ជាតិ
សុខភាព
លោក Jean-Gaetan ៖ រាល់៤ម៉ោងម្តង មានពលរដ្ឋខ្មែរ១នាក់បានស្លាប់ ដោយសារប្រើប្រាស់ឱសថក្លែងក្លាយ លោក Jean-Gaetan GUILLEMAUD ប្រធានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុប និងជានាយកក្រុមហ៊ុនZUelling Pharma ប្រចាំកម្ពុជា
× ភ្នំពេញ៖ ពលរដ្ឋមួយនាក់ក្នុងចំណោមប្រជាពលរដ្ឋខ្មែរ ជាង១៦លាននាក់ ត្រូវបានស្លាប់ រៀងរាល់ពេល៤ម៉ោងម្តង ដោយសារការប្រើប្រាស់ឱសថក្លែងក្លាយ។ នេះជាលើកឡើងរបស់លោក Jean-Gaetan GUILLEMAUD ប្រធានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុប និងជានាយកក្រុមហ៊ុនZUelling Pharma ប្រចាំកម្ពុជា ។
ថ្លែងនៅក្នុងកិច្ចពិភាក្សាសារព័ត៌មាន ធុរកិច្ច និងការទទួលខុសត្រូវផ្នែកសង្គម លោក Jean-Gaetan បាននិយាយថា ឱសថក្លែងក្លាយបានសម្លាប់មនុស្សក្នុងមួយថ្ងៃ ច្រើនជាងភេរវករសម្លាប់មនុស្សក្នុងមួយឆ្នាំ។ លោកថា អ្នកស្លាប់មានចំនួន៥ដង ដោយសារប្រើប្រាស់ឱសថក្លែងក្លាយ បើធៀបនឹងចំនួនអ្នកស្លាប់ ដោយសារតែញៀនថ្នាំ ឬការប្រើប្រាស់គ្រឿងញៀនហួសកម្រិត។ បើតាមលោក Jean-Gaetan មានឱសថ៧ក្នុងចំណោម១០មុខ លក់នៅលើទីផ្សារកម្ពុជា គឺជាឱសថក្លែងក្លាយ។
លោកបានបញ្ជាក់ដូច្នេះថា៖«ការប្រយុទ្ធប្រឆាំងការនាំចូល និងផលិតឱសថក្លែងក្លាយ ត្រូវបានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុប ផ្តល់វាជាអទិភាពដំបូង ទៅលើវិនិយោគអឺរ៉ុប មកធ្វើធុរកិច្ចនៅកម្ពុជា។ ព្រោះវា គឺជាធុរកិច្ចមួយដ៏សាហាវបំផុត ចំពោះអ្នកដែលព្យាយាមរកប្រាក់ចំណេញ ដោយមិនគិតទៅលើសុខុភាពសង្គម»។
ជាទូទៅអ្នកធ្វើធុរកិច្ចបែបនេះ តែងតែផ្តោតលើក្រុមមនុស្សដែលងាយរងគ្រោះ ពិសេសចំពោះអ្នកមានសុខភាពប៉ះពាល់នឹងជីវិត និងអ្នកបញ្ជាទិញឱសថតាមប្រព័ន្ធInternet ឬតាមOnline ជាដើម។ នេះជាការលើកឡើងរបស់លោក Jean-Gaetan។
លោកបន្តថា គណៈកម្មាធិការសុខុមាលភាពនៃសភាពាណិជ្ជកម្មអឺរ៉ុប កំពុងសហការជាមួយគណៈកម្មាធិការប្រយុទ្ធប្រឆាំងផលិតផលក្លែងក្លាយរបស់ក្រសួងមហាផៃ្ទ ដើម្បីរួមគ្នាទប់ស្កាត់កានាំចូល ឬផលិតឱសថក្លែងក្លាយ ជូនដល់ប្រជាពលរដ្ឋខ្មែរ ក៏ដូចជាការរួមចំណែកទទួលខុសត្រូវផ្នែកសង្គមផងដែរ។
ជាមួយគ្នានេះ លោក Jean-Gaetan បានផ្តល់នូវការណែនាំ ៣ចំណុច ដល់ប្រជាជនខ្មែរ គឺទី១ មុននឹងសម្រេចចិត្តទិញឱសថ ពីឱសថស្ថានណាមួយ ត្រូវពិនិត្យមើលតែម ដែលបានបិទនៅជាប់ប្រអប់ថ្នាំ ថាមានចុះបញ្ជី ដែរឬទេ? ទី២ ពិនិត្យកាលបរិច្ចេទផុតកំណត់នៃថ្នាំ និងចុងក្រោយត្រូវពិនិត្យមើលនៅក្នុងប្រអប់ថ្នាំនោះ មានកូនក្រដាស ដែលសរសេរជាភាសាខ្មែរ រៀបរាប់ពីឥទ្ធិពលថ្នាំនោះ។ បើតាមលោក Jean-Gaetan ការពិនិត្យ និងធ្វើបែបនេះ វាជួយបានមួយចំណែកដល់ការកាត់បន្ថយពីការទទួលបានឱសថក្លែងក្លាយ និងគ្មានគុណភាព យកមកប្រើប្រាស់។
ប្រធានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុបរូបនេះ បានបន្ថែមថា មានប្រជាជនជាង១លាននាក់ នៅទូទាំងពិភពលោក ត្រូវបានស្លាប់ជារៀងរាល់ឆ្នាំ ដោយសារប្រើប្រាស់ឱសថក្លែងក្លាយ៕
Tag:
សង្គម
ឱសថក្លែងក្លាយ
សុខុមាលភាព
© រក្សាសិទ្ធិដោយ thmeythmey.com