អន្តរជាតិ
អាមេរិក និងកូរ៉េខាងត្បូងផ្អាកសមយុទ្ធរួមគ្នាធំមួយទៀត រូបភាព៖ AP
× ស្របពេលការចរចាដើម្បីដោះស្រាយនុយក្លេអ៊ែរកូរ៉េខាងជើងកំពុងដំណើរការនោះ សហរដ្ឋអាមេរិក និងកូរ៉េខាងត្បូង បានផ្អាកសមយុទ្ធរួមគ្នារបស់ខ្លួនជាបន្តបន្ទាប់។ មន្ទីរបញ្ចកោណ នៅថ្ងៃទី១៩ ខែតុលា បានប្រកាសថា វ៉ាស៊ីនតោន និងសេអ៊ូល បានសម្រេចចិត្តផ្អាកសមយុទ្ធទ្រង់ទ្រាយធំរបស់ខ្លួនមួយទៀត ដែលគ្រោងធ្វើនៅដំណាច់ឆ្នាំ២០១៨ នេះ។ ការផ្អាកនេះ មានគោលដៅជំរុញការចរចា ដែលបានជាប់គាំងឲ្យមានដំណើរការកាន់លឿន។
រដ្ឋមន្ត្រីការពារជាតិអាមេរិក ជេម ម៉ាធីស និងសមភាគីកូរ៉េខាងត្បូង ជុង ឃ្យុងឌូ បានសម្រេចលុបចោលសមយុទ្ធផ្លូវអាកាស Vigilant Ace ដែលគ្រោងរៀបចំនៅខែធ្នូខាងមុខ។ អ្នកនាំពាក្យក្រសួងការពារជាតិអាមេរិក Dana White និយាយនៅថ្ងៃទី១៩ ខែតុលា ថា មន្ត្រីទាំងពីរយល់ព្រមផ្អាកសមយុទ្ធរួមគ្នានេះដើម្បីផ្ដល់ឱកាសដល់ការចរចាការទូតជាមួយក្រុងព្យុងយ៉ាងនូវឱកាសគ្រប់យ៉ាងដើម្បីបន្តទៅមុខទៀត។
ការផ្អាកសមយុទ្ធទ្រង់ទ្រាយធំមួយនេះដែលកូរ៉េខាងជើងប្រឆាំងដាច់ខាតនោះ ជាការប្រឹងប្រែងចុងក្រោយមួយទៀតរបស់សម្ព័ន្ធមិត្តអាមេរិក-កូរ៉េខាងត្បូង ដើម្បីបញ្ចុះបញ្ចូលឲ្យរដ្ឋកុម្មុយនីស្តមួយនេះចូលតុចរចាបន្តទៀតដើម្បីដោះស្រាយនុយក្លេអ៊ែរទាំងស្រុង ដោយមានការត្រួតពិនិត្យ និងមិនត្រឡប់ក្រោយបានឡើយ។ សមយុទ្ធ Vigilant នេះ ធ្វើឡើងចុងក្រោយកាលពីឆ្នាំ២០១៧ កន្លងទៅ។
លោកស្រី White ក៏បានបញ្ជាក់ពីជំហររបស់ប្រមុខការពារជាតិទាំងពីរក្នុងការបន្តប្ដេជ្ញាចិត្តដើម្បីផ្លាស់ប្ដូរសមយុទ្ធនេះ សំដៅធានាពីការត្រៀមខ្លួនរបស់កម្លាំងយោធាទាំងពីរ។ ទាក់ទងសមយុទ្ធនៅពេលខាងមុខវិញ លោក ម៉ាធីស និងលោក ជុង នឹងជជែកគ្នាបន្ថែមទៀតពីលទ្ធភាពក្នុងការចាប់ផ្ដើមសមយុទ្ធឡើងវិញ។ មន្ត្រីរូបនេះបន្តថា រដ្ឋមន្ត្រីការពារជាតិជប៉ុន កាកេស៊ី អ៊ីវ៉ាយ៉ា ក៏ត្រូវបានពិគ្រោះក្នុងសំណុំរឿងនេះដែរ។
ការផ្អាកសមយុទ្ធរួមគ្នារបស់អាមេរិក និងកូរ៉េខាងត្បូង ចាប់ផ្ដើមក្រោយជំនួបលើកដំបូងរវាងប្រធានាធិបតីអាមេរិក ដូណាល់ ត្រាំ និងមេដឹកនាំកំពូលកូរ៉េខាងជើង គីម ជុងអ៊ុន ។ ក្រោយជំនួបនេះ ក្រុងវ៉ាស៊ីនតោនប្រកាសថា ខ្លួននឹងផ្អាកសមយុទ្ធយោធាមួយចំនួនជាមួយកូរ៉េខាងត្បូងដូចជាសមយុទ្ធទ្រង់ទ្រាយធំ Ulchi Freedom Guardian នៅខែសីហាផង។ ក្នុងឆ្នាំ២០១៧ Vigilant Ace ដែលជាសមយុទ្ធផ្លូវអាកាសនោះ មានយន្តហោះចូលរួម២៣០គ្រឿង និងទាហានជាង១ម៉ឺននាក់។
តាមពិតទៅ អាមេរិក និងកូរ៉េខាងត្បូង បានធ្វើសមយុទ្ធរួមគ្នាជាច្រើនក្នុងមួយឆ្នាំៗ ចាប់តាំងពីលំហាត់ឡើងគោករហូតដល់លំហាត់ឈ្លានពានកូរ៉េខាងជើង ក៏ដូចជាលំហាត់កម្ចាត់ក្បាលម៉ាស៊ីនដឹកនាំរបស់ក្រុងព្យុងយ៉ាងផង។ កូរ៉េខាងជើងមិនពេញចិត្តឡើយនឹងសមយុទ្ធដែលធ្វើឡើងនៅក្បែរផ្ទះខ្លួនបែបនេះ ហើយជារឿយៗបានគំរាមវាយបកវិញដែរ។ យ៉ាងណាមិញ ជាមួយនឹងការផ្អាកសមយុទ្ធនៅកូរ៉េខាងត្បូងនោះ កូរ៉េខាងជើងអាចធូរចិត្តបានក្រែលមិនខាន៕
Tag:
អាមេរិក
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com