លោក Mauricio Pochettino អ្នកចាត់ការទូទៅ Tottenham Hotspur បានព្រមានអ្នកគាំទ្រខ្លួន ឲ្យមានឥរិយាបទសមរម្យមុនពេលពួកគេធ្វើដំណើរទៅកាន់ទឹកដីរបស់ PSV Eindhoven ក្នុងជំនួបប្រកួត Champions League នៅរាត្រីទី២៤ ខែតុលា វេលាម៉ោង១១:៥៥នាទី [ម៉ោងនៅកម្ពុជា] ដោយទទូចកុំឲ្យមានការរំខានណាមួយនៅពេលក្រុមទាំងពីរជួបគ្នា។ នេះបើតាមការផ្សាយរបស់ទីភ្នាក់ងារព័ត៌មាន Reuters។
Spurs ប៉ះ PSV លើកចុងក្រោយនៅក្នុងការប្រកួតពានរង្វាន់ UEFA Cup (Europa League) ឆ្នាំ ២០០៨ ដែលជាជំនួបប្រកួតមួយត្រូវបានរំខានដោយការប៉ះទង្គិចគ្នារវាងក្រុមអ្នកគាំទ្រទាំងពីរ។
ការប៉ះទង្គិចគ្នារវាងក្រុមអ្នកគាំទ្រ Spurs និង PSV កាលពីឆ្នាំ២០០៨
«ដំបូន្មានរបស់ខ្ញុំគឺត្រូវយកចិត្តទុកដាក់អំពីអ្វីដែលអ្នកត្រូវធ្វើ។ ហើយនោះគឺខ្ញុំចង់និយាយពីការគាំទ្រក្រុមរបស់អ្នកឲ្យដែនកំណត់ ហើយព្យាយាមឲ្យពួកគេធ្វើតាមអ្វីដែលយើងរំពឹងចង់បាន។ អ្នកចាត់ការសញ្ជាតិអាហ្សង់ទីនលើកឡើងបែបនេះនៅសន្និសីទកាសែតកាលពីថ្ងៃទី២៣ ខែតុលា»។
«យើងចង់ឲ្យព័ត៌មានថ្ងៃស្អែកចុះផ្សាយពីអ្វីដែលមានតែនៅលើទីលាន»។ Pochettino បន្ថែមដូច្នេះព្រោះលោកមិនចង់ឃើញបញ្ហាកើតឡើងរវាងក្រុមអ្នកគាំទ្រទាំងពីរដដែលៗដូចមុនឡើយ។
ក្រុមពីហូឡង់ PSV និង Spurs ពីអង់គ្លេស កំពុងត្រូវការពិន្ទុជាចាំបាច់សម្រាប់ការប្រកួតវគ្គសន្សំពិន្ទុពូល B លើកនេះ បន្ទាប់ពីបរាជ័យទាំង២ប្រកួតដំបូងដូចគ្នា។ ក្រុមទាំង២ស្ទើរតែបញ្ចប់ក្តីសង្ឃឹមរបស់ពួកគេក្នុងការឈានទៅវគ្គ ១៦ ក្រុមចុងក្រោយទៅហើយ ដ្បិត Barcelona និង Inter Milan ដែលត្រូវប៉ះគ្នាយប់នេះដែរនោះសុទ្ធតែទទួលបាន ៦ ពិន្ទុពេញដូចគ្នា។
បើទោះបីមិនគាប់ប្រសើរសម្រាប់ការបង្ហាញខ្លួនក្នុងក្របខណ្ឌកំពូលអឺរ៉ុបក៏ដោយ ប៉ុន្តែក្រុមរហស្សនាមមាន់ខ្នាយមាស រីករាយនឹងពិន្ទុដ៏ល្អបំផុតរបស់ពួកគេពីការប្រកួត ៩ លើកនៅ Premier League ដោយឈ្នះ៧ ចាញ់២ មាន២១ពិន្ទុ និងស្ថិតនៅចំណាត់ថ្នាក់ទី៥ បណ្តោះអាសន្ន៕
សម្រាប់ការប្រកួតគូដទៃ៖
- ពូល A
Club Brugge Vs Monaco (ម៉ោង ១១:៥៥នាទីយប់)
Borussia Dortmund Vs Atletico Madrid (ម៉ោង ២:០០នាទី)
- ពូល B
Barcelona Vs Inter Minal (ម៉ោង ២:០០នាទី)
- ពូល C
Liverpool Vs FK Crvena Zvezda (ម៉ោង ២:០០នាទី)
Paris Saint Germain Vs Napoli (ម៉ោង ២:០០នាទី)
- ពូល D
Galatasaray Vs Schalke 04 (ម៉ោង ២:០០នាទី)
Lokomotiv Moscow Vs FC Porto (ម៉ោង ២:០០នាទី)