អន្តរជាតិ
ឥណ្ឌូណេស៊ី៖យន្តហោះក្រុមហ៊ុន Lion Air ដែលធ្លាក់មានមនុស្សទាំងអស់ ១៨៨នាក់
× យន្តហោះដឹកអ្នកដំណើរមួយគ្រឿងរបស់ក្រុមហ៊ុនឥណ្ឌូណេស៊ី Lion Air បានធ្លាក់នៅថ្ងៃចន្ទទី ២៩ ខែតុលានេះ ពេលចាកចេញពីរដ្ឋធានីហ្សាការតាទៅកាន់កោះ Bangka Balitung។ ក្រុមស្វែងរក និងសង្គ្រោះឥណ្ឌូណេស៊ីកំពុងចេញប្រតិបត្តិការ ប៉ុន្តែមូលហេតុនៃការធ្លាក់មិនទាន់ត្រូវបានគេដឹងនៅឡើយទេ។
ទីភ្នាក់ងាររុករកនិងសង្គ្រោះឥណ្ឌូណេស៊ី បានបញ្ជាក់ថា យន្តហោះដែលមានជើងហោះហើរ JT-610 បានបាត់ពីប្រព័ន្ធទំនាក់ទំនងរយៈពេលត្រឹមតែ ១៣ នាទីប៉ុណ្ណោះក្រោយហោះចេញពីក្រុងហ្សាការតានៅម៉ោង ៦និង២០នាទីព្រឹកថ្ងៃចន្ទនេះ។
យោងតាមសារព័ត៌មាន BBC លោក Yusuf Latif ប្រធានទីភ្នាក់ងារនេះបានថ្លែងប្រាប់អ្នកសារព័ត៌មានដូច្នេះ៖ «យន្តហោះ JT-610 ពិតជាបានធ្លាក់ពិតមែន»។ មន្ត្រីរូបនេះបន្ថែមថា យន្តហោះនេះបានធ្លាក់ចូលទៅក្នុងសមុទ្រពេលបាត់ចេញពិប្រព័ន្ធទំនាក់ទំនងនោះ។
ចំណែកយន្តហោះក្រុមហ៊ុន Lion Air ដែលធ្លាក់នេះមានម៉ាក់ប៊ូអ៊ីង 737 ដែលអាចដឹកអ្នកដំណើរបានរហូតដល់ ២០០នាក់ឯណោះ។ ភ្លាមៗនោះ ខាងអាជ្ញាធរមិនអាចបញ្ជាក់ច្បាស់ពីចំនួនអ្នកដំណើរនៅលើយន្តហោះឡើយ។ ប៉ុន្តែប៉ុន្មានម៉ោងក្រោយ ទីភ្នាក់ងារព័ត៌មាន AFP ផ្សាយថា ក្រសួងដឹកជញ្ជូនឥណ្ឌូណេស៊ីបានចេញមុខប្រកាសថា អ្នកដំណើរ និងអ្នកបម្រើការងារនៅលើយន្តហោះមានរហូតដល់ ១៨៨នាក់ឯណោះ។
លោក Sindu Rahayu អគ្គនាយកនៃអគ្គនាយកដ្ឋានដឹកជញ្ជូន និងអាកាសចរណ៍ស៊ីវិលឥណ្ឌូណេស៊ីបានបញ្ជាក់ដូច្នេះថា៖«យន្តហោះដឹកអ្នកដំណើរ ១៧៨ ក្មេងតូចម្នាក់ ទារកពីរ រួមជាមួយអ្នកបើកបរពីរនាក់ និងអ្នកបម្រើប្រាំនាក់ផង។ សរុបទាំងអស់ ១៨៨នាក់»។
ឥណ្ឌូណេស៊ីពឹងផ្អែកសំខាន់លើការធ្វើដំណើរតាមផ្លូវអាកាសដើម្បីភ្ជាប់ទៅកាន់កោះផ្សេងទៀតរាប់ពាន់ទូទាំងប្រទេស។ ប៉ុន្តែទោះជាបែបនេះក្តី សុវត្ថិភាពអាកាសចរណ៍ឥណ្ឌូណេស៊ីស្ថិតនៅកម្រិតទាបណាស់ ហើយកន្លងមកប្រទេសនេះរងគ្រោះច្រើនដងដោយសារឧបទ្ទវហេតុធ្លាក់យន្តហោះនេះ៕
© រក្សាសិទ្ធិដោយ thmeythmey.com