សហព័ន្ធកីឡាគុនល្បុក្កតោកម្ពុជា នឹងបញ្ជូនកីឡាករ គ្រូបង្វឹក និងប្រតិភូចំនួន៨រូប ដើម្បីចូលរួមប្រកួតប្រជែងក្នុងព្រឹត្តិការណ៍កីឡាយុទ្ធសិល្ប៍អន្តរជាតិ (International Martial Art) នៅសាធារណរដ្ឋកូរ៉េ នាចុងខែតុលានេះ។ លោក ច័ន្ទ សារុន ប្រធានសហព័ន្ធ ដែលបានផ្តល់ថវិកា៥ពាន់ដុល្លារក្នុងការចំណាយលើថ្ងៃសំបុត្រយន្តហោះនិងប្រាក់ហោប៉ៅកីឡាកររំពឹងថា កម្ពុជានឹងទទួលបានលទ្ធផលល្អពីព្រឹត្តិការណ៍ ដែលមានប្រទេសជាង២០ចូលរួមមួយនេះ។
លោក ច័ន្ទ សារុន ប្រធានសហព័ន្ធកីឡាគុនល្បុក្កតោកម្ពុជារំពឹងថា អត្តពលិកកម្ពុជានឹងទទួលបានលទ្ធផលល្អ សម្រាប់ការចូលរួមប្រកួតប្រជែងក្នុងព្រឹត្តិការណ៍កីឡាយុទ្ធសិល្ប៍អន្តរជាតិនៅលើកនេះ។ ការរំពឹងបែបនេះ ដោយសារ លោក ជឿជាក់ថា អត្តពលិកកម្ពុជាទាំងអស់នឹងទទួលបានការការពារ និងផ្តល់កម្លាំងចិត្តពីដូនតា ព្រោះក្បាច់គុននេះជាក្បាច់គុនរបស់ដូនតាខ្មែរ។
នាពិធីជួបសំណេះសំណាលជាមួយកីឡាករ គ្រូបង្វឹក និងប្រតិភូ កាលពីថ្ងៃទី២២ ខែតុលា លោក ច័ន្ទ សារុន បានរៀបរាប់ថា៖«គុនល្បុក្កតោជាក្បាច់របស់ដូនតា ដូច្នេះកីឡាករយើងកុំមានភ័យខ្លាចឲ្យសោះ ព្រោះយើងមានដូនតាចាំជួយថែរក្សា និងការពារយើង។ ខ្ញុំរំពឹងកីឡាករទាំងអស់នឹងទទួលបានលទ្ធផលនៅលើកនេះ»។
ទោះបីយ៉ាងនេះក្តីប្រធានសហព័ន្ធរូបនេះ ជំរុញឲ្យកីឡាករទាំងអស់ត្រូវយកចិត្តទុកដាក់ និងផ្តោតអារម្មណ៍លើការប្រកួតឲ្យបានល្អ ពិសេសតាំងចិត្តឲ្យមុតមាំ កុំភ័យខ្លាច និងគិតខ្វល់ខ្វាយអ្វីទាំងអស់។ បន្ថែមលើនេះ ត្រូវប្រឹងប្រែងប្រកួតឲ្យអស់ពីសមត្ថភាពក្នុងការស្វែងរកលទ្ធផលល្អណាមួយ ដើម្បីលើកមុខមាត់ និងកិត្តិយសជាតិ។
សម្រាប់លោក អ៊ួ តារា អគ្គលេខាធិការសហព័ន្ធ ការចូលរួមព្រឹត្តិការណ៍នេះ មានផលប្រយោជន៍ច្រើនសម្រាប់ប្រជាជននិងប្រទេសជាតិ ព្រោះមានកីឡាករមកពីប្រទេសជាច្រើនលើពិភពលោកចូលរួម។ ម្យ៉ាងទៀត វាឱកាសក្នុងការផ្សព្វផ្សាយពីកីឡា អត្តសញ្ញាណជាតិមួយនេះ ឲ្យពិភពលោកស្គាល់កាន់តែច្បាស់។ មួយវិញទៀត វាការបើកផ្លូវសម្រាប់គុនល្បុក្កតោ ដែលបានស្នើសុំចុះបញ្ជីក្នុងសម្បត្តិបេតិកភណ្ឌអរូបិយនៃមនុស្សជាតិរបស់អង្គការយូនីស្គូ។
«កម្មវិធីនឹងពិសេសមែនទែនសម្រាប់ប្រជាជន និងប្រទេសជាតិយើង កាលណាយើងបានចូលរួម គឺទទួលបានផលប្រយោជន៍ច្រើន គឺយើងបានបង្ហាញក្បាច់គុនអត្តសញ្ញាណជាតិឲ្យពិភពលោកស្គាល់ ព្រោះទាំងប្រជាជនកូរ៉េ និងប្រទេសជាច្រើនដែលមានក្បាច់គុនអត្តសញ្ញាណ នឹងចូលរួមក្នុងព្រឹត្តិការណ៍នេះ»។ នេះជាការបញ្ជាក់របស់លោក អ៊ួ តារា ដែលបានបន្ថែមថា លោករំពឺងលើវិញ្ញាសាសមយុទ្ធគូបុរស គូនារី និងក្រុមក្នុងការប្រជែងដណ្តើមមេដាយនៅលើកនេះ។
សម្រាប់ការប្រកួតនេះ កម្ពុជានឹងបញ្ជូនកីឡាករ គ្រូបង្វឹក និងប្រតិភូចំនួន៨រូបឲ្យចូលរួម រួមមានលោក អ៊ួ តារា(ប្រធានប្រតិភូ), លោក អ៊ុង ដារិទ្ធ(គ្រូបង្វឹក), កីឡាករ វិ តារា, សយ ផាន់និច, ឌឹម ង៉ែត, គឹម ទិត្យសុវឌ្ឍនៈ, កីឡាការិនី យស់ សញ្ចណា និង ស៊ិន សៀវសៀន។ ពួកគេទាំងនេះត្រូវប្រកួតប្រជែងលើ៦វិញ្ញាសា។
លោក ច័ន្ទ សារុន ប្រធានសហព័ន្ធបានឧបត្ថម្ភថវិកាចំនួន៥ពាន់ដុល្លារ ដើម្បីចំណាយលើថ្លៃសំបុត្រយន្តហោះ និងប្រាក់ហោប៉ៅរបស់កីឡាករ។ លោក អ៊ួ តារា ជឿជាក់ថា បើគ្មានការជួយជ្រោមជ្រែងពីប្រធានសហព័ន្ធ ការចូលរួមលើកនេះក៏មិនអាចដំណើរការបាននោះដែរ។
កម្ពុជាធ្លាប់ចូលរួមក្នុងព្រឹត្តិការណ៍នេះ៣លើករួចមកហើយនៅឆ្នាំ២០១៣, ២០១៥ និង២០១៦ និងធ្លាប់ទទួលបានចំណាត់ថ្នាក់លេខ២ចំនួនពីរលើក គឺនៅឆ្នាំ២០១៣ និង២០១៦។ ប៉ុន្តែដោយសារបញ្ហាខ្វះខាតថវិកា ធ្វើឲ្យកម្ពុជាអវត្តមានពីរលើកនៅឆ្នាំ២០១៧ និង២០១៤ សម្រាប់ការចូលរួមក្នុងព្រឹត្តិការណ៍លំដាប់ពិភពលោកមួយនេះ។
ព្រឹត្តិការណ៍ប្រកួតកីឡាយុទ្ធសិល្ប៍អន្តរជាតិនេះ រៀបចំដោយសហភាពកីឡាយុទ្ធសិល្ប៍ចម្រុះពិភពលោក World Martial Art Union ដែលមានប្រទេសជាង២០ជាសមាជិកចូលរួម។ ការប្រកួតនេះ ប្រព្រឹត្តទៅចន្លោះពីថ្ងៃទី២៦-២៨ ខែតុលា ឆ្នាំ២០១៨ នៅទីក្រុងអ៊ិនឆន ប្រទេសកូរ៉េខាងត្បូង។ ប្រតិភូកីឡាកម្ពុជានឹងចាកចេញពីកម្ពុជានៅថ្ងៃទី២៤ ខែតុលា ឆ្នាំ២០១៨៕