ជាតិ
កម្ពុជា រៀបចំខួប៦ឆ្នាំនៃការសោយទិវង្គតរបស់ព្រះបរមរតនកោដ្ឋ
× ភ្នំពេញ៖ នៅថ្ងៃទី ១៥ តុលានេះ កម្ពុជានឹងប្រារព្ធខួប៦ឆ្នាំ នៃការយាងសោយទិវង្គត់របស់ ព្រះករុណា ព្រះបាទ សម្តេច ព្រះនរោត្តម ស៊ីហនុ ព្រះបរមរតនកោដ្ឋ។ ពិធីគោរពព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ នឹងប្រព្រឹត្តទៅចាប់ពីម៉ោង៧កន្លះព្រឹកតទៅ នាសួនច្បារខាងកើតវិមានឯករាជ្យ។
នៅក្នុងថ្ងៃប្រារព្ធខួប៦ឆ្នាំនេះ គណៈកម្មាធិការជាតិរៀបចំបុណ្យជាតិ អន្តរជាតិ បានដាក់ចេញនូវផែនការណែនាំមួយចំនួនទាក់ទងនឹងការរៀបចំពិធីគោរពព្រះវិញ្ញាណក្ខន្ធ ព្រះករុណា«ព្រះបរមរតនកោដ្ឋ»។
បើតាមផែនការណែនាំ ក្រសួងព្រះបរមរាជវាំង ត្រូវរៀបចំពិធីគោរពព្រះវិញ្ញាណក្ខន្ធ ព្រះករុណា «ព្រះបរមរតនកោដ្ឋ» តាមប្រពៃណីជាតិសាសនា។ ចំណែកនៅតាមវត្តអារាមនានា ត្រូវរៀបចំពិធីគោរព និងឧទ្ទិសថ្វាយព្រះរាជកុសលដល់ព្រះវិញ្ញាណក្ខន្ធ «ព្រះបរមរតនកោដ្ឋ» និងដាក់តាំងព្រះបរមឆាយាល័ក្ខណ៍ព្រះករុណាផងដែរ។
ជាមួយគ្នានេះគណៈកម្មាធិការជាតិរៀបចំបុណ្យជាតិ អន្តរជាតិ បានណែនាំដល់គ្រប់ក្រសួង រដ្ឋលេខាធិការដ្ឋាន ស្ថាប័ន និងរដ្ឋបាលរាជធានីភ្នំពេញ-ខេត្ត ត្រូវដាក់តាំងព្រះបរមឆាយាល័ក្ខណ៍ ព្រះករុណា«ព្រះបរមរតនកោដ្ឋ»ដោយប្រើព្រះបរមឆាយាល័ក្ខណ៍ថ្មីមិនស្លក់ពណ៌ បំភ្លឺភ្លើងពណ៌ និងតុបតែងលម្អទង់ជាតិឲ្យបានសមរម្យ។
ដោយឡែកគណៈកម្មាធិការជាតិរៀបចំបុណ្យជាតិ អន្តរជាតិ បានណែនាំដល់ក្រសួងព័ត៌មាន ថាត្រូវមានរៀបចំកម្មវិធីផ្សព្វផ្សាយឲ្យបានទូលំទូលាយតាមវិទ្យុ ទូរទស្សន៍ជាតិ ឯកជនអំពីព្រះរាជជីវប្រវត្តិ ព្រះរាជសកម្មភាព និងស្នាព្រះហស្តរបស់ព្រះករុណា «ព្រះបរមរតនកោដ្ឋ»។
គណៈកម្មាធិការជាតិរៀបចំបុណ្យជាតិ អន្តរជាតិ ក៏បានប្រាប់ដល់ក្រសួងការបរទេស និងសហប្រតិបត្តិការអន្តរជាតិ ឲ្យណែនាំគ្រប់ស្ថាន អគ្គរាជទូត និងស្ថានកុងស៊ុលកម្ពុជាប្រចាំនៅក្រៅប្រទេសប្រារព្ធពិធីគោរពព្រះវិញ្ញាណក្ខន្ធ ព្រះករុណា «ព្រះបរមរតនកោដ្ឋ» ឲ្យបានសមរម្យដែរ។
សូមបញ្ជាក់ថា ព្រះករុណា ព្រះបាទ សម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះអង្គបានយាងចូលព្រះទិវង្គត នៅថ្ងៃទី១៥ ខែតុលា ឆ្នាំ២០១២ ក្នុងព្រះជន្ម ៩០ព្រះវស្សា ដោយទទួលព្រះបរមបច្ឆាមរណនាម «ព្រះបរមរតនកោដ្ឋ»៕
Tag:
ព្រះបរមរតនកោដ្ឋ
ខួប៦ឆ្នាំ
© រក្សាសិទ្ធិដោយ thmeythmey.com