អង្គការលើកលែងទោសអន្តរជាតិ ស្នើឲ្យបារាំងផ្អាកលក់អាវុធឲ្យអារ៉ាប៊ីសាអូឌីតដែលបន្តរំលោភសិទ្ធិមនុស្ស

អន្តរជាតិ

អង្គការលើកលែងទោសអន្តរជាតិ ស្នើឲ្យបារាំងផ្អាកលក់អាវុធឲ្យអារ៉ាប៊ីសាអូឌីតដែលបន្តរំលោភសិទ្ធិមនុស្ស

24, Oct 2018 , 9:19 pm

រូបភាព

ដោយ: សៅ ផលនិស្ស័យ (Sao Phal Niseiy)

អង្គការលើកលែងទោសអន្តរជាតិ (Amnesty International) បានទទូចឲ្យបារាំងផ្អាកការលក់សព្វាវុធឲ្យសេដ្ឋីប្រេងអារ៉ាប៊ីសាអូឌីត ជុំវិញការរំលោភបំពានសិទ្ធិមនុស្សធ្ងន់ធ្ងរនៅយេម៉ែន និងពាក់ព័ន្ធការសម្លាប់អ្នកសារព័ត៌មានរិះគន់រដ្ឋាភិបាលលោក Jamal Khashoggi។

ប្រធានកម្មវិធីសម្រាប់ការទទួលខុសត្រូវនៃអង្គការលើកលែងទោសអន្តរជាតិប្រចាំប្រទេសបារាំងលោក Yves Prigent បានអំពាវនាវជាថ្មីនៅថ្ងៃអង្គារទី ២៣ខែតុលាថា ឲ្យរដ្ឋាភិបាលបារាំងពិចារណាឡើងវិញពីការបន្តលក់សព្វាវុធឲ្យរដ្ឋាភិបាលអារ៉ាប៊ីសាអូឌីត។

មន្ត្រីអង្គការអន្តរជាតិរូបនេះបានអះអាងថា អារ៉ាប៊ីសាអូឌីតមានជាប់ពាក់ព័ន្ធនឹងការរំលោភសិទ្ធិមនុស្សច្រើនណាស់ដែលរួមបញ្ចូលទាំងឧក្រិដ្ឋកម្មសង្គ្រាមនៅយេម៉ែនតាំងពីឆ្នាំ ២០១៥ និងការធ្វើឃាតអ្នកកាសែតល្បីឈ្មោះលោក Khashoggi នៅដើមខែតុលាកន្លងទៅផង។

ការអំពាវនាវរបស់លោក Yves កើតឡើងស្របពេលដែលប្រធានាធិបតីតួកគី Recep Tayyip Erdogan បានចេញបកស្រាយជាសាធារណៈថា ករណីសម្លាប់លោក Khashoggi ត្រូវបានអារ៉ាប៊ីសាអូឌីតរៀបចំគម្រោងទុកជាមុនច្រើនថ្ងៃមកហើយ។ ប៉ុន្តែមេដឹកនាំរូបនេះនៅតែទាមទារឲ្យក្រុងរីយ៉ាដ ផ្តល់ចម្លើយថាតើសាកសពលោក Khashoggi នៅទីណា ហើយអ្នកណានៅពីក្រោយគម្រោងឃាតកម្មមានលក្ខណៈនយោបាយនេះដែរ។

ត្រឡប់មកវិញ រយៈពេលជាយូរមកហើយដែលអង្គការលើកលែងទោសអន្តរជាតិនេះបានបន្តទទូចឲ្យបារម្ភព្យួររាល់ការលក់អាវុធទាំងនោះឲ្យអារ៉ាប៊ីសាអូឌីត។ នេះក៏ដោយសារក្រុងប៉ារីសជាប្រទេសហត្ថលេខីនៃសន្ធិសញ្ញាកិច្ចពាណិជ្ជកម្មអាវុធដែលជាលិខិតូបករណ៍អន្តរជាតិដែលគ្រប់គ្រងរាល់ការធ្វើពាណិជ្ជកម្មអាវុធក្របខណ្ឌអន្តរជាតិ។

យ៉ាងណាក៏ដោយ រដ្ឋមន្ត្រីការពារជាតិបារាំងលោកស្រី Florence Parly បានបកស្រាយថា រដ្ឋាភិបាលបារាំងនាំចេញអាវុធក្នុងតម្លៃប្រហែល ១២,៦ ពាន់លានដុល្លារឯណោះទៅរដ្ឋអារ៉ាប់មួយនេះចាប់ពីឆ្នាំ ២០០៨ ដល់ ២០១៧ ដែលវាមានសារសំខាន់សម្រាប់សេដ្ឋកិច្ចនិងការបង្កើតការងារសម្រាប់ប្រជាជនបារាំង។

លោកស្រីក៏បានពន្យល់បន្ថែមដែរថា ក្នុងការលក់សព្វាវុធឲ្យអារ៉ាប៊ីសាអូឌីតនេះដែរ ក៏បារាំងបានធ្វើឡើងដោយហ្មត់ចត់និងប្រុងប្រយ័ត្នជាទីបំផុតតាមនីតិវិធី និងលក្ខខណ្ឌវាយតម្លៃច្រើនដំណាក់កាលដែរ។ រាល់ការអនុញ្ញាតនេះគឺធ្វើឡើងដោយគណៈកម្មការអន្តរក្រសួង និងមានការឯកភាពពីនាយករដ្ឋមន្ត្រីផង ដោយផ្អែកលើការវាយតម្លៃយ៉ាងប្រុងប្រយ័ត្នតាមសំណុំរឿងនីមួយៗ។ ក្នុងលក្ខខណ្ឌសម្រាប់ការវាយតម្លៃទាំងនោះមានដូចជាការគោរពសិទ្ធិមនុស្ស និងចូលរួមថែរក្សាសន្តិភាព និងស្ថិរភាពជាដើមដែរ។

បារាំងត្រូវបានគេស្គាល់ច្បាស់ថា ជាប្រទេសមួយក្នុងចំណោមប្រទេសប្រាំដែលផ្គត់ផ្គង់សព្វាវុធច្រើនជាងគេឲ្យអារ៉ាប៊ីសាអូឌីតក្នុងរយៈពេលប៉ុន្មានឆ្នាំចុងក្រោយ។ ប្រទេសនេះលក់កាំភ្លើង គ្រឿងបន្លាស់ គ្រាប់ កាំភ្លើងធំ និងផ្តល់សេវាជួសជុលសព្វាវុធជាដើម។ កាលពីខែសីហាកន្លងទៅ បារាំងបានចុះកិច្ចព្រមព្រៀងធំៗចំនួន ២០ ជាមួយអារ៉ប៊ីសាអូឌីតដែលមានតម្លៃប្រហែល ១៨ពាន់លានដុល្លារឯណោះ។ ព័ត៌មាននេះត្រូវបានគេបង្ហើបនៅក្រោយទស្សនកិច្ចរបស់រជ្ជទាយាទអារ៉ាប៊ីសាអូឌីត Mohammed bin Salman មកកាន់ក្រុងប៉ារីស៕