ជាតិ
កម្ពុជា ផាកពិន័យប្រាក់ជិត៩០ម៉ឺនដុល្លារ ពីពលករបរទេសខុសច្បាប់ ក្នុងរយៈពេល៥ឆ្នាំ
× ភ្នំពេញ៖ កម្ពុជា ផាកពិន័យថវិកា បានជិត៩០ម៉ឺនដុល្លារ ពីពលករបរទេសខុសច្បាប់ ក្នុងរយៈពេល៥ឆ្នាំ ពោលគឺចាប់ពីឆ្នាំ២០១៣ ដល់២០១៧។ នេះបើតាមរបាយការណ៍សមិទ្ធផលរបស់ក្រសួងមហាផ្ទៃ។
របាយការណ៍ បានបន្ថែមថា អាជ្ញាធរ បានចុះធ្វើអធិការកិច្ចពលករបរទេសនៅតាមរោងចក្រ សហគ្រាស គ្រឹះស្ថាននានា តាមបណ្ដារាជធានី-ខេត្ត ដោយរកឃើញមានពលករបរទេសខុសច្បាប់ ៧, ៣៤២នាក់ ហើយបានផាកពិន័យ ប្រាក់ស្មើ៣, ៦៤០,៩០០,០០០រៀល (ជាង៨៩ម៉ឺនដុល្លារអាមេរិក) តាមប្រកាសរបស់ក្រសួងមហាផ្ទៃ និងក្រសួងការងារ និងបណ្ដុះបណ្ដាលវិជ្ជាជីវៈ។
ក្រៅពីនេះសមត្ថកិច្ច ក៏បានឃាត់ខ្លួន និងបណ្ដេញជនបរទេស ដែលរស់នៅកម្ពុជាខុសច្បាប់ អន្តោប្រវេសន៍ ១៣,៧០១នាក់ មាន៨៥សញ្ជាតិផងដែរ។
គិតត្រឹមឆ្នាំ២០១៧ មានជនអន្តោប្រវេសន៍ចំនួន ៤៦៧៧៦គ្រួសារ ដែលគិតជាចំនួនមនុស្ស មាន១៧៦៨១២នាក់ (ស្រី៧៩៧២៨នាក់) ។ ក្នុងនោះមានជនបរទេសកាន់កាប់ប្រើប្រាស់ឯកសារកម្ពុជា មិនប្រក្រតីចំនួន២០២១៨គ្រួសារ មានចំនួនមនុស្ស៧៣៣៩៧នាក់ (ស្រី៣៥៨៨៨នាក់) មាន៥សញ្ជាតិ ដែលកំពុងដំណើរការដកហូតតាមអនុក្រឹត្យរដ្ឋាភិបាល។ នេះបើតាមរបាយការណ៍ក្រសួងមហាផ្ទៃ៕
© រក្សាសិទ្ធិដោយ thmeythmey.com