អន្តរជាតិ
បងធំអាស៊ានឥណ្ឌូណេស៊ី ចោទសួរអូស្ត្រាលីរឿងចង់ប្តូរស្ថានទូតទៅហ្សរ៊ុយសាឡិម
× រដ្ឋាភិបាលឥណ្ឌូណេស៊ី សម្តែងការមិនអស់ចិត្តចំពោះសេចក្តីប្រកាសចុងក្រោយរបស់រដ្ឋាភិបាលអូស្ត្រាលីពាក់ព័ន្ធនឹងការចង់ផ្លាស់ប្តូរទីតាំងស្ថានទូតរបស់ខ្លួនទៅកាន់ក្រុងហ្សេរ៊ុយសាឡិម (Jerusalem) ដែលជាទីតាំងចម្រូងចម្រាស់រវាងប៉ាឡេស្ទីន និងអ៊ីស្រាអែល។
តាមរយៈសន្និសីទសារព័ត៌មានរួមគ្នាក្នុងរដ្ឋធានីហ្សាការតាជាមួយនឹងរដ្ឋមន្ត្រីការបរទេសប៉ាឡេស្ទីន នៅថ្ងៃ១៦ តុលាកន្លងទៅ លោកស្រី Retno Marsudi រដ្ឋមន្ត្រីការបរទេសឥណ្ឌូណេស៊ី បានថ្លែងថា ឥណ្ឌូណេស៊ី ពិតជាមានការបារម្ភចំពោះសេចក្តីប្រកាសរបស់អូស្ត្រាលី ឥណ្ឌូណេស៊ីក៏ឆ្ងល់ថា ហេតុអ្វីបានជាអូស្ត្រាលី ចង់ផ្លាស់ប្តូរស្ថានទូតរបស់ខ្លួនទៅហ្សេរ៊ុយសាឡិមទៅវិញ។
តាមការចុះផ្សាយរបស់សារព័ត៌មាន Jakarta Globe លោកស្រីរដ្ឋមន្ត្រីឥណ្ឌូណេស៊ីរូបនេះ បានអះអាងថា ឥណ្ឌូណេស៊ី បានស្នើឲ្យអូស្ត្រាលី និងបណ្តាប្រទេសផ្សេងទៀតឲ្យគាំទ្រការដោះស្រាយ ជម្លោះ អ៊ីស្រាអែល-ប៉ាឡេស្ទីន តាមច្បាប់អន្តរជាតិ និងមិនត្រូវធ្វើសកម្មភាព ដែលអាចគំរាមកំហែងដល់សន្តិសុខ សន្តិភាព និងស្ថិរភាពពិភពលោកឡើយ។
សម្រាប់ភាគីប៉ាឡេស្ទីន ដែលកំពុងតែដង្ហោយសុំការគាំទ្រពីសហគមន៍អន្តរជាតិនោះ បានចាត់ទុកសេចក្តីប្រកាសរបស់អូស្ត្រាលី ថាជាព័ត៌មានអាក្រក់មួយ។ តាមរយៈសន្និសីទសារព័ត៌មានជាមួយនឹងសមភាគីឥណ្ឌូណេស៊ី លោក Rayid al-Maliki បានលើកឡើងថា ផែនការរបស់អូស្ត្រាលី នឹងបំពានលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិហើយ។
គួរជម្រាបផងដែរថា ថ្ងៃទី១៦ ខែតុលាដូចគ្នាដែរនោះ ប្រមុខរដ្ឋាភិបាលអូស្ត្រាលី បានរំលេចពីចេតនារបស់ខ្លួន ក្នុងការទទួលយកទីក្រុងហ្សេរ៊ុយសាឡិមជារដ្ឋធានីអ៊ីស្រាអែលផ្លូវការ និងប្ដូរស្ថានទូតអូស្ត្រាលីទៅកាន់ទីក្រុងពិសិដ្ឋនេះផង។ ការផ្លាស់ប្តូរនេះ ត្រូវបានប្រមុខរដ្ឋាភិបាលអូស្ត្រាលី បដិសេធថា មិនមានពាក់ព័ន្ធនឹងទំនោរតាមសហរដ្ឋអាមេរិកឡើយ។
កន្លងមក មានតែអាមេរិកប៉ុណ្ណោះ ដែលចេញមុខចេញមាត់ខ្លាំងជាងគេ ក្នុងការកាងសម្ព័ន្ធមិត្តខ្លួនអ៊ីស្រាអែល។ អាមេរិក នៅខែឧសភាកន្លងទៅបានសម្រេចផ្លាស់ប្តូរទីតាំងស្ថានភាពរបស់ខ្លួនទៅកាន់ទីក្រុង ហ្សេរ៊ុយសាឡិម ទាំងតំបន់នេះ នៅមិនទាន់មានការដោះស្រាយចប់នៅឡើយពាក់ព័ន្ធនឹងសិទ្ធិគ្រប់គ្រងដែនអធិបតេយ្យរវាងអ៊ីស្រាអែល និងប៉ាឡេស្ទីន។ សូម្បីតែសហគមន៍អន្តរជាតិ ក៏ចូលរួមថ្កោលទោសទង្វើបែបនេះផងដែរ៕
Tag:
ឥណ្ឌូណេស៊ី
ប៉ាឡេស្ទីន
ហ្សេរ៊ុយសាឡិម
© រក្សាសិទ្ធិដោយ thmeythmey.com