ជាតិ
សម្តេច ហ៊ុន សែន ពេញចិត្តឲ្យអ្នកដឹកនាំវ័យក្មេងនៃបក្សផ្សេងៗរៀនសូត្រពីប្រជាធិបតេយ្យនៅជប៉ុន
× ភ្នំពេញ៖ រដ្ឋាភិបាលជប៉ុន នឹងអញ្ជើញតំណាងគណបក្សផ្សេងៗរបស់កម្ពុជា រួមទាំងមន្ត្រីរបស់ គណៈកម្មាធិការជាតិរៀបចំការបោះឆ្នោត ទៅទស្សនកិច្ចស្វែងយល់ដំណើរការប្រជាធិបតេយ្យ នៅប្រទេសជប៉ុន នាពេលខាងមុខ។ នេះបើតាមការថ្លែងរបស់លោក ស៊ិនហ្សូ អាបេ នាយករដ្ឋមន្ត្រីជប៉ុន នៅក្នុងសន្និសីទកាសែតរួមគ្នាជាមួយសម្ដេចនាយករដ្ឋមន្ត្រី ហ៊ុន សែន នៅថ្ងៃទី៨ខែតុលានេះនៅក្នុងប្រទេសជប៉ុន។
បន្ទាប់ពីការថ្លែងរបស់លោក អាបេ បានបញ្ចប់ សម្ដេច ហ៊ុន សែន បានបង្ហាញការពេញចិត្តចំពោះការអញ្ជើញតំណាងគណបក្សផ្សេងៗឲ្យទៅដកបទពិសោធន៍នៅប្រទេសជប៉ុន។ សម្ដេចមានប្រសាសន៍ដូច្នេះថា៖«ខ្ញុំពិតជាពេញចិត្តនូវអ្វីដែលលោក អាបេ បានលើកឡើង ទាក់ទង នឹងការអញ្ជើញយុវជនដឹកនាំវ័យក្មេងនៃបណ្ដាបក្សនយោបាយ ក៏ដូចជាស្ថាប័នយុត្តិធម៌ រួមទាំងគណៈកម្មាធិការជាតិរៀបចំការបោះឆ្នោត មកទស្សនកិច្ចដកបទពិសោធន៍នៅប្រទេសជប៉ុន»។
សម្ដេចបានបន្ថែមដូចនេះទៀតថា៖«នេះជាវិធីសាស្ត្រនៃការកសាងប្រជាធិបតេយ្យសម្រាប់អនាគតវែងឆ្ងាយរបស់កម្ពុជា។ អ្នកនយោបាយចាស់ៗ អាចផុតរលត់ ក៏ប៉ុន្តែសម្រាប់អ្នកនយោបាយក្មេងៗ ពួកគេអាចកសាងវប្បធម៌ប្រជាធិបតេយ្យមួយរយៈពេលយូរ ហើយមានសុខដុមរម្យនាជាមួយគ្នាទៀតផង»។
ជាមួយគ្នានេះ សម្ដេចនាយករដ្ឋមន្ត្រីបានស្នើឲ្យភាគីជប៉ុនបន្តជួយគាំទ្រការរៀបចំការបោះឆ្នោតនៅកម្ពុជាទៀត។ សូមបញ្ជាក់ថា សម្ដេចប្រមុខរដ្ឋាភិបាល បានដឹកនាំគណៈប្រតិភូកម្ពុជា ចូលរួមកិច្ចប្រជុំកំពូលមេគង្គ-ជប៉ុនលើកទី១០ នៅទីក្រុងតូក្យូ ចាប់ពីថ្ងៃទី៦ ដល់ថ្ងៃទី១០ខែតុលា៕
© រក្សាសិទ្ធិដោយ thmeythmey.com