អ្នកធ្វើនំខ្មែរ បារម្ភនៅពេលពលរដ្ឋខ្មែរហាក់និយមនំបរទេសជាង

ជាតិ

បទសម្ភាសន៍

បុណ្យភ្ជុំបិណ្ឌ

វីដេអូ

អ្នកធ្វើនំខ្មែរ បារម្ភនៅពេលពលរដ្ឋខ្មែរហាក់និយមនំបរទេសជាង

07, Oct 2018 , 2:59 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ បច្ចុប្បន្ន នំខ្មែរខ្លះស្ទើរតែគ្មានវត្តមាននៅតាមបណ្តាហាងអាហារ ឬភេសជ្ជៈ និងភោជនីយដ្ឋានដូចនំបរទេសដែលមានកន្លែងតាំងលក់សមរម្យនោះឡើយ។ ប៉ុន្តែ នំខ្មែរដែលមានដូចជា នំអន្សមគ្រប់ប្រភេទ នំគម នំបត់ នំចាំង នំផ្លែអាយ នំត្រៀបាយជាដើមនោះ វាបែរជាមានលក់តែនៅតាមផ្សារ តាមរទេះរុញ រទេះកង់-ម៉ូតូ ឬដាក់ថាសទូលក់តាមដងផ្លូវសាធារណៈជាដើម។

រូបភាពនេះ បានរួមចំណែកធ្វើឲ្យនំខ្មែរ ហាក់ថមថយការពេញនិយមបន្ដិចម្តងៗ ពីសំណាក់ប្រជាពលរដ្ឋខ្មែរ ដោយពួកគាត់បានបែរទៅនិយមប្រទេសនំបរទេស ហើយវាបានក្លាយជាកង្វល់របស់ពលរដ្ឋមួយចំនួន រួមទាំងអ្នកវេចនំខ្មែរផង ថាខ្លាចបាត់បង់នៅថ្ងៃណាមួយ។

អ្នកស្រី យ៉ុង ចន្ធី ជាអ្នកធ្វើនំខ្មែរលក់ និងជាបុគ្គលិករបស់សិប្បកម្មផលិតនំខ្មែរ«នាឡិ»ផង បានបង្ហាញក្តីបារម្ភរបស់ខ្លួន ទៅលើការធ្វើនំ និងការនិយមនំខ្មែររបស់យុវ័យកម្ពុជានាពេលបច្ចុប្បន្ន។ ស្ត្រីរូបនេះ សង្កេតឃើញថា ប៉ុន្មានឆ្នាំចុងក្រោយនេះ នៅពេលអ្នកស្រីវេចនំនៅផ្ទះក្នុងរដូវបុណ្យទាន មិនសូវឃើញមានយុវជន ចង់ចេះធ្វើ ឬវេចនំខ្មែរនោះទេ។ ការណ៍នេះ ធ្វើឲ្យអ្នកស្រី យ៉ុង ចន្ធី កើតក្តីព្រួយបារម្ភថានំខ្មែរមួយចំនួននឹងបាត់បង់ ឬគ្មានមានវត្តមានសម្រាប់អ្នកជំនាន់ក្រោយទៀតឡើយ។

អ្នកស្រី មឿន វណ្ណនី ដែលជាអ្នកស្រុកកោះធំ ខេត្តកណ្តាល ក៏មានកង្វល់នេះដូចគ្នាដែរ។ មានវ័យ៣៩ឆ្នាំ អ្នកស្រី វណ្ណនី លើកឡើងដូច្នេះ៖«នៅជំនាន់ខ្ញុំ មិនសូវមានអ្នកចេះវេច ឬធ្វើនំខ្មែរទៅហើយ។ ខ្ញុំខ្លាចតែមនុស្សជំនាន់ក្រោយ មិនចេះវេចនំខ្មែរទេ ព្រោះមាននំបរទេសចូលស្រុកច្រើនបែបនេះ»។

ហេតុដូច្នេះហើយបានជាអ្នកស្រី មឿន វណ្ណនី បានមករៀនវេចនំខ្មែរ នៅសិប្បកម្ម«នាឡិ»។ ទើបតែរៀនចេះវេចនំខ្មែរដូចជានំអន្សមជ្រូកតូច នំអន្សមចេក និងនំមៀនក្នុងរយៈពេលប៉ុន្មានខែចុងក្រោយនេះ អ្នកស្រី មឿន វណ្ណនី ប្រាប់សារព័ត៌មានថ្មីៗថា គាត់រៀនវេចនំខ្មែរ ព្រោះចង់រួមចំណែកថែរក្សានំខ្មែរកុំឲ្យបាត់បង់ ទៅតាមលទ្ធភាពអាចធ្វើបាន តាមរយៈការធ្វើនំខ្មែរ លក់នៅស្រុកកំណើតរបស់ខ្លួន។

យុវជនមួយរូបទៀត គឺលោក ស៊ុន ភារុន ក៏បារម្ភខ្លាចបាត់បង់នំខ្មែរដែរ។ មានវ័យ១៧ឆ្នាំលោក ភារុន បានមករៀននៅសិប្បកម្មនាឡិ និងថែមទាំងបានស្នើឲ្យយុវវ័យឲ្យជួយថែអត្តសញ្ញាណនំខ្មែរឲ្យបានគង់វង្ស តាមរយៈការគាំទ្រនំខ្មែរ។

ការស្រឡាញ់នំខ្មែរ ដែលដូនតាបានបន្សល់ទុកឲ្យ និងការមើលឃើញជីដូនរបស់ខ្លួនវេច និងធ្វើនំជាប្រចាំ បានធ្វើឲ្យកុមារី ស៊ុន ស្រីម៉ី អាយុ១៤ឆ្នាំ មានគំនិតចង់រក្សាវត្តមាននំខ្មែរ។ លើសពីនេះ ស្រីម៉ី អះអាងថា រូបគេមានមោទនភាពដែលខ្លួនចេះនំប្រពៃណីខ្មែរ បង្ហាញជនបរទេសដែលមកកម្សាន្តនៅកម្ពុជា។