ជាតិ
ពីខែមករាដល់ខែតុលា មានផ្សោត៥ងាប់ និងកើត៩ រូបពី អង្គការ WWF
× ភ្នំពេញ៖ ចាប់ពីខែមករា ដល់ខែតុលា ឆ្នាំ២០១៨ សត្វផ្សោតចំនួន៥ បានងាប់ និងចំនួន៩ បានកើត។ ចំនួននេះជាសញ្ញាវិជ្ជមានសម្រាប់សត្វផ្សោតមេគង្គ ហើយជាលទ្ធផលជោគជ័យមួយសម្រាប់ការខិតខំអភិរក្សរបស់ក្រុមអង្គការ WWF និងដៃគូពាក់ព័ន្ធ។
ជាជោគជ័យមួយសម្រាប់អង្គការ WWF ដែលបានធ្វើឲ្យកំណត់ត្រាថ្មីនៃអត្រាកំណើត និងងាប់របស់សត្វផ្សោតមានការប្រែប្រួល។ ជាក់ស្ដែង ចាប់ពីខែមករា ដល់ខែតុលា ឆ្នាំ២០១៨ មានសត្វផ្សោតចំនួន៥បានងាប់ តែមានសត្វផ្សោតកើតចំនួន៩។ បើធៀបនឹងឆ្នាំ២០១៧ ក្នុងរយៈពេលដូចគ្នានេះមានសត្វផ្សោត២បានស្លាប់ និងមានសត្វផ្សោត៩ បានកើត។ នេះបើតាមរបាយការណ៍របស់អង្គការ WWF ដែលចេញផ្សាយនៅថ្ងៃទី២៦ ខែតុលា ក្នុងឱកាសទិវាសត្វផ្សោតទន្លេមេគង្គក្នុងខេត្តក្រចេះ។
របាយការណ៍ដដែលបានបន្តថា ចំនួនអត្រានៃការងាប់របស់សត្វផ្សោតមានការថយចុះ ខណៈដែលអត្រាកំណើតបានកើតឡើង។ ចំនួននេះជាសញ្ញាវិជ្ជមានមួយដែលបង្ហាញលទ្ធផលនៃកិច្ចប្រឹងប្រែងរបស់អង្គការ WWF និងដៃគូពាក់ព័ន្ធ។
បច្ចុប្បន្នសត្វផ្សោតទន្លេមេគង្គមានចំនួន៩២ក្បាល។ ចំនួននេះត្រូវបានអង្គការWWF ថានៅជាចំនួនតិចតួចនៅឡើយបើប្រៀបធៀបទៅនឹងមួយសតវត្សរ៍មុន ដែលចំនួនសត្វផ្សោតទន្លេមេគង្គត្រូវបានគេប៉ាន់ប្រមាណថាអាចមានប្រហែល ៣០០ក្បាល ដែលរស់នៅក្នុងទន្លេមេគង្គ និងបឹងទន្លេសាប។
បើតាមរបាយការណ៍របស់អង្គការWWF បញ្ហាប្រឈមដែលគំរាមកំហែងចម្បងលើសត្វផ្សោតមេគង្គគឺ ការនេសាទខុសច្បាប់ ជាពិសេសការប្រើមងក្នុងតំបន់ការពារសត្វផ្សោត។ ជាមួយគ្នានេះគម្រោងវារីអគ្គិសនីថ្មីៗ នៅតាមបណ្ដោយទន្លេមេគង្គ ក៏ជាការព្រួយបារម្ភធំមួយដែរ ចំពោះភាពរស់រានមានជីវិតរបស់សត្វផ្សោតទន្លេមេគង្គ និងជីវភាពរបស់សហគមន៍មូលដ្ឋាន នាពេលអនាគត។
នៅឆ្នាំ២០១៨នេះ ចំនួនកំណើនសត្វផ្សោតទន្លេមេគង្គ ត្រូវបានគេទទួលស្គាល់ថាជាប្រភេទសត្វផ្សោត Irrawaddy Dolphins លើកដំបូងបង្អស់ក្នុងប្រទេសកម្ពុជា៕
Tag:
សត្វផ្សោត
ទន្លេមេគង្គ
© រក្សាសិទ្ធិដោយ thmeythmey.com