ជំនួបរដ្ឋមន្ត្រីការពារជាតិអាមេរិក-ចិននៅសិង្ហបុរី បញ្ចប់ដោយគ្មានផ្លែផ្កា

អន្តរជាតិ

ជំនួបរដ្ឋមន្ត្រីការពារជាតិអាមេរិក-ចិននៅសិង្ហបុរី បញ្ចប់ដោយគ្មានផ្លែផ្កា

19, Oct 2018 , 8:59 pm

រូបភាព

រដ្ឋមន្ត្រីការពារជាតិអាមេរិក ជេម ម៉ាធីស ចាប់ដៃសមភាគីចិន វៃ ហ្វឹងហឺ នាជំនួបនៅសិង្ហបុរី (រូបភាព AFP)

ដោយ: តន ចាន់រិទ្ធារ៉ា

ជំនួបរដ្ឋមន្ត្រីការពារជាតិអាមេរិក និងចិននៅឯសិង្ហបុរី នៅថ្ងៃទី១៨ ខែតុលា បានបញ្ចប់ទៅដោយគ្មានកិច្ចព្រមព្រៀងអ្វីឡើយ។ ជំនួបរវាងលោក ជេម ម៉ាធីស និងលោក វៃ ហ្វឹងហឺ ធ្វើឡើងស្របពេលទំនាក់ទំនងរវាងមហាអំណាចទាំងពីររអាក់រអួលខ្លាំងទាំងវិស័យពាណិជ្ជកម្ម និងយោធា។ ខណៈទំនាក់ទំនងនយោបាយធ្លាក់ចុះខ្លាំងនោះ យោធាទាំងពីរយល់ស្របគ្នាថា ទំនាក់ទំនងផ្នែកកងទ័ពអាចជាកម្លាំងសំខាន់ក្នុងការរក្សាស្ថិរភាព។

រដ្ឋមន្ត្រីការពារជាតិអាមេរិក ជេម ម៉ាធីស និងសមភាគីចិន វៃ ហ្វឹងហឺ បានជួបជជែកគ្នារយៈពេល១ម៉ោងកន្លះ នៅក្រៅជំនួបប្រចាំឆ្នាំរដ្ឋមន្ត្រីការពារជាតិអាស៊ាន និងប្រទេសដៃគូនៅសិង្ហបុរី។ ប៉ុន្តែជំនួបដែលធ្វើឡើងលើសម៉ោងកំណត់ចំនួន៣០នាទីនេះ មិនមានលទ្ធផលផ្លែផ្កាអ្វីឡើយ។ តាមពិតទៅ លោក ម៉ាធីស និងលោក វៃ ត្រូវជួបគ្នានៅប៉េកាំងតាំងពីសប្ដាហ៍មកម្ល៉េះ ប៉ុន្តែជំនួបនេះត្រូវបានចិនលុបចោលវិញ។

ក្រោយជំនួបនេះ ឧបការីរដ្ឋមន្ត្រីការពារជាតិអាមេរិក Randall Schriver បានប្រាប់អ្នកសារព័ត៌មានថា លោក ម៉ាធីស ចាត់ទុកការចរចានេះជាការជជែកដោយស្មោះត្រង់ និងថា ជំនួបថ្នាក់ខ្ពស់បែបនេះជារឿងចាំបាច់សម្រាប់ស្ថានភាពបច្ចុប្បន្ន។ មន្ត្រីទទួលបន្ទុកកិច្ចការអាស៊ីប៉ាស៊ីហ្វិករូបនេះបន្តថា ប្រមុខការពារជាតិទាំងពីរបានជជែកលើបញ្ហាជាច្រើន ប៉ុន្តែផ្ដោតខ្លាំងលើសំណុំរឿងសមុទ្រចិនខាងត្បូង។ នេះបើតាមការផ្សាយរបស់ទីភ្នាក់ងារព័ត៌មាន AP ។

ការលុបចោលជំនួបនៅប៉េកាំង ជាសញ្ញាបង្ហាញពីការរាលដាលនៃជម្លោះក្នុងទំនាក់ទំនងរវាងមហាអំណាចពិភពលោកទាំងពីរ ដែលកំពុងជ្រៀតដល់វិស័យយោធា។ មុនជំនួបថ្ងៃទី១៨ ខែតុលា Shriver បានប្រាប់អ្នកសារព័ត៌មានដែរថា ភាគីចិនជាអ្នកស្នើឲ្យមានជំនួបនៅសិង្ហបុរី ហើយយោធាអាមេរិកចាត់ទុកសំណើចិន ជាការបង្ហាញជំហរថា ចិនចាប់អារម្មណ៍ក្នុងការរក្សាស្ថិរភាពរវាងថ្នាក់ដឹកនាំយោធាប្រទេសទាំងពីរ។

តាមពិតទៅ លោក ម៉ាធីស ក៏ទទួលស្គាល់ដែរថា អាមេរិក និងចិនពិតជាមានជំហរខុសគ្នាច្រើនមែន តែការជួបជជែកគ្នាជារឿងចាំបាច់ក្នុងការស្វែងរកចំណុចរួម។ ប្រមុខការពារជាតិអាមេរិករូបនេះបានប្រាប់អ្នកសារព័ត៌មានក្នុងដំណើរមកកាន់តំបន់អាស៊ីដូច្នេះថា៖ «យើងជាមហាអំណាចធំពីរ ឬក៏មហាអំណាចពីរនៅប៉ាស៊ីហ្វិក និងជាមហាអំណាចសេដ្ឋកិច្ចធំពីរដែរ។ វាតែងមានពេលខ្លះ យើងជាន់ជើងគ្នាទៅវិញទៅមក ដូចនេះយើងនឹងរកផ្លូវគ្រប់គ្រងទំនាក់ទំនងយើងឲ្យបានល្អ។»

ទំនាក់ទំនងយោធាអាមេរិក និងចិន ដែលកន្លងមកនៅក្រៅរង្វង់ជម្លោះនយោបាយ និងពាណិជ្ជកម្ម បានប្រែទៅជាតានតឹង បន្ទាប់រដ្ឋបាលប្រធានាធិបតី ដូណាល់ ត្រាំ ដាក់ទណ្ឌកម្មលើអង្គភាពយោធាមួយរបស់ចិនជុំវិញការទិញយន្តហោះចម្បាំងពីរុស្ស៊ី។ ចិនរិះគន់អាមេរិកជាខ្លាំងលើរឿងនេះ ហើយបន្ទាប់មកស្ថានការក៏យ៉ាប់យ៉ឺនទៀត ក្រោយអាមេរិកព្រមលក់អាវុធឲ្យតៃវ៉ាន់ ដែលចិនចាត់ទុកជាទឹកដីមួយរបស់ខ្លួន៕