ទៀត គឹមហេង ត្រៀមខ្លួនបង្ហាញខ្លួននៅលីគកំពូល ជាមួយវិសាខា

កីឡាជាតិ

ជាតិ

ទៀត គឹមហេង ត្រៀមខ្លួនបង្ហាញខ្លួននៅលីគកំពូល ជាមួយវិសាខា

19, Oct 2018 , 7:59 am

រូបភាព

កីឡាករ ទៀត គឹមហេង លើកបង្ហាញស្លាកឈ្មោះក្លិបវិសាខា ក្រោយចុះកិច្ចសន្យារួមរស់ជាមួយក្លិបនេះ

ដោយ:

ក្រោយចុះកិច្ចសន្យាលេងឲ្យក្លិបវិសាខា កីឡាករ ទៀត គឹមហេង រំពឹងបានបង្ហាញខ្លួនក្នុងការប្រកួតក្របខណ្ឌលីគកំពូល ទោះបីកៅអីនេះមានការប្រកួតប្រជែងខ្លាំងក៏ដោយ។ ការចូលរួមជាមួយវិសាខា គឹមហេង ទទួលបានការទំនុកបម្រុងលើថ្លៃការសិក្សា ស្នាក់នៅ ម្ហូបអាហារ និងអត្ថប្រយោជន៍ជាច្រើនទៀត។

ខ្សែបម្រើវ័យក្មេង ទៀត គឹមហេង បានចុះកិច្ចសន្យាលេងឲ្យក្លិបបាល់ទាត់វិសាខា ក្រោយត្រូវបានរំសាយពីមជ្ឈមណ្ឌលសាលាបាល់ទាត់ជាតិបាទី។ ទោះបីមិនបញ្ជាក់ពីរយៈពេលនៃកិច្ចសន្យា តែថ្នាក់ដឹកនាំក្លិបអះអាងថា កិច្ចសន្យានេះមានរយៈពេលវែង។ គឹមហង ដែលអះអាងមានសមត្ថភាពមិនទាន់គ្រប់គ្រាន់ក្នុងរយៈពេលហ្វឹកហាត់៥ឆ្នាំនៅសាលាបាល់ទាត់ជាតិបាទី រំពឹងថា រូបគេនឹងបានបញ្ចេញសមត្ថភាពក្នុងការប្រកួតនៃក្របខណ្ឌលីគកំពូលជាមួយក្លិបវិសាខា។

«ការចូលរួមជាមួយក្លិបវិសាខា ខ្ញុំរំពឹងថា នឹងបានបង្ហាញសមត្ថភាពក្នុងការប្រកួតលីគកំពូល។ ទោះបីខ្ញុំដឹងថា ក្លិបវិសាខាមានកីឡាករជើងចាស់ច្រើន និងមានសមត្ថភាពក៏ដោយ តែខ្ញុំនៅតែមានកូនចិត្តថា នឹងទទួលបានកៅអីមួយនេះ»។ ការបង្ហាញក្តីរំពឹងបែបនេះរបស់ ទៀត គឹមហេង ធ្វើឡើងក្នុងសន្និសីទសារព័ត៌មានស្តីពីការរំសាយយុវជន១៦រូបរបស់សាលាបាល់ទាត់ជាតិបាទីកាលពីថ្ងៃទី១៦ ខែតុលា ឆ្នាំ២០១៨។

ទោះបីមិនរំពឹងទទួលបានជោគជ័យជាមួយទ្រនំថ្មី តែកីឡាករមកពីខេត្តព្រះសីហនុរូបនេះ ប្តេជ្ញាថា នឹងខិតខំប្រឹងប្រែងហ្វឹកហាត់ ឲ្យអស់ពីសមត្ថភាព ដើម្បីអភិវឌ្ឍន៍សមត្ថភាពឲ្យកាន់តែល្អប្រសើរ ដើម្បីសម្រេចបំណងទៅថ្ងៃអនាគត។ កីឡាករវ័យ១៨រូបនេះបន្ថែមថា រូបគេមានមហិច្ឆិតាចង់ក្លាយជាកីឡាករបាល់ទាត់ល្អ និងមានឈ្មោះល្បីល្បាញម្នាក់នៅកម្ពុជា។

កីឡាករដែលចូលហ្វឹកហាត់បាល់ទាត់តាំងពីអាយុ១៣ឆ្នាំរូបនេះ ចាត់ទុកកីឡាករ ចាន់ វឌ្ឍនាកា រស់ សំអឿន និង គួច សុគម្ភៈ ជាកីឡាករនិមិត្តរូបសម្រាប់ខ្លួន ខណៈកីឡាករបរទេសគេចូលចិត្តកីឡាករ Cristiano Ronaldo។ ការចូលប្រឡូកក្នុងវិស័យកីឡាបាល់ទាត់របស់ គឹមហេង ដោយសារការស្រលាញ់តាំងពីកុមារ និងមានឪពុកជាអ្នកចូលចិត្តកីឡាមួយនេះ។

កីឡាករដែលមានស្រុកកំណើតនៅភូមិ៣ សង្កាត់៣ ក្រុងព្រះសីហនុ ខេត្តព្រះសីហនុរូបនេះបានរៀបរាប់ថា នៅពីក្មេងរូបគេតែងតែត្រូវបានឪពុកយកទៅតារាងបាល់ទាត់ ពេលឪពុកខ្លួនទៅលេងបាល់ទាត់លក្ខណៈមិត្តភាព ដើម្បីសុខភាពម្តងៗ។ កត្តានេះហើយទើបធ្វើឲ្យរូបគេស្រលាញ់ ចូលចិត្ត និងចង់ក្លាយជាកីឡាករបាល់ទាត់តាំងពីក្មេង។

ក្រៅពីកីឡាករ ទៀត គឹមហេង ក៏មានកីឡាករ៥រូបផ្សេងទៀតផងដែរ ដែលបានចុះកិច្ចសន្យាលេងក្លិបវិសាខា។ កីឡាករទាំងនោះរួមមាន ទូច គឹមឆាយ, ផុន តៃនិញ, ឡុង ម៉េងហាង និងអ្នកចាំទី គង់ ពីលត់៕