ដើម្បីមុខមាត់ជាតិ ក្រុមជម្រើសជាតិកម្ពុជាមិនឈប់សម្រាកក្នុងថ្ងៃបុណ្យភ្ជុំបិណ្ឌឡើយ

កីឡាជាតិ

ជាតិ

បុណ្យភ្ជុំបិណ្ឌ

ដើម្បីមុខមាត់ជាតិ ក្រុមជម្រើសជាតិកម្ពុជាមិនឈប់សម្រាកក្នុងថ្ងៃបុណ្យភ្ជុំបិណ្ឌឡើយ

07, Oct 2018 , 11:59 am

រូបភាព

ដោយ:

ក្រុមកីឡាករជម្រើសជាតិកម្ពុជា គ្រូបង្វឹក រួមទាំងមន្ត្រីមួយចំនួនរបស់សហព័ន្ធកីឡាបាល់ទាត់កម្ពុជា មិនបានឈប់សម្រាកក្នុងថ្ងៃបុណ្យភ្ជុំបិណ្ឌនោះទេ ដោយសារជាប់កាតព្វកិច្ចហ្វឹកហាត់ ដើម្បីត្រៀមជំនួបមិត្តភាពអន្តរជាតិជាមួយទីម័រខាងកើតនាថ្ងៃទី១២ ខែតុលា ឆ្នាំ២០១៨ នៅពហុកីឡដ្ឋានជាតិ។

អ្នកចាត់ការទូទៅក្រុមជម្រើសជាតិកម្ពុជា លោក ឈូក ពិសិដ្ឋ បាននិយាយថា ក្រុមជម្រើសជាតិកម្ពុជា មិនត្រូវបានអនុញ្ញាតឲ្យឈប់សម្រាកទៅលេងស្រុកកំណើតក្នុងថ្ងៃបុណ្យភ្ជុំបិណ្ឌនោះទេ។ ការមិនអនុញ្ញាតនេះ ក៏ព្រោះតែ ពួកគេជាប់ហ្វឹកហាត់បង្កើនសមត្ថភាព ដើម្បីត្រៀមការប្រកួតមិត្តភាពអន្តរជាតិជាមួយក្រុមទីម័រខាងកើត។

បើតាមលោក ឈូក ពិសិដ្ឋ ក្រុមកីឡាករជម្រើសជាតិកម្ពុជា ដែលបានប្រមូលផ្តុំហ្វឹកហាត់កាលពីថ្ងៃទី៤ ខែតុលា ត្រូវហ្វឹកហាត់រហូតដល់ថ្ងៃប្រកួតតែម្តង បន្ទាប់ពីពួកគេត្រូវបានឲ្យឈប់សម្រាកនៅថ្ងៃទី៧ ខែតុលានេះ។ តែយ៉ាងណា លោក មិនបានបញ្ជាក់ លម្អិតពីមូលហេតុមិនឲ្យឈប់សម្រាកបានក្បោះក្បាយនោះឡើយ។

ក្រុមជម្រើសជាតិកម្ពុជាក្រោមការដឹកនាំរបស់លោក Keisuke Honda ដែលមានលោក Felix ជាគ្រូបង្វឹកផ្ទាល់នៅលើទីលានត្រូវបើកទ្វារពហុកីឡដ្ឋានជាតិលើកទី២ ស្វាគមន៍ភ្ញៀវទីម័រខាងកើតនៅថ្ងៃទី១២ ខែតុលា នាម៉ោង៦:៣០នាទី។ ខណៈនាជំនួបមិត្តភាពអន្តរជាតិលើកទី១ កម្ពុជាប្រកួតចាញ់ម៉ាឡេស៊ីក្នុងលទ្ធផល ៣-១៕