ជាតិ
សេដ្ឋកិច្ច
កម្ពុជា និងតួកគី នឹងមានជើងហោះហើរត្រង់ក្នុងពេលខាងមុខនេះ
× ភ្នំពេញ៖ ជើងហោះហើរត្រង់ដឹកអ្នកដំណើរ តួកគី-កម្ពុជា នឹងកើតមានក្នុងពេលខាងមុខនេះបន្ទាប់ពីមានការចុះកិច្ចព្រមព្រៀងស្តីពីកិច្ចសហប្រត្តិបត្តិការវិស័យទេសចរណ៍រវាងប្រទេសទាំងពីរ នៅទីក្រុងអ៊ីស្តង់ប៊ុល កាលពីថ្ងៃទី ២២ តុលា ២០១៨។
ក្រសួងទេសចរណ៍បានឲ្យដឹងថា ក្រុមហ៊ុន Turkish Airlines នឹងហោះហើរត្រង់ពីតួកគីមកកម្ពុជា នៅពេលដ៏ខ្លីខាងមុខនេះ ខណៈបច្ចុប្បន្នក្រុមហ៊ុន Turkey Airlines បានធ្វើការហោះហើរត្រង់មកកម្ពុជា ប្រចាំសប្តាហ៍ដើម្បីដឹកជញ្ជូនទំនិញ (Cargo) ។
សព្វថ្ងៃនេះ ក្រុមហ៊ុន Turkish airlines បានភ្ជាប់ជើងហោះហើរត្រង់ពីទីក្រុងអ៊ីស្តានប៊ុលមកកាន់តំបន់អាស៊ានមាន ដូចជា ម៉ាឡេស៊ី ថៃឡង់ សិង្ហបុរី និងវៀតណាម។
តួកគីជាគោលដៅទេសចរណ៍ដ៏សំខាន់របស់ពិភពលោក ដែលមានប្រជាពលរដ្ឋប្រមាណ៨០ លាននាក់ ។ ក្នុងឆ្នាំ២០១៧កន្លងទៅ ទេសចរតួកគីមកកម្ពុជាមានចំនួន ៨៥០០នាក់ ក្នុងកំនើន ២២,៧ភាគរយ។
កម្ពុជា និងតួកគីបានចុះហត្តលេខាយោគយល់គ្នាលើចំណុចដូចជា មិនយកពន្ធត្រួតគ្នារវាងកម្ពុជានិង តួកគី ការសម្របសម្រួលការធ្វើដំណើរ ជំរុញការតភ្ជាប់តាមផ្លូវអាកាស ការសិក្សាទីផ្សារ និងផ្សព្វផ្សាយរួមគ្នា ការផ្លាស់ប្តូរព័ត៌មាន ទិន្នន័យ និងឯកសារគោលនយោបាយ ច្បាប់ទេសចរណ៍ ការអភិវឌ្ឍមូលធនមនុស្ស និងការបណ្តុះបណ្តាលជំនាញវីជ្ជាជីវៈទេសចរណ៍ ការផ្លាស់ប្តូរទស្សនកិច្ចរវាងផ្នែកសាធារណៈ និងឯកជនក្នុងវិស័យទេសចរណ៍ ដើម្បីបង្កើតបណ្តាញធុរកិច្ចទេសចរណ៍ និងគម្រោងវិនិយោគទេសចរណ៍ និងចូលរួមរាល់ព្រឹត្តិការណ៍ សិក្ខាសាលា សន្និសីទ និងកិច្ចប្រជុំនានាទៅវិញទៅមក។
គួររំលឹក ថា តួកគី និងកម្ពុជាបានភ្ជាប់ទំនាក់ទំនងនយោបាយការទូតតាំងពីឆ្នាំ១៩៦៨មកម្ល៉េះ ហើយបានភ្ជាប់លើទំនាក់ទំនង នយោបាយការទូតឡើងវិញនៅថ្ងៃឆ្នាំ១៩៩៤។ ហើយកម្ពុជាគ្រោងនឹងបើកស្ថានឯកអគ្គរាជទូតរបស់ខ្លួន នៅទីក្រុងអង់ការ៉ានៅឆ្នាំ២០១៩ ខាងមុខនេះ៕
Tag:
តួកគី
ហោះហើរត្រង់
© រក្សាសិទ្ធិដោយ thmeythmey.com