ADB ផ្តល់ថវិកាជិត២៥០លានដុល្លារ ឲ្យកម្ពុជាសម្រាប់អភិវឌ្ឍគម្រោងចំនួន៤

ជាតិ

ADB ផ្តល់ថវិកាជិត២៥០លានដុល្លារ ឲ្យកម្ពុជាសម្រាប់អភិវឌ្ឍគម្រោងចំនួន៤

24, Oct 2018 , 9:39 pm

រូបភាព

លោក អូន ព័ន្ធមុនីរ័ត្ន រដ្ឋមន្តី្រក្រសួងសេដ្ឋកិច្ច និងហិរញ្ញវត្ថុ ជាមួយលោកស្រី Sunniya Durrani-Jamal និយិកាស្ថានតំណាងធនាគារអភិវឌ្ឍន៍អាស៊ីប្រចាំកម្ពុជា (រូបភាពបានពីក្រសួងសេដ្ឋកិច្ច និងហិរញ្ញវត្ថុ)

ដោយ: អ៊ូ សុខមាន (OU Sokmean)

ភ្នំពេញ៖ ធនាគារអភិវឌ្ឍន៍អាស៊ីប្រចាំកម្ពុជា (ADB)នឹងផ្តល់ហិរញ្ញប្បទានជិត ២៥០លានដុល្លារ ដល់កម្ពុជា សម្រាប់អនុវត្តន៍លើគម្រោង និងកម្មវិធីអភិវឌ្ឍចំនួន៤ ដើម្បីរួមចំណែកកាត់បន្ថយភាពក្រីក្រ និងលើកកម្ពស់ជីវភាពរបស់ប្រជាជន។ ចំនួនទឹកប្រាក់ទាំងនេះត្រូវបានបែងចែកយ៉ាងច្បាស់លាស់ ទៅតាមគម្រោងអនុវត្តនីមួយៗ នៅកម្ពុជា។ នេះបើយោងតាមសេចក្តីជូនដំណឹងរបស់ក្រសួងសេដ្ឋកិច្ច និងហិរញ្ញាវត្ថុ នាថ្ងៃទី២៤តុលា។

គម្រោង និងកម្មវិធីទាំង៤នោះមាន៖

១. កម្មវិធីអភិវឌ្ឍន៍វិស័យអប់រំកម្រិតមធ្យមសិក្សាទុតិយភូមិជំហានទី២ គ្រោងចំណាយ ៥៣.៥០លានដុល្លារ សម្រាប់អនុវត្តយុទ្ធសាស្ត្រវិស័យអប់រំឆ្នាំ២០១៤-២០១៨ និងការព្យាករណ៍តម្រូវការ អភិវឌ្ឍន៍វិស័យអប់រំឆ្នាំ២០២០ ព្រមទាំងគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥។

២. គម្រោងកែលម្អការគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ គ្រោងចំណាយ ៩៧.៧០លានដុល្លារ។ គម្រោងនេះសម្រាប់ការអភិវឌ្ឍ និងការកែលម្អហេដ្ឋារចនាសម្ព័ន្ធរូបវន្ត ក្រុងអាទិភាពចំនួន៣ (ក្រុងស្ទឹងសែន, ក្រុងសិរីសោភ័ណ្ឌ និងក្រុងបាត់ដំបង) តាមរយៈការសាងសង់ស្ថានីយ៍ប្រព្រឹត្តិកម្មទឹកកខ្វក់ចំនួន៣ ប្រព័ន្ធបណ្តាញលូ និងសាងសង់ទីលានចាក់សំរាម។ លើសពីនេះ ជួយពង្រឹងសមត្ថភាពស្ថាប័នពាក់ព័ន្ធ ដើម្បីផ្តល់សេវា និងកែលម្អគោលនយោបាយគ្រប់គ្រងកាកសំណល់រឹង ទឹកកខ្វក់ បណ្តាញលូរំដោះទឹកភ្លៀងក្រុង និងបរិស្ថានប្រកបដោយនិរន្តរភាពផងដែរ។

៣. គម្រោងអភិវឌ្ឍន៍ទីក្រុងរបៀង នៃមហាអនុតំបន់មេគង្គជំហានទី៤ គ្រោងចំណាយថវិកាវិនិយោគ ៨៨.៥០លានដុល្លារ សម្រាប់ការពង្រីកសេវាសាធារណៈនៅទីប្រជុំជន ដែលនឹងជួយលើកកម្ពស់ សមាហរណកម្មសេដ្ឋកិច្ច។ តាមរយៈការអភិវឌ្ឍក្រុងរបៀង បានផ្តល់អាទិភាព ទៅឲ្យក្រុងកំពង់ចាម ក្រចេះ និងស្ទឹងត្រែង ដែលជាក្រុងរបៀងនៃមហាអនុតំបន់មេគង្គ។ គម្រោងនេះ នឹងសាងសង់ស្ថានីយ៍ ប្រព្រឹត្តិកម្មទឹកកខ្វក់ ការតភ្ជាប់ប្រព័ន្ធលូរំដោះទឹកដល់ប្រជាជន ការសាងសង់ទីលានចាក់សំរាម និងការសាងសង់ស្ថានីយ៍បូមទឹកកខ្វក់។

ដោយឡែក ទឹកប្រាក់៣០.៨៩លានដុល្លារ គ្រោងចំណាយលើការអភិវឌ្ឍហេដ្ឋារចនាសម្ព័ន្ធទេសចរណ៍ ក្នុងមហានុតំបន់មេគង្គជំហានទី២។ គម្រោងនេះអនុវត្តឡើង ក្នុងគោលបំណងបង្កើនការទាក់ទាញទេសចរណ៍ក្នុងខេត្តគោលដៅចំនួន២គឺ កែប ព្រះសីហនុ ដោយផ្តោតលើការធ្វើឲ្យប្រសើរឡើង នូវហេដ្ឋារចនាសម្ព័ន្ធផ្លូវថ្នល់ និងកសាងកំពង់ផែទេសចរណ៍ខ្នាតតូចចំនួន២។

គម្រោង និងកម្មវិធីទាំង៤ខាងលើ បានធ្វើឡើងក្រោមពិធីចុះហត្ថលេខាលើកិច្ចព្រមព្រៀងហិរញ្ញប្បទាន រវាងលោក អូន ព័ន្ឋមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយលោកស្រី Sunniya Durrani-Jamal នាយិកាស្ថានតំណាងធនាគារអភិវឌ្ឍន៍អាស៊ីប្រចាំកម្ពុជា។

រូបភាពបានពីក្រសួងសេដ្ឋកិច្ច និងហិរញ្ញវត្ថុ

ស្ថិតនៅក្នុងពិធីនេះផងដែរ លោក អូន ព័ន្ឋមុនីរ័ត្ន បានបញ្ជាក់ថា ទៅកាន់ លោកស្រី Sunniya Durrani-Jamalផងដែរ អំពីកិច្ចសហប្រតិបត្តិការ ADB លើការផ្តល់ហិរញ្ញប្បទានឲ្យកម្ពុជាកន្លងមក រួមទាំងគម្រោងទាំង៤ខាងលើនេះ មានទំហំទឹកប្រាក់ប្រមាណ ៣,១៩ពាន់លានដុល្លារ។ ដោយឡែក ហិរញ្ញប្បទានឥតសំណងមានប្រមាណ ៤៩០លានដុល្លា៕