ជាតិ
អ្នកនាំពាក្យCPP៖ ការអនុញ្ញាតឲ្យលោក សម រង្ស៊ី ចូលប្រជុំ IPU គឺជាការរំលោភប្រជាធិបតេយ្យកម្ពុជា
× ភ្នំពេញ៖ គណបក្សប្រជាជនកម្ពុជា រិះគន់ចំពោះការអនុញ្ញាត្តឲ្យលោក សម រង្ស៊ី មានវត្តមាននៅក្នុងកិច្ចប្រជុំសហភាពអន្តរសភា ដែលបានបើកមហាសន្និបាតលើកទី១៣៩ នៅទីក្រុងហ្សឺណែវ ប្រទេសស្វីស។ បក្សប្រជាជនកម្ពជា ចាត់ទុកការទុកកៅអីសម្រាប់លោក សម រង្ស៊ី អង្គុយនៅក្នុងកិច្ចប្រជុំនេះ គឺជាការបំពានលើអធិបតេយ្យភាពកម្ពុជា។
វត្តមានលោក សម រង្ស៊ី មេដឹកនាំអតីតគណបក្សសង្គ្រោះជាតិ នៅក្នុងកិច្ចប្រជុំសហភាពអន្តរសភា ដែលកំពុងដំណើរការនេះ បានធ្វើឲ្យគណបក្សកាន់អំណាច មិនសប្បាយចិត្តឡើយ ។ ពួកគេ យល់ឃើញថា លោក សម រង្ស៊ី មិនសាកសមអង្គុយនៅក្នុងកិច្ចប្រជុំនេះទេ។ ត្រង់ចំណុចនេះលោក សុខ ឥសាន អ្នកនាំពាក្យគណបក្សប្រជាជន បាននិយាយថា លោក សម រង្សី មិនមែនជាតំណាងប្រជាជនកម្ពុជាទៀតទេ ដូច្នេះគ្មានតួនាទីអ្វី ដែលត្រូវចូលប្រជុំនៅលើវេទិកានានា ជាថ្នាក់អន្តរជាតិឡើយ។
លោក សុខ ឥសាន លើកឡើងបែបនេះហើយ ក៏បន្តរិះគន់ដោយប្រយោលចំពោះអ្នករៀបចំកិច្ចប្រជុំសហភាពអន្តរសភាថា កំពុងរំលោភឯករាជ្យកម្ពុជា ក្នុងការផ្ដល់កៅអីសម្រាប់លោក សម រង្ស៊ី អង្គុយនៅក្នុងវេទិកាអន្តរជាតិនេះ។ អ្នកនាំពាក្យគណបក្សប្រជាជនរូបនេះ បានសរសេរលើបណ្ដាញតេឡេក្រាមដូច្នេះថា៖«ការដែលមានអ្នកអនុញ្ញាតឲ្យ សម រង្សី ចូលប្រជុំនៅក្នុងវេទិកាសហភាពអន្តរសភា គឺជាការរំលោភសិទ្ធិប្រជាធិបតេយ្យរបស់ប្រជាជនកម្ពុជា និងគឺជាការបំពានលើឯករាជ្យនិងអធិបតេយ្យភាពជាតិកម្ពុជាយ៉ាងងងើល ព្រមទាំងរំលោភច្បាប់អន្តរជាតិ ដែលប្រធានប្រជុំសហភាពអន្តរសភា ត្រូវទទួលខុសត្រូវទាំងស្រុងលើតួនាទីលំអៀងនយោបាយរបស់ខ្លួន ដោយគ្មានការខ្មាស់អៀន»។
ជាមួយគ្នានេះគណប្រតិភូសភាកម្ពុជា ក៏នឹងតវ៉ាទៅប្រធានសហភាពអន្តរសភា ចំពោះការអនុញ្ញាតឲ្យលោក សម រង្ស៊ី ចូលរួមវេទិកានេះផងដែរ។«គណបក្សប្រជាជនកម្ពុជាសូមគាំទ្រយ៉ាងពេញទំហឹងចំពោះការតវ៉ាដ៏ម៉ឹងម៉ាត់របស់គណប្រតិភូសភាកម្ពុជា ដែលបានទៅចូលរួមប្រជុំជាផ្លូវការក្នុងអង្គប្រជុំ IPU ក្នុងនាមជាតំណាងស្របច្បាប់របស់ប្រជាជនកម្ពុជា ។ហើយសូមថ្កោលទោសយ៉ាងដាច់អហង្ការចំពោះអាកប្បកិរិយាល្មើសច្បាប់របស់ជនលំអៀងខាងនយោបាយនិងមនោគមន៏វិជ្ជាអន្តរជាតិ»។នេះជាការបញ្ជាក់របស់លោក សុខ ឥសាន។
លោក សម រង្ស៊ី បានបញ្ជាក់ថា លោកជួបមេដឹកនាំ សភា IPU ដើម្បីបង្ហាញប្រាប់គេពីស្ថានការណ៍ប្រទេសកម្ពុជា និង ប្រាប់គេពីករណីតំណាងរាស្ត្រកម្ពុជា ដែលសិទ្ធិរបស់ពួកគេ ត្រូវបានរំលោភ ដោយរដ្ឋាភិបាលកម្ពុជា ។ លោក សម រង្ស៊ី ហាក់មិនចាប់អារម្មណ៍នឹងការតវ៉ារបស់ប្រតិភូកម្ពុជាទៅIPUដែរ ដោយលោក បញ្ជាក់ថា IPU មានសិទ្ធិអំណាចក្នុងការសម្រេច ដូច្នេះគ្មានអ្នកណាមកបង្គាប់បញ្ជាបានឡើយ។ នេះការបើតាមការចុះផ្សាយរបស់វិទ្យុបារាំងអន្តរជាតិ RFI។
សហភាពអន្តរសភា បានបើកមហាសន្និបាតលើកទី១៣៩ នៅទីក្រុងហ្សឺណែវ ប្រទេសស្វីស ចាប់ពីថ្ងៃទី១២ ដល់ថ្ងៃទី២០ ខែតុលា ឆ្នាំ២០១៨។ លោកស្រី ឃួន សុដារី អនុប្រធានទី២រដ្ឋសភាកម្ពុជា តំណាង្យសភាកម្ពុជា បានដឹកនាំគណៈប្រតិភូចូលរួមមហាសន្និបាតនេះ តបតាមការអញ្ជើញរបស់ លោកស្រី ហ្គាប្រីឡា គូវ៉ាស បារ៉ុន (Gabriela Cuevas Barron) ប្រធានសហភាពអន្តរសភា (IPU)៕
© រក្សាសិទ្ធិដោយ thmeythmey.com