីសន្តិសុខជាន់ខ្ពស់របស់ចិន បានក្លាយជាប្រធាន Interpol នៅកាលពីឆ្នាំ២០១៦ ដែលកាលនោះក៏បង្កើតជាពាក្យរិះគន់ខ្លាំងពីអង្គការសិទ្ធិមនុស្ស៕
Tag:
បារាំង
ចិន
Interpol
Meng Hongwei
© រក្សាសិទ្ធិដោយ thmeythmey.com