អន្តរជាតិ
អាមេរិកស្នើឲ្យក្រុមប្រឹក្សាសន្តិសុខ UN បើកប្រជុំស្តាប់រឿងរំលោភសិទ្ធិមនុស្សធ្ងន់ធ្ងរនៅមីយ៉ាន់ម៉ា
×![]()
ដោយ: ថ្មីៗ
សហរដ្ឋអាមេរិក និងប្រទេសចំនួនប្រាំបីផ្សេងទៀតជាមិត្តបានស្នើឲ្យក្រុមប្រឹក្សាសន្តិសុខអង្គការសហប្រជាជាតិជួបប្រជុំគ្នាដើម្បីស្តាប់យោបល់របស់គណៈកម្មការស្វែងរកការពិតដែលបានចោទប្រកាន់យោធាមីយ៉ាន់ម៉ារឿងបទឧក្រិដ្ឋប្រឆាំងជនជាតិភាគតិចមូស្លីមរ៉ូហ៊ីងយ៉ា។ មហាយក្សចិនដែលជាខ្នងបង្អែករបស់របបដឹកនាំមីយ៉ាន់ម៉ាទំនងជាជំទាស់ការស្នើសុំនេះ។
ប្រទេសដែលចូលរួមជាមួយអាមេរិកដាក់សំណើរទៅកាន់ក្រុមប្រឹក្សាសន្តិសុខឲ្យមានកិច្ចប្រជុំលើបញ្ហាមីយ៉ាន់ម៉ានេះមានដូចជា អង់គ្លេស បារាំង ប៉េរូ ស៊ុយអែត កូតឌីវ័រ ហូឡង់ ប៉ូឡូញ និងគុយវ៉ែត។ ប្រទេសទាំងនេះក៏ស្នើឲ្យមានការកិច្ចប្រជុំត្រឹមខែតុលានេះដែរ។
បើតាមទីភ្នាក់ងារព័ត៌មាន AFP ក្នុងសំណើររួមគ្នានេះ ប្រទេសទាំងប្រំាបួនបាននិយាយថា ប្រធានគណៈកម្មការស្វែងរកការពិតរបស់អង្គការសហប្រជាជាតិនេះគួរតែរៀបរាប់លម្អិតប្រាប់ក្រុមប្រឹក្សាបន្ថែមពីបញ្ហាមីយ៉ាន់ម៉ានេះដើម្បីបានទទួលព័ត៌មានបន្ថែមពីវិបត្តិ និងផលប៉ះពាល់លើសន្តិភាព និងសន្តិសុខអន្តរជាតិផង។
តាមពិតទៅគណៈកម្មការស្វែងរកការពិតមីយ៉ាន់ម៉ា បានបញ្ចេញរបាយការណ៍លម្អិតរបស់ខ្លួនកាលពីខែកញ្ញា ដោយអំពាវនាវឲ្យក្រុមប្រឹក្សាសន្តិសុខបញ្ជូនសំណុំរឿងរំលោភសិទ្ធិមនុស្សនៅមីយ៉ាន់ម៉ាទៅកាន់តុលាការព្រហ្មទណ្ឌអន្តរជាតិ (ICC) នៅក្រុងឡាអេ ឬបង្កើតតុលាការព្រហ្មទណ្ឌអន្តរជាតិបណ្តោះអាសន្នមួយដើម្បីចាត់ការសំណុំរឿងនេះ។
របាយការណ៍ដដែលនេះបានអះអាងថា មន្ត្រីយោធាជាន់ខ្ពស់របស់មីយ៉ាន់ម៉ារួមជាមួយអគ្គមេបញ្ជាការកងទ័ព Min Aung Hlaing ត្រូវស្ថិតក្រោមការស៊ើបអង្កេត និងកាត់ទោសលើករណីប្រល័យពូជសាសន៍នៅរដ្ឋរ៉ាក់ខាន (Rakhine) ដែលប្រជាជនរ៉ូហ៊ីងយ៉ាប្រហែល ៧សែននាក់បានរត់ភៀសខ្លួនទៅបង់ក្លេសដែរ។ ក្រុមសិទ្ធិមនុស្សក៏អះអាងផងដែរថា កងទ័ពមីយ៉ាន់ម៉ា បានកាប់សម្លាប់ប្រជាជន រំលោភបំពាន ដុតផ្ទះសម្បែងក្នុងគោលដៅបំបាត់ពូជប្រជាជនភាគតិចមូស្លីមរ៉ូហ៊ីងយ៉ាងនេះ ប៉ុន្តែមីយ៉ាន់ម៉ាតែងតែទាត់ចោលការចោទប្រកាន់ទាំងនេះ និងអះអាងថា ខ្លួនរក្សាសន្តិសុខ និងបង្ក្រាបក្រុមភេរវជនប៉ុណ្ណោះ។
យ៉ាងណាក៏ដោយចុះ សំណើរឲ្យមានកិច្ចប្រជុំស្តាប់គណៈកម្មការស្វែងរកការពិតជុំវិញវិបត្តិជនភៀសខ្លួនមីយ៉ាន់ម៉ា ទំនងជានឹងត្រូវជំទាស់ដោយមហាអំណាចចិនដែលជាសមាជិកអចិន្ត្រៃយ៍នៃក្រុមប្រឹក្សាដ៏មានឥទ្ធិពលរបស់អង្គការសហប្រជាជាតិដែរ។ ចិនត្រូវបានគេស្គាល់ច្បាស់ថា ជាមិត្តជិតស្និទ្ធរបស់មីយ៉ាន់ម៉ា និងខ្នងបង្អែកការទូតដ៏ចម្បងផងដែរ។
ចំណែកមីយ៉ាន់ម៉ាខ្លួនឯងក៏បានសរសេរលិខិតមួយច្បាប់ផ្ញើទៅកាន់ក្រុមប្រឹក្សាសន្តិសុខដែរដោយជំទាស់ដាច់ខាតចំពោះការស្នើសុំឲ្យមានកិច្ចប្រជុំស្តាប់របាយការណ៍គណៈកម្មការស្វែងរកការពិតនេះព្រោះវាមិនឯករាជ្យ និងមានភាពលម្អៀង។
ឯកអគ្គរដ្ឋទូតមីយ៉ាន់ម៉ាប្រចាំអង្គការសហប្រជាជាតិ Hau Do Suan បានបញ្ជាក់ដូច្នេះ៖ របាយការណ៍គណៈកម្មការអង្គការសហប្រជាជាតិលម្អៀងដែលផ្អែកលើតែរឿងរ៉ាវរៀបរាប់ និងមិនផ្អែកលើភស្តុតាងជាក់ស្តែងឡើយ។ ការដាក់បន្ទុកលើអ្នកដទៃដោយគ្មានការគិតគូរពីការអភិវឌ្ឍប្រកបដោយភាពវិជ្ជមានជាការប៉ុនប៉ងដ៏គ្រោះថ្នាក់ដែលនាំមកនូវបរាជ័យដែរ»៕
Tag:
អាមេរិក
UN
រ៉ូហ៊ីងយ៉ា
មីយ៉ាន់ម៉ា
© រក្សាសិទ្ធិដោយ thmeythmey.com
