ជាតិ
សម្ដេច ស ខេង ប្រាប់អន្តរជាតិថា កម្ពុជាមិនមែនជាប្រទេស ដែលមានតម្រូវការសត្វព្រៃទេ ប៉ុន្តែរងគ្រោះដោយសារឈ្មួញដឹកឆ្លងកាត់
× ភ្នំពេញ៖ កម្ពុជា មិនមែនជាប្រទេសដែលមានតម្រូវការសត្វព្រៃ សម្រាប់ជីវភាពប្រចាំថ្ងៃឡើយ ហើយក៏មិនអនុញ្ញាតឲ្យមានការជួញដូរខុសច្បាប់ដែរ។ នេះជាការលើកឡើងរបស់សម្ដេច ស ខេង រដ្ឋមន្ត្រីក្រសួងមហាផ្ទៃ នៅចំពោះមុខបណ្ដាប្រទេសអន្តរជាតិ នៅជុំវិញពិភពលោក ក្នុងសន្និសីទស្តីពីការជួញដូរសត្វព្រៃខុសច្បាប់លើកទី៤ នៅទីក្រុងប្រទេសអង់គ្លេស។
សម្ដេច ស ខេង បានប្រាប់ថ្នាក់ដឹកនាំអន្តរជាតិទាំងនោះថា កម្ពុជា គឺជាប្រទេសដែលសំបូរទៅដោយធនធានធម្មជាតិ និងសំបូរវប្បធម៌ ដ៏មានតម្លៃឥតគណនា ដែលមានធនធានរ៉ែ ព្រៃឈើ សត្វចម្រុះគ្រប់ប្រភេទ នៅតាមតំបន់ខ្ពង់រាបកម្ពុជា។ បន្ទាប់ពីលើកចំណុចទាំងនេះហើយ សម្ដេច ស ខេង ក៏បានបញ្ជាក់ថា កម្ពុជា គឺជាប្រទេសដែលប្រឆាំងនឹងការជួញដូរសត្វព្រៃខុសច្បាប់ ប៉ុន្តែក៏ស្ថិតនៅក្នុងចំណោមប្រទេសរងគ្រោះ ដោយសារឈ្មួញដឹកជញ្ជូនឆ្លងកាត់ខុសច្បាប់ ទៅកាន់ប្រទេសទី៣ផងដែរ។
ថ្លែងក្នុងសន្និសីទស្តីពីការជួញដូរសត្វព្រៃខុសច្បាប់លើកទី៤ នៅទីក្រុងប្រទេសអង់គ្លេស រដ្ឋមន្ត្រីក្រសួងមហាផ្ទៃ បានបកស្រាយដូច្នេះថា៖«កម្ពុជា មិនមែនជាប្រទេសដែលអនុញ្ញាតឲ្យមានការជួញដូរផលិតផលសត្វព្រៃស្របច្បាប់នោះទេ ហើយក៏មិនមែនជាប្រទេស ដែលមានតម្រូវការសត្វព្រៃសម្រាប់ប្រើប្រាស់ក្នុងជីវភាពប្រចាំថ្ងៃនោះដែរ។ ប៉ុន្តែការវិវដ្ដនៃសភាពការណ៍សាកលលោកក្នុងពេលបច្ចុប្បន្ននេះ ក៏បានជំរុញឲ្យកម្ពុជា ជាប្រទេសដែលឆ្លងកាត់នូវឧក្រិដ្ឋកម្ម ឧក្រិដ្ឋជនក្នុងការដឹកជញ្ជូន នៃការចរាចរណ៍ផលិតផលសត្វព្រៃខុសច្បាប់ ទៅដល់គោលដៅប្រទេសទី៣»។
រយៈប៉ុន្មានឆ្នាំចុងក្រោយនេះ អាជ្ញាធរកម្ពុជា បានបង្ក្រាប និងបំបែកករណីដឹកជញ្ជូនសត្វព្រៃខុសច្បាប់មួយចំនួនធំ តាមរយៈការសហការជាមួយដៃគូរពាក់ព័ន្ធ និងបណ្ដាសមាជិកប្រឆាំងប្រយុទ្ធសត្វព្រៃ។ នេះជាការបញ្ជាក់របស់សម្ដេច ស ខេង។
បើតាមសម្ដេច ស ខេង បទល្មើសជួញដូរសត្វព្រៃខុសច្បាប់មិនត្រឹមតែនាំមកនូវមហន្តរាយ ដល់និរន្តរភាពបរិស្ថាន និងធនធានធម្មជាតិនៃភពផែនដីប៉ុណ្ណោះទេ ប៉ុន្តែថវិកាដែលទទួលបានពីការប្រព្រឹត្តបទល្មើសនេះ អាចបង្កើតបញ្ហាពាក់ព័ន្ធជាច្រើនទៀតក្នុងសង្គម និងសកលលោក ដូចជា ការសម្អាតប្រាក់ អំពើភេរវកម្ម ការជួញដូរមនុស្ស ការជួញដូរគ្រឿងញៀន ការជួញដូរអាវុធខុសច្បាប់ជាដើម។
ដើម្បីបង្ហាញពីជំហររឹងមាំ ក្នុងការប្រយុទ្ធប្រឆាំងការជួញដូរសត្វព្រៃនេះ រដ្ឋមន្ត្រីក្រសួងមហាផ្ទៃ លើកយកគោលការណ៍ និងវិធានការសំខាន់ៗមួយចំនួន ដែលរាជរដ្ឋាភិបាលកម្ពុជា បន្តអនុវត្តនោះរួមមាន៖ ទី១៖ ការធ្វើវិសោធនកម្ម និងការបង្កើតលិខិតបទដ្ឋានគតិយុត្តថ្មីៗ បន្ថែមតាមការចាំបាច់ ដើម្បីបម្រើដល់ការរៀបចំគោលនយោបាយគាំពារ និងការគ្រប់គ្រង ថែរក្សា អភិរក្សសត្វព្រៃ ឲ្យកាន់តែទទួលបានប្រសិទ្ធភាពខ្ពស់ ។
ទី២៖ បន្តពង្រឹងការអនុវត្តន៍ច្បាប់ឲ្យកាន់តែតឹងរឹង តាមរយៈការរឹតបន្តឹងការដាក់ទោសទណ្ឌ ឬការផ្តន្ទាទោស ចំពោះសកម្មភាពល្មើសច្បាប់ ពាក់ព័ន្ធនឹងការជួញដូរសត្វព្រៃខុសច្បាប់។ ទី៣៖ សហការជាមួយសមាសភាពពាក់ព័ន្ធទាំងនៅថ្នាក់ជាតិ និងអន្តរជាតិព្រមទាំង ស្ថាប័នរដ្ឋាភិបាល គ្រឹះស្ថានឯកជន អង្គការសង្គមស៊ីវិល ដៃគូពាក់ព័ន្ធជាតិ-អន្តរជាតិ ដើម្បីចូលរួមអនុវត្ត និងប្រមូលផ្តុំការគាំទ្រក្នុងសកម្មភាពប្រយុទ្ធប្រឆាំងការជួញដូរសត្វព្រៃខុសច្បាប់នៅកម្ពុជា ក្នុងតំបន់ និងសកលលោក។ ជាពិសេសបន្តផ្សព្វផ្សាយបង្កើនការយល់ដឹង តាមរយៈការអប់រំណែនាំសាធារណជនទូទៅឲ្យយល់ដឹងអំពី តម្លៃ និងសារៈសំខាន់នៃធនធានធម្មជាតិ និងសត្វព្រៃ ដែលជាសមាសធាតុដ៏ចាំបាច់នៃប្រព័ន្ធអេកូឡូហ្ស៊ីជាដើម៕
© រក្សាសិទ្ធិដោយ thmeythmey.com