IMF៖ អត្រាអតិផរណាវេណេស៊ុយអេឡាកើនដល់ ១,៣លានភាគរយចុងឆ្នាំនេះ និងដល់ ១០លានភាគរយឆ្នាំក្រោយ

អន្តរជាតិ

IMF៖ អត្រាអតិផរណាវេណេស៊ុយអេឡាកើនដល់ ១,៣លានភាគរយចុងឆ្នាំនេះ និងដល់ ១០លានភាគរយឆ្នាំក្រោយ

10, Oct 2018 , 1:39 pm

រូបភាព

ដោយ: សៅ ផលនិស្ស័យ (Sao Phal Niseiy)

មូលនិធិរូបិយវត្ថុអន្តរជាតិ (IMF) បានបញ្ជាក់នៅសប្តាហ៍នេះក្នុងរបាយការណ៍ថ្មីរបស់ខ្លួនថា អត្រាអតិផរណានៅវេណេស៊ុយអេឡានឹងកើនឡើងដល់ជាង ១ លានភាគរយគិតត្រឹមចុងឆ្នាំ ២០១៨នេះ។ បញ្ហានេះកើតឡើងព្រោះរដ្ឋាភិបាលវេណេស៊ុយអេឡាអលទ្ធភាពក្នុងការបន្ថយគម្លៀតថវិកា និងបន្តបោះពុម្ពប្រាក់បន្ថែមទៀតផង។

របាយការណ៍ថ្មីចេញផ្សាយពីថ្ងៃអង្គារទី ៩ ខែតុលាបានព្យាករថា អត្រាអតិផរណានៅវេណេស៊ុយអេឡានឹងកើនឡើងដល់ ១,៣៧ លានភាគរយនៅត្រឹមចុងឆ្នាំ ២០១៨នេះ ហើយវានឹងបន្តកើនឡើងដល់ ១០លានភាគរយត្រឹមឆ្នាំ ២០១៩ បើសិនជាគ្មានវិធានការដោះស្រាយ។

យោងតាម Bloomberg មូលនិធិរូបិយវត្ថុអន្តរជាតិនេះព្យាករដោយផ្អែកលើការវាយប្រហារកាលពីខែកក្កដាដែលរកឃើញថា អត្រាអតិផរណានៅវេណេស៊ុយអេឡាកើនដល់ ១លានភាគរយ។ អត្រានេះកើនឡើងប្រហែល ១រយដងបើប្រៀបធៀបនឹងអត្រាអតិផរណាកាលខែមករាដែលមានត្រឹម ១៣០០០ភាគរយប៉ុណ្ណោះ។

ក្រៅពីកម្រិតអតិផរណាកើនឡើងហួសបរិយាយនោះ IMF ក៏បានវាយតម្លៃផងដែរថា ទំហំសេដ្ឋកិច្ចវេណេស៊ុយអេឡានឹងថយចុះរហូតដល់ ១៨ភាគរយក្នុងឆ្នាំ ២០១៨នេះ។ វាជាឆ្នាំទីបីហើយដែលទំហំសេដ្ឋកិច្ចវេណេស៊ុយអេឡាបន្តរួមតូចក្នុងកម្រិតពីរខ្ទង់បែបនេះ។ ការរួមតូចនៃផលិតផលក្នុងស្រុកសរុបនេះគឺដោយសារអស្ថិរភាព នយោបាយ, សេដ្ឋកិច្ច និងការថយចុះនៃសមត្ថភាពផលិតប្រេងឆៅដើម្បីនាំចេញទៅទីផ្សារអន្តរជាតិ។

របាយការណ៍អង្គការនាំប្រេងចេញ OPEC បង្ហាញថា ការផលិតប្រេងនៅវេណេស៊ុយអេឡាធ្លាក់ចុះខ្លាំង។ ប្រទេសនេះបូមប្រេងបានតិចជាង ១,៥ លានបារ៉ែលក្នុងមួយថ្ងៃប៉ុណ្ណោះ បើទោះវេណេស៊ុយអេឡាមានប្រេងបម្រុងទុកច្រើនក្តី។

ស្ថានភាពសេដ្ឋកិច្ចកាន់តែអាក្រក់ជះឥទិ្ធពលកាន់តែខ្លាំងលើជីវភាពរស់នៅរបស់ប្រជាពលរដ្ឋវេណេស៊ុយអេឡា ហើយវាប្រាកដណាស់ថា ប្រជាជនកាន់តែច្រើននឹងបន្តរត់គេចចេញពីគ្រោះមហន្តរាយទៅជ្រកកោននៅប្រទេសជិតខាង។ ចំណែកប្រជាជនដែលបន្តរស់នៅក្នុងប្រទេសរងគ្រោះកាន់តែខ្លាំងដោយសារជំងឺតម្កាត់ កង្វះខាតស្បៀងអាហារ និងឱសថសម្រាប់ព្យាបាលជំងឺជាដើម។

ចំណែករដ្ឋាភិបាលលោក នីកូឡា ម៉ាឌុយរ៉ូ ឯណោះវិញបន្តចោទប្រកាន់សហរដ្ឋអាមេរិកជុំវិញបញ្ហាដែលកើតមានឡើងក្នុងស្រុក។ ចាប់ពីឆ្នាំ ២០១៣មក រដ្ឋាភិបាលម៉ាឌុយរ៉ូ បន្តបោះពុម្ពប្រាក់បន្ថែម និងបន្តបង្កើនប្រាក់ខែគោលកម្មករចំនួន ២៤ដងរួចទៅហើយក្នុងគោលដៅដោះស្រាយបញ្ហាអតិផរណាកើនលើសលុបនេះ ហើយក្នុងខែសីហាកន្លងទៅ រដ្ឋាភិបាលនេះសម្រេចបង្កើនប្រាក់ឈ្នួល ៣០០០ភាគរយ ពោលគឺដល់ ១៨០០បូលីវ៉ា ដែលមានតម្លៃតិចជាង ២០ដុល្លារប៉ុណ្ណោះក្នុងមួយខែ៕