FIFA ពិន័យប្រធានសហព័ន្ធហ្គាណា មិនឲ្យមានសកម្មភាពក្នុងបាល់ទាត់មួយជីវិត

កីឡាអន្តរជាតិ

អន្តរជាតិ

FIFA ពិន័យប្រធានសហព័ន្ធហ្គាណា មិនឲ្យមានសកម្មភាពក្នុងបាល់ទាត់មួយជីវិត

31, Oct 2018 , 9:19 pm

រូបភាព

ដោយ: ទេព ពិទូរ្យ

សហព័ន្ធកីឡាបាល់ទាត់អន្តរជាតិ (FIFA) ហាមអតីតប្រធានសហព័ន្ធកីឡាបាល់ទាត់ហ្គាណា (GFA) លោក Kwesi Nyantakyi មិនឲ្យមានសកម្មភាពក្នុងវិស័យកីឡាបាល់ទាត់អស់មួយជីវិតបន្ទាប់ពីរកឃើញថាលោក បានប្រព្រឹត្តបទល្មើស និងការរំលោភបំពានជាច្រើនដែលរាប់បញ្ចូលទាំងការស៊ីសំណូក និងអំពើពុករលួយជាដើម។

ទីភ្នាក់ងារព័ត៌មាន Reuters ផ្សាយថា លោក Nyantakyi ដែលជាអតីតសមាជិកក្រុមប្រឹក្សាទូទៅរបស់សហព័ន្ធកីឡាបាល់ទាត់អន្តរជាតិផងនោះ ត្រូវបានរកឃើញថាបានទទួលប្រាក់សំណូកចំនួន ៦៥០០០ដុល្លារអាមេរិក ពីសំណាក់អ្នកជំនួញម្នាក់ជុំវិញការឧបត្ថម្ភក្នុងលីគកីឡាបាល់ទាត់ហ្គាណា ដែលថតបានដោយអ្នកសារព័ត៌មានស៊ើបអង្កេតម្នាក់នៅក្នុងបន្ទប់សណ្ឋាគារមួយ។

ប្រធាន FIFA លោក Gianni Infantino និងអតីតប្រធាន GFA លោក Kwesi Nyantakyi

លោក Nyantakyi ដែលជាបុគ្គលដ៏មានអំណាចបំផុតម្នាក់ក្នុងវិស័យបាល់ទាត់នៅតំបន់អាហ្វ្រិក ក៏ត្រូវបាន FIFA ពិន័យជាប្រាក់ ៥០០,០០០ ហ្វ្រង់ស្វីស ប្រហែល ៤៩៧០០០ ដុល្លារអាមេរិកផងដែរ ជុំវិញការប្រព្រឹត្តិអំពើពុករលួយរបស់លោក។

បុរសសញ្ជាតិហ្គាណារូបនេះបានលាឈប់ពីតំណែងជាប្រធាន GFA កាលពីខែមិថុនាកន្លងទៅ បន្ទាប់ពីខ្សែភាពយន្តដែលនិយាយពីការទទួលយក «កាដូជាសាច់ប្រាក់» របស់លោកត្រូវបានផ្សព្វផ្សាយជាសាធារណៈ។

អ្នកសារព័ត៌មាន Anas Aremeyaw Anas និងអង្គភាពស៊ើបអង្កេតរបស់ BBC ប្រចាំតំបន់អាហ្វ្រិក បានកាត់យកចំនុចសំខាន់ពីខ្សែភាពយន្តនោះដែលនិយាយពីការប្រព្រឹត្តិអំពើពុករលួយក្នុងវិស័យកីឡាបាល់ទាត់នៅអាហ្វ្រិក៕