កីឡាអន្តរជាតិ
អន្តរជាតិ
Mourinho សារភាពថា Man Utd មានកម្រិតទាបជាងក្រុមកំពូលនៅអឺរ៉ុបឆ្ងាយណាស់
× Jose Mourinho អ្នកចាត់ការទូទៅ Manchester United ទទួលស្គាល់ថា សម្ថភាពក្រុមរបស់លោកនៅមានកម្រិតទាបណាស់បើធៀបនឹងក្រុមកំពូលនៅអឺរ៉ុបនាពេលបច្ចុប្បន្ន។ លោកលើកឡើងបែបនេះបន្ទាប់ពី Man Utd បរាជ័យក្នុងផ្ទះខ្លួនឯងក្រោមថ្វីជើង Juventus ក្នុងលទ្ធផល ១-០ ពានរង្វាន់ Champions League។
បើតាមការផ្សាយរបស់ DailyMail អ្នកចាត់ការទូទៅសញ្ជាតិព័រទុយហ្គាល់លើកឡើងថាក្លិប Man United ត្រូវតែផ្តល់ប្រាក់បន្ថែមទៀតដើម្បីនាំយកកីឡាករដែលមានទេពកោសល្យមកពង្រឹងក្រុម ប្រសិនបើចង់ប្រជែងជាមួយក្រុមខ្លាំងៗដូចជា Manchester City, Juventus, Real Madrid និង Barcelona ជាដើមនោះ។
«យើងនឹងត្រូវតទល់នឹងគូប្រជែងដ៏ធំជាច្រើនដើម្បីឈ្នះពាន Champions League ហើយយើងបានធ្វើល្អបំផុតហើយតាមដែលអាចធ្វើទៅបាន។ ចាប់តាំងពីការចាប់ឆ្នោតរើសពូលមក យើងដឹងថាយើងនឹងត្រូវប្រកួតប្រជែងជាមួយ Valencia ដើម្បីដណ្តើមតំណែងចំណាត់ថ្នាក់ទី ២ប៉ុណ្ណោះក្នុងពូលនេះ។ យើងនៅមានកម្រិតឆ្ងាយបន្តិចជាមួយនឹង Juventus»។ Mourinho បានសារភាពដូច្នេះ មានន័យថាលោកបានដឹងពីសម្ថភាពរបស់កូនក្រុមដែលមិនអាចប្រជែងយកចំណាត់លេខ១ក្នុងពូល H ជាមួយ Juventus រួចទៅហើយ។
Special One បន្ថែមទៀតថា Juventus បានឈ្នះពានរង្វាន់ក្របខណ្ឌ Serie A ៧រដូវកាលជាប់ៗគ្នាចាប់តាំងពីឆ្នាំ២០១១មក និងឈានដល់ការប្រកួតវគ្គផ្តាច់ព្រ័ត្រ Champions League ដល់ទៅ ២ដងក្នុងរយៈពេល ៤ ឆ្នាំចុងក្រោយ តែពួកគេនៅតែមិនសប្បាយចិត្តនឹងអ្វីដែលពួកគេមាន។
«ពួកគេចង់បានច្រើនជាងនេះ។ ពួកគេចង់បានកីឡាករ Cristiano Ronaldo ពួកគេអាចយកបាន ចង់បានកីឡាករ Leonardo Bonucci ដែលសុទ្ធតែជាកីឡាករល្អបំផុតលើលោក។ ពួកគេជាក្លិបដ៏ធំ ហើយដើម្បីបំពេញបំណងប្រាថ្នា ពួកគេហ៊ានធ្វើអ្វីគ្រប់យ៉ាងដោយមិនត្រឹមតែឈ្នះ Champions League នោះទេ គឺពួកគេចង់បានពានដល់ទៅ៣ក្នុង១រដូវកាល»។
សូមបញ្ជាក់ថា Mourinho បានចំណាយប្រាក់លើសពី ៥៥០លានផោន (៧១៤លានដុល្លារអាមេរិក) រួចទៅហើយ ចាប់តាំងពីឡើងដឹកនាំក្រុមបិសាចក្រហមក្នុងឆ្នាំ២០១៦មក។
សម្រាប់រដូវកាល ២០១៨-២០១៩នេះ Man Utd ទទួលលទ្ធផលមិនគាប់ប្រសើរនោះទេ ដោយរកបានតែ១៤ពិន្ទុប៉ុណ្ណោះ ក្នុងចំណោម៩ប្រកួត ស្ថិតក្នុងចំណាត់ថ្នាក់ទី១០បណ្តោះអាសន្ន ក្នុងតារាង Premier League៕
Tag:
បាល់ទាត់
Jose Mourinho
Manchester United
© រក្សាសិទ្ធិដោយ thmeythmey.com