អន្តរជាតិ
ទោះមានបញ្ហាច្រើនមិនចេះចប់ លោក ត្រាំ ថា មានក្ដីសុខក្នុងតំណែងជាប្រធានាធិបតីអាមេរិក រូបភាព AFP
× កាន់តំណែងប្រធានាធិបតីអាមេរិកបានជិតពីរឆ្នាំ លោក ដូណាល់ ត្រាំ បានប្រឈមមុខសមរភូមិនយោបាយជាច្រើនដូចជាការគោលនយោបាយអន្តោប្រវេសន៍ ការដំឡើងពន្ធក្នុងជម្លោះពាណិជ្ជកម្មជាមួយចិន និងការប្រឆាំងបេក្ខភាពចៅក្រមតុលាការកំពូលរបស់លោកជាដើម។ ទោះជាមានព្យុះនយោបាយបោកបក់ជាបន្តបន្ទាប់ក្ដី លោក ត្រាំ អះអាងថា លោកមានក្ដីសុខក្នុងតំណែងជាប្រធានាធិបតីរបស់អាមេរិក ខណៈលោកបានរៀនសូត្រច្រើនពីការងារក្នុងរយៈពេលនេះផង។
មានប្រវត្តិជាអ្នកជំនួញអចលនទ្រព្យ និងគ្មានបទពិសោធផ្នែកនយោបាយ លោក ដូណាល់ ត្រាំ បែរជាឈ្នះការបោះឆ្នោតប្រធានាធិបតីទៅវិញ។ ក្នុងកិច្ចសម្ភាសជាមួយទូរទស្សន៍ CBS ដែលផ្សាយនៅថ្ងៃទី១៤ ខែតុលា លោក ត្រាំ ផ្ទាល់ក៏ចាត់ទុកជារឿងចម្លែកបន្តិចដែលពេលនិយាយថា លោកជាប្រធានាធិបតីអាមេរិក ហើយលោកគិតថា មនុស្សរាល់គ្នាក៏មានគំនិតបែបនេះដែរ។
ជ័យជម្នះរបស់លោក ត្រាំ លើអ្នកនយោបាយជើងខ្លាំង ហ៊ីឡារី គ្លីនតុន ពិតជាធ្វើឲ្យពិភពលោកទាំងមូលភ្ញាក់មិនតិចឡើយ។ ទោះមានបទពិសោធច្រើនផ្នែកជំនួញមែន លោក ត្រាំ ទទួលស្គាល់ថា ចាត់ចែងបរិយាកាសនយោបាយនៅវ៉ាស៊ីនតោនពិតជាស្មុគស្មាញជាងពិភពជំនួញទៅទៀត។ លោកប្រាប់ទូរទស្សន៍ CBS ថា វ៉ាស៊ីនតោនជាកន្លែងកាចសាហាវ ដែលពេញដោយការវាយប្រហារគ្នា ការចូលចិត្តនិយាយអាក្រក់ពីគ្នា និងការចាក់ពីក្រោយខ្នង ប៉ុន្តែលោកមានក្ដីសុខនៅទីនោះ។
កាន់កាប់សេតវិមានបានជិតពីរឆ្នាំមកហើយនោះ លោក ត្រាំ ដែលជាអ្នកជំនួញប្រាក់វាល់លានដុល្លារ បានរៀនច្រើន ដែលធ្វើឲ្យលោកមានដូចជាប្រធានាធិបតីមែនទែនទៅហើយ។ ជិតពីរឆ្នាំនេះ ប្រធានាធិបតីអាមេរិកទី៤៥ រូបនេះ ជួបបញ្ហាប្រទាំងប្រទើសជាច្រើនមុខលើគោលនយោបាយរដ្ឋាភិបាលរបស់លោក។ លោក ត្រាំ ត្រូវគេរិះគន់កប់មាត់លើនយោបាយអន្តោប្រវេសន៍របស់ខ្លួនដូចជាការរឹតត្បិតការធ្វើដំណើររបស់ជនមូស្លីម ការបំបែកម្ដាយនិងកូនដែលឆ្លងដែនខុសច្បាប់ជាដើម។
ងាកទៅរឿងពាណិជ្ជកម្មវិញ លោក ត្រាំ បានផ្លាស់គោលនយោបាយអាមេរិកស្ទើរទាំងស្រុង អនុវត្តនយោបាយគាំពារនិយម និងគិតតែប្រយោជន៍ខ្លាំងជាងគេបង្អស់។ លោកបានបង្កើតជម្លោះពាណិជ្ជកម្មដ៏អាក្រក់ជាមួយចិន ដែលគេឯងបារម្ភពីហានិភ័យនៃការរាលដាលជម្លោះនៅទូទាំងពិភពលោក។ មកទល់សព្វថ្ងៃ មហាអំណាចពិភពលោកទាំងពីរ បានដំឡើងពន្ធលើផលិតផលគ្នាទៅវិញទៅមកក្នុងទំហំប្រាក់រាប់ពាន់ដុល្លារ។
សំណុំរឿងអាស្រូវផ្លូវភេទរបស់លោក Brett Kavanaugh ជាបញ្ហានយោបាយចុងក្រោយរបស់លោក ត្រាំ ទម្រាំអាចឆ្លងផុត។ លោក ត្រាំ បានជ្រើសរើសលោក Kavanaugh ឲ្យធ្វើជាចៅក្រមថ្មីនៅតុលាការកំពូលអាមេរិក តែលោករងការចោទថា បំពានផ្លូវភេទស្ត្រីម្នាក់កាលពីអំឡុងទសវត្សរ៍១៩៨០ ។ យ៉ាងណាក្ដី ព្រឹទ្ធសភាអាមេរិកដែលកាន់កាប់សំឡេងភាគច្រើន បានយល់ព្រមលើបេក្ខភាពរបស់លោក Kavanaugh ដដែល៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com