កីឡាអន្តរជាតិ
អន្តរជាតិ
សៀរ៉ាឡេអូន ជាប់បម្រាម FIFA ដោយសារមានការជ្រៀតជ្រែកពីរដ្ឋាភិបាល
× សហព័ន្ធកីឡាបាល់ទាត់អន្តរជាតិ FIFA បានសម្រេចផ្អាកក្រុមកីឡាបាល់ទាត់ជម្រើសជាតិសៀរ៉ាឡេអូនមិនឲ្យប្រកួតក្នុងក្របខណ្ឌអន្តរជាតិដោយសារតែការជ្រៀតជ្រែករបស់រដ្ឋាភិបាលក្នុងដំណើរការរបស់សហព័ន្ធកីឡាបាល់ទាត់ (SLFA) ប្រទេសនេះ។
ការហាមឃាត់នេះកើតឡើងបន្ទាប់ពីគណៈកម្មាការប្រឆាំងអំពើពុករលួយ (ACC) របស់សៀរ៉ាឡេអូនបានរារាំងមន្ត្រីសំខាន់ពីររូបរបស់ SLFA ពីការិយាល័យគ្រប់គ្រងកីឡាបាល់ទាត់របស់ប្រទេសពីទ្វីបអាហ្វ្រិកនេះ។
តែយ៉ាងណា FIFA បាននិយាយថា ការព្យួរនេះនឹងត្រូវលើកលែងវិញនៅពេលដែល SLFA និងថ្នាក់ដឹកនាំបានបញ្ជាក់ប្រាប់ FIFA ថាការគ្រប់គ្រង SLFA និងបណ្តាញទំនាក់ទំនងស្ថិតក្រោមការគ្រប់គ្រងរបស់ខ្លួនតែម្នាក់ម្តងទៀត។
ប្រសិនបើការហាមខាងលើមិនត្រូវបានលើកឡើងឲ្យបានមុនថ្ងៃទី១១ ខែតុលានេះទេ នោះការប្រកួតវគ្គជម្រុះ Africa Cup of Nations 2019 របស់ស៊ីរ៉ាឡេអូនទល់នឹងក្រុមជម្រើសជាតិហ្គាណានឹងត្រូវលុបចោលជាមិនខាន។ ពានរង្វាន់ប្រចាំទ្វីបអាហ្វ្រិកនេះនឹងត្រឡប់មកចាប់ផ្តើមការប្រកួតវិញពីថ្ងៃទី១៥ ខែតុលា ឆ្នាំ២០១៨។
ស៊ីរ៉ាឡេអូនស្ថិតក្នុងពូល F ជាមួយអេត្យូពី កេនយ៉ា និងហ្គាណា ហើយក្រុមទាំង៤មាន៣ពិន្ទុដូចគ្នាក្រោយឆ្លងកាត់២ប្រកួតកន្លងមក។
គណៈកម្មាការប្រឆាំងអំពើពុករលួយ (ACC) បាននិយាយថាក្រោមច្បាប់របស់ប្រទេសស៊ីរ៉ាឡេអូន ប្រធាន ISFA លោក Isha Johansen និងអគ្គលេខាធិការលោក Christopher Kamara ត្រូវតែលាលែងពីតំណែងរបស់ពួកគេរហូតទាល់តែរឿងក្តីពាក់ព័ន្ធនឹងករណីពុករលួយរបស់អ្នកទាំងពីរត្រូវបានបញ្ចប់។ ប៉ុន្តែលោក Johansen និង Kamara បានបដិសេធរាល់កំហុសទាំងនោះ។
អង្គភាពគ្រប់គ្រងកីឡាពិភពលោក FIFA បានព្រមានម្តងហើយម្តងទៀតដល់អាជ្ញាធរស៊ីរ៉ាឡេអូនថាសកម្មភាពរបស់ ACC អាចនឹងត្រូវហាមឃាត់ ហើយនៅក្នុងលិខិតចុះថ្ងៃទី២៨ ខែកញ្ញា បានស្នើសុំឲ្យមានកិច្ចប្រជុំជាមួយរដ្ឋាភិបាលនៃប្រទេសនេះដើម្បីដោះស្រាយភាពជាប់គាំងឲ្យបានទាន់ពេល៕
Tag:
បាល់ទាត់
FIFA
សៀរ៉ាឡេអូន
© រក្សាសិទ្ធិដោយ thmeythmey.com