កីឡាអន្តរជាតិ
អន្តរជាតិ
Mourinho មិនចាប់អារម្មណ៍ Real Madrid ព្រោះចង់បន្តកិច្ចសន្យានៅ Man Utd
× លោក Jose Mourinho បានច្រានចោលព័ត៌មានដែលថាខ្លួនកំពុងពិចារណាវិលត្រឡប់ទៅកាន់ក្លិបយក្សអេស្ប៉ាញ Real Madrid វិញ កាលពីទី ២២ ខែតុលា ។ អមនឹងការបដិសេធព័ត៌មាននេះ លោក Mourinho បានបញ្ជាក់ថា លោកចង់បន្តកិច្ចសន្យាបន្ថែមទៀត ដើម្បីដឹកនាំក្រុម Manchester United ឲ្យបានយូរអង្វែង។ នេះបើតាមការផ្សាយរបស់ទីភ្នាក់ងារព័ត៌មាន Reuters។
អ្នកចាត់ការទូទៅ Real Madrid បច្ចុប្បន្នលោក Julen Lopetegui កំពុងស្ថិតក្រោមសម្ពាធធ្ងន់ធ្ងរបន្ទាប់ពីដឹកនាំក្រុមបរាជ័យជាច្រើនលើក ដោយទទួលបាន១៤ពិន្ទុ ក្នុងចំណោម៩ប្រកួត ស្ថិតនៅចំណាត់ថ្នាក់ទី ៧ នៅ La Liga។ លទ្ធផលមិនគាប់ប្រសើរនេះ មានប្រព័ន្ធផ្សព្វផ្សាយជាច្រើននៅអេស្ប៉ាញបានរាយការណ៍ថា លោក Mourinho ដែលកំពុងយ៉ាប់យ៉ឺនក្នុងការដឹកនាំ Man Utd បានចាប់អារម្មណ៍ការងារនេះ ប្រសិនបើលោក Lopetegui ពិតជាត្រូវបញ្ចប់តំណែងមែននោះ។
កិច្ចសន្យារបស់អ្នកចាត់ការសញ្ជាតិព័រទុយហ្គាល់នៅទឹកដី Old Trafford នឹងត្រូវបញ្ចប់នៅឆ្នាំ ២០២០ ប៉ុន្តែបច្ចុប្បន្នលោកក៏កំពុងស្ថិតក្រោមសម្ពាធផងដែរ បន្ទាប់ពីដឹកនាំបិសាចក្រហម បានត្រឹមចំណាត់ថ្នាក់ទី ១០ នៅក្នុងតារាង Premier League ក្រោយពីការប្រកួតចំនួន៩លើក មាន១៤ពិន្ទុ។
បើទោះយ៉ាងនេះក្តី លោក Mourinho បានប្រាប់អ្នកកាសែតក្នុងសន្និសីទសារព័ត៌មានមុនជំនួបពានរង្វាន់ UEFA Champions League រវាង Man Utd និង Juventus នៅរាត្រីថ្ងៃអង្គារនេះថា៖«អនាគតរបស់ខ្ញុំគឺនៅទីនេះ។ ខ្ញុំនៅមានកិច្ចសន្យានៅទីនេះ ហើយខ្ញុំគិតតែពីក្រុម Manchester United តែមួយមុខប៉ុណ្ណោះ។ ខ្ញុំសប្បាយរីករាយនឹងស្នាក់នៅទីនេះបន្តទៀតបន្ទាប់ពីកិច្ចសន្យារបស់ខ្ញុំបញ្ចប់»។
លោក Mourinho កាលនៅដឹកនាំ Real Madrid
អ្នកចាត់ការរហស្សនាម Special One ដែលធ្លាប់ដឹកនាំក្រុមស្តេចសចន្លោះពីឆ្នាំ២០១០ ដល់២០១៣ ក៏បានបញ្ចាក់ប្រាប់ផងដែរថា ក្រុមរបស់លោក នឹងបាត់បង់កីឡាករសំខាន់៦រូបសម្រាប់ការប្រកួតនៅទឹកដី Old Trafford យប់នេះ ដោយក្នុងនោះរួមមាន Alexis Sanchez, Marouane Fellaini, Jesse Lingard, Diogo Dalot, Scott McTominay និង Phil Jones។
Man United ដែលស្ថិតក្នុងពូល H ជាមួយ Juventus Valencia និង Young Boys រកបាន៤ពិន្ទុពីការប្រកួត២លើក ស្ថិតនៅចំណាត់ថ្នាក់ទី២ តាមពីក្រោយ Juventus ដែលមាន៩ពិន្ទុពេញ៕
Tag:
បាល់ទាត់
Jose Mourinho
Manchester United
Real Madrid
© រក្សាសិទ្ធិដោយ thmeythmey.com