អន្តរជាតិ
ចិនថា ខ្លួនគ្មានជម្រើសអ្វីផ្សេង ក្រៅពីប្រឆាំងតបអាមេរិកវិញក្នុងសង្គ្រាមពាណិជ្ជកម្មឡើយ អគ្គរដ្ឋទូតចិនប្រចាំអាមេរិក Cui Tiankai (រូបភាព AFP)
× អគ្គរដ្ឋទូតចិនប្រចាំសហរដ្ឋអាមេរិកបានថ្លែងថា ក្រុងប៉េកាំងគ្មានជម្រើសអ្វីផ្សេងនោះទេ ក្រៅពីការប្រឆាំងតបនឹងសង្គ្រាមពាណិជ្ជកម្ម ដែលក្រុងវ៉ាស៊ីនតោនបានចាប់ផ្តើម។ ការលើកឡើងរបស់ប្រមុខការទូតចិនរូបនេះបានធ្វើឡើង អំឡុងពេលតានតឹងកាន់តែកាន់ឡើងខ្លាំងទៅៗទាំងផ្នែកសេដ្ឋកិច្ច និងនយោបាយរវាងមហាអំណាចពិភពលោកទាំងពីរនេះ។
«យើងមិនចង់បានសង្គ្រាមពាណិជ្ជកម្មនោះទេ ប៉ុន្តែប្រសិនបើអ្នកណាបានចាប់ផ្តើមសង្គ្រាមពាណិជ្ជកម្មប្រឆាំងនឹងយើងនោះ យើងត្រូវតែប្រឆាំងតបវិញ និងការពារផលប្រយោជន៍ផ្ទាល់ខ្លួនរបស់យើងជាដាច់ខាត»។ នេះជាការអះអាងរបស់លោក Cui Tiankai នៅក្នុងបទសម្ភាសដ៏កម្រមួយលើកញ្ចក់ទូរទស្សន៍ Fox News កាលពីថ្ងៃទី ១៤ ខែតុលា។
ឆ្លើយតបនឹងសំណួរថាតើលោកប្រាកដទេអ្នកណាជាអ្នកបង្កើតការសម្រេចចិត្តចំពោះបញ្ហាពាណិជ្ជកម្មក្នុងរដ្ឋបាលលោកដូណាល់ ត្រាំ លោក Cui បាននិយាយថា៖ «បើពិតទៅខ្ញុំក៏ធ្លាប់បាននិយាយទៅកាន់បណ្តាទូតនៃប្រទេសដ៏ទៃទៀតក្នុងរដ្ឋធានីវ៉ាស៊ីនតោនផងដែរ ហើយពួកគេបានអះអាងថា សំណួរនេះក៏ជាកង្វល់របស់ពួកគេផងដែរ»។
លោកបន្ត៖ «ពួកគេមិនដឹងទេថាអ្នកណាដែលជាអ្នកសម្រេចចិត្តចុងក្រោយបង្អស់នោះទេ។ ជាក់ស្តែងប្រធានាធិបតីទំនងជាអ្នកសម្រេចចិត្តចុងក្រោយ ប៉ុន្តែអ្នកណាជាអ្នកកាន់តួនាទីអ្វីនោះ? ពេលខ្លះវាអាចនឹងបង្កើតការភាន់ច្រឡំ»។
ទន្ទឹមនឹងនេះ លោក Cui ក៏បានយកពេលវេលានេះ ច្រានចោលការលើកឡើងរបស់អនុប្រធានាធិបតីអាមេរិក លោក ម៉ៃ ផេន ដែលបានចោទថា ចិនបានព្យាយាមជ្រែតជ្រៀកកិច្ចការផ្ទៃក្នុងអាមេរិក។ ត្រង់នេះ លោក Cui បានអះអាងថា ការចោទប្រកាន់របស់លោក Pence គឺ «គ្មានមូលដ្ឋាន» ច្បាស់លាស់នោះឡើយ។
គួររម្លឹកថា លោក Pence កាលពីថ្ងៃទី០៤ ខែតុលាកន្លងទៅ បានចោទប្រកាន់ថា ក្រុងប៉េកាំងបានបង្កើតមធ្យោបាយដើម្បីមានឥទ្ធិពលលើមតិសាធារណៈរបស់ប្រជាជនអាមេរិក។ មធ្យោបាយទាំងនោះគឺរួមមាន អំពើចារកម្ម, ដំឡើងពន្ធ, វិធានការគំរាមកំហែង និងយុទ្ធនាការផ្សព្វផ្សាយគោលនយោបាយជាដើម៕
Tag:
ចិន
សហរដ្ឋអាមេរិក
សង្គ្រាមពាណិជ្ជកម្ម
© រក្សាសិទ្ធិដោយ thmeythmey.com