អន្តរជាតិ
នាយករដ្ឋមន្ត្រីជប៉ុន សន្យាជួយលោកស្រី ស៊ូជី រកដំណោះស្រាយវិបត្តិជនភៀសខ្លួនរ៉ូហ៊ីងយ៉ា
× រដ្ឋាភិបាលក្រុងតូក្យូ បានប្តេជ្ញាជាថ្មីក្នុងការជ្រោមជ្រែង និងឧបត្ថម្ភដល់ជនភៀសដែលកំពុងស្នាក់នៅក្នុងទឹកដីបង់ក្លាដែស រួមទាំងសហការជាមួយរដ្ឋាភិបាលក្រុងណៃពិដោរគិតគូររកដំណោះស្រាយសមរម្យសម្រាប់វិបត្តិជនភៀសខ្លួនរ៉ូហ៊ីងយ៉ានេះផង។ ការប្តេជ្ញានេះ ធ្វើឡើងស្របពេលមីយ៉ាន់ម៉ា កំពុងតែទទួលរងសម្ពាធកាន់តែធ្ងន់ពីសហគមន៍អន្តរជាតិ។
តាមរយៈជំនួបទ្វេភាគីនៅក្នុងរដ្ឋធានីតូក្យូនៅថ្ងៃ៩ ខែតុលា លោកនាយករដ្ឋមន្ត្រីជប៉ុន ស៊ីនហ្សូ អាបេ នៅចំពោះមុខ លោកស្រីទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី បានទទួលស្គាល់ថា បញ្ហានៅក្នុងរដ្ឋ រ៉ាក់ខាន (Rakhine) ដែលជាកន្លែងនៃវិបត្តិជនភៀសខ្លួន គឺជាបញ្ហាដ៏ស្មុគស្មាញបំផុត។ លោក ក៏បានសន្យាបន្តគាំទ្រមីយ៉ាន់ម៉ាក្នុងការធ្វើឲ្យការរៀបចំនៃការវិលត្រឡប់របស់ជនភៀសខ្លួនកើតឡើងយ៉ាងពិតប្រាកដដែរ។
តាមការចុះផ្សាយរបស់សារព័ត៌មាន Myanmar Times នាយករដ្ឋមន្ត្រីខាងលើក៏បានសន្យាជួយមីយ៉ាន់ម៉ាក្នុងការបង្កើតបរិយាកាសមួយល្អសម្រាប់ជនជាតិភាគតិចមូស្លីម និង រាប់បញ្ចូលទាំងការសាងសង់ផ្ទះសម្រាប់ពួកគេផងដែរ។ ពិសេសនោះ លោកនាយករដ្ឋមន្ត្រីជប៉ុនរូបនេះ ក៏ថែមទាំងអះអាងថា ជប៉ុន ក៏នឹងជួយគិតគូរមីយ៉ាន់ម៉ាដើម្បីរកដំណោះស្រាយទៀតផង។
អ្វីដែលគួរឲ្យកត់សម្គាលនោះ ការសន្យាជួយមីយ៉ាន់ម៉ារបស់រដ្ឋាភិបាលជប៉ុន ក្នុងកាលៈទេសនេះ គឺជារឿងដែលសំខាន់ណាស់សម្រាប់រដ្ឋាភិបាលមីយ៉ាន់ម៉ា។ នោះ ក៏ព្រោះតែមានប្រទេសមិនច្រើនពេកទេ ដែលឈរនៅខាងមីយ៉ាន់ម៉ា នៅពេលដែលនិយាយដល់វិបត្តិជនភៀសខ្លួនរ៉ូហ៊ីងយ៉ានោះ។ សូម្បីតែបណ្តាប្រទេសមួយចំនួននៃគ្រួសារអាស៊ាន ក៏មិនសូវចង់ទទួលយកហេតុផលឬសគល់នៃវិបត្តិដែលពន្យល់ដោយមីយ៉ាន់ម៉ាដែរ។
គួរជម្រាបថា វិបត្តិជនភៀសខ្លួននៅក្នុងរដ្ឋរ៉ាក់ខានរបស់មីយ៉ាន់ម៉ា បានផ្ទុះឡើងខ្លាំងនៅចុងឆ្នាំ២០១៧។ ព្រឹត្តិការណ៍ ដែលរដ្ឋាភិបាលមីយ៉ាន់ម៉ា ពន្យល់ថា កើតឡើងដោយសារប្រតិបត្តិការវាយបក និងបោសសម្អាតក្រុមឧទ្ទាមប្រដាប់វុធរបស់អាជ្ញាធរមីយ៉ាន់ម៉ានេះ ដែលបានបង្កឲ្យជនជាតិភាគតិចមូស្លីមរ៉ូហ៊ីងយ៉ាប្រមាណ៧០ម៉ឺនក់ភៀសខ្លួនទៅកាន់ប្រទេសបង់ក្លាដែស។
ទោះរដ្ឋាភិបាលមីយ៉ាន់ម៉ា ព្យាយាមពន្យល់បែបនេះក្តី របាយការណ៍របស់ភ្នាក់ជំនាញសិទ្ធិមនុស្ស រួមទាំងអង្គការសហប្រជាជាតិ បានរកឃើញផ្ទុយពីការលើកឡើងនេះ ពោលគឺពួកគេរកឃើញពីចេតនា និងសញ្ញាណនៃការប្រព្រឹត្តបទល្មើសប្រល័យពូជសាសន៍ប្រឆាំងជនជាតិភាគតិចរ៉ូហ៊ីងយ៉ា។
ក៏ដោយតែបញ្ហានេះ បន្ថែមលើការធ្វើសេចក្តីថ្លែងការណ៍ថ្កោលទោស សហភាពអឺរ៉ុប ដែលជាទីផ្សារធំមួយរបស់មីយ៉ាន់ម៉ា បានចេញសេចក្តីថ្លែងការណ៍ជាផ្លូវការក្នុងការព្រមានដាក់ទណ្ឌកម្មមីយ៉ាន់ម៉ា ពាក់ព័ន្ធនឹងលក្ខខណ្ឌអនុគ្រោះពន្ធក្នុងការនាំចូលទៅកាន់ទីផ្សារអឺរ៉ុបទៀតផងថ្មីៗនេះ៕
Tag:
មីយ៉ាន់ម៉ា
ជប៉ុន
អ៊ុងសាន ស៊ូជី
ស៊ីហ្សូ អាបេ
© រក្សាសិទ្ធិដោយ thmeythmey.com