ជាតិ
សម្តេច ហ៊ុន សែន ទៅចូលរួមកិច្ចប្រជុំកំពូលអាស៊ី-អឺរ៉ុបលើកទី១២ នៅប៊ែលហ្ស៊ិកនាសប្តាហ៍ក្រោយ
×![]()
ដោយ: ថ្មីៗ
ភ្នំពេញ៖ សម្តេច ហ៊ុន សែន នឹងដឹកនាំប្រតិភូជាន់ខ្ពស់ទៅចូលរួម កិច្ចប្រជុំកំពូលអាស៊ី-អឺរ៉ុប (ASEM)លើកទី១២ ដែលរៀបចំនៅទីក្រុងប្រ៊ុចសែល ប្រទេសប៊ែលហ្ស៊ិក ពីថ្ងៃទី១៨-១៩ ខែតុលា ។ សេចក្តីប្រកាសព័ត៌មានរបស់ក្រសួងការបរទេសកម្ពុជា ចេញផ្សាយនៅថ្ងៃទី១៤ ខែតុលានេះ បានឲ្យដឹងដូច្នេះ។ 
តាមសេចក្តីប្រកាសព័ត៌មានដដែល កិច្ចប្រជុំកំពូលអាស៊ី-អឺរ៉ុប(ASEM) លើកទី១២ នឹងប្រព្រឹត្តទៅក្រោមមូលបទ«អឺរ៉ុប និងអាស៊ី៖ ដៃគូសកលសម្រាប់បញ្ហាប្រឈមសកល» ក្នុងបំណងពង្រឹងកិច្ចសន្ទនា និងកិច្ចសហប្រតិបត្តិការរវាងតំបន់អាស៊ី និងអឺរ៉ុប ខណៈពេលដែលតំបន់ទាំងពីរជំរុញកសាងកម្លាំងរួមគ្នា ដោះស្រាយបញ្ហាជាច្រើន ចាប់ពីការបង្កើនពាណិជ្ជកម្ម និងវិនិយោគ ការតភ្ជាប់ ការអភិវឌ្ឍប្រកបដោយចីរភាព និងបម្រែបម្រួលអាកាសធាតុជាដើម។
សេចក្តីប្រកាសព័ត៌មាន បាន្យដឹងទៀតថា សម្តេចហ៊ុន សែន នឹងថ្លែងបទអន្តរាគមន៍ដោយផ្តោតលើប្រធានបទ«របៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាព និងកំណើនសេដ្ឋកិច្ចប្រកបដោយចីរភាព និងបរិយាប័ន្ន» នៅក្នុងសម័យប្រជុំពេញអង្គផងដែរ។
ក្នុងពេលស្នាក់នៅប្រទេសបែលហ្ស៊ិក សម្តេចនាយករដ្ឋមន្ត្រីកម្ពុជា នឹងមានជំនួបទ្វេភាគីដាច់ដោយឡែកពីគ្នា ជាមួយសមភាគីលោក Dmitry Medvedev នាយករដ្ឋមន្ត្រីរុស្ស៊ី,លោក Viktor Orbán នាយករដ្ឋមន្ត្រីនៃប្រទេសហុងហ្គ្រី, លោកស្រី Erna Solberg នាយករដ្ឋមន្ត្រីន័រវេស, លោក Andrej BabiŠ នាយករដ្ឋមន្ត្រីនៃប្រទេសឆែក និងថ្នាក់ដឹកនាំគណៈប្រតិភូដទៃទៀត។ នេះបើតាមសេចក្តីប្រកាសព័ត៌មាន ដោយបានបន្តទៀតថា សម្តេច ហ៊ុន សែន ក៏នឹងជួបសំណេះសំណាលជាមួយសមាជិកសហគមន៍ខ្មែរ និងសិស្ស និស្សិតខ្មែរ ដែលកំពុងរស់នៅ និងសិក្សានៅប្រទេសបែលហ្ស៊ិកផងដែរ៕
Tag:
ហ៊ុន សែន
© រក្សាសិទ្ធិដោយ thmeythmey.com
