Real Madrid តែងតាំង Solari ជំនួស Lopetegui ដែលទើបបញ្ចប់ពីតំណែង

កីឡាអន្តរជាតិ

អន្តរជាតិ

Real Madrid តែងតាំង Solari ជំនួស Lopetegui ដែលទើបបញ្ចប់ពីតំណែង

30, Oct 2018 , 10:42 am

រូបភាព

ដោយ: ទេព ពិទូរ្យ

ក្លិប Real Madrid បានប្រកាសចែកផ្លូវជាមួយអ្នកចាត់ការទូទៅលោក Julen Lopetegui ក្រោយដឹកនាំក្រុមបានរយៈពេលជាង៤ខែជាមួយនឹងលទ្ធផលមិនគាប់ប្រសើរ។ ការសម្រេចនេះ បន្ទាប់ពីមានកិច្ចប្រជុំមួយរបស់ក្រុមប្រឹក្សាភិបាលក្លិបនេះ នៅថ្ងៃទី ២៩ ខែតុលា ឆ្នាំ២០១៨។

អ្នកចាត់ការសញ្ជាតិអេស្ប៉ាញរូបនេះ បានទទួលតំណែងជំនួសលោក Zinedine Zidane កាលពីខែមិថុនាកន្លងទៅ។ បន្ទាប់ពីបាក់មុខនៅ El Clasico ៥-១ ក្រោមថ្វីជើង Barcelona កាលពីចុងសប្តាហ៍នេះ បានធ្វើឲ្យ Real មានកំណត់ត្រាចាញ់៣លើកជាប់គ្នានៅ La Liga គិតចាប់ពីឆ្នាំ២០០៩ និងជាការបរាជ័យទី ៥ ក្នុងការប្រកួត ៦ លើកចាប់តាំងពីបើករដូវកាលថ្មីមក។

សេចក្តីថ្លែងការណ៍ក្លិបបានលើកឡើងថា មិនមានភាពស្មើគ្នានោះទេរវាងគុណភាពរបស់កីឡាករ Real Madrid ជាមួយនឹងលទ្ធផលដែលសម្រេចបានរហូតសព្វថ្ងៃនេះ។ មានន័យថាក្នុងចំណោមកីឡាករ៣០នាក់ មាន៨នាក់កំពុងស្ថិតក្នុងបញ្ជីឈ្មោះ ដើម្បីប្រជែងពាន Ballon d'Or ឆ្នាំ ២០១៨ ប៉ុន្តែបែជាទទួលបរាជ័យដែលមិនគួរឲ្យជឿ។

ក្រោមការដឹកនាំរបស់លោក Lopetegui វ័យ៥២ឆ្នាំ ម្ចាស់ការពារជើងឯក Champions League នេះ រកបានតែ១៤ពិន្ទុប៉ុណ្ណោះក្នុងចំណោម ១០ប្រកួតនៅ La Liga ក្នុងនោះឈ្នះ៤ ចាញ់៤ និងស្មើ២ ស្ថិតនៅចំណាត់ថ្នាក់ទី៩។

អត្ថបទទាក់ទង

Conte អាចនឹងឡើងដឹកនាំ Real តែ Lopetegui សង្ឃឹមក្លិបផ្តល់ឱកាសបន្ត

ក្រោយប្រកាសចែកផ្លូវជាមួយអតីតគ្រូជម្រើសជាតិអេស្ប៉ាញ ក្លិបរហស្សនាមស្តេចស ក៏បានចាត់តាំងឲ្យលោក Santiago Solari ដែលគ្រូបង្វឹកក្រុមឈុត B របស់ Real Madrid ឡើងមកជំនួសតំណែងនេះបណ្តោះអាសន្ន។

លោក Santiago Solari ដែលត្រូវដឹកនាំ Real Madrid បណ្តោះអាសន្ន

Real នឹងត្រូវប្រកួតជាមួយ Valladolid ក្នុងក្របខណ្ឌកំពូលអេស្ប៉ាញ នៅរាត្រីថ្ងៃសៅរ៍ សប្តាហ៍នេះ មុនធ្វើដំណើរទៅជួប Viktoria Plzen នៅ Champions League នៅថ្ងៃទី៧ ខែវិច្ឆិកា៕