Cavani នាំមុខ Ronaldo និង Messi ដើម្បីឈ្នះពាន Golden Foot ឆ្នាំ២០១៨

កីឡាអន្តរជាតិ

អន្តរជាតិ

Cavani នាំមុខ Ronaldo និង Messi ដើម្បីឈ្នះពាន Golden Foot ឆ្នាំ២០១៨

31, Oct 2018 , 5:23 pm

រូបភាព

ដោយ: ទេព ពិទូរ្យ

Edinson Cavani ខ្សែប្រយុទ្ធក្រុម Paris Saint-Germain បាននាំមុនគូប្រជែង Cristiano Ronaldo និង Lionel Messi ដើម្បីឈ្នះពានរង្វាន់ Golden Foot ដែលធ្វើឡើងក្នុងប្រទេស Monaco នៅរាត្រីថ្ងៃទី ៣០ ខែតុលា។

ពានរង្វាន់ Golden Foot រៀបចំដោយ World Champions Club ដើម្បីផ្តល់ជូនដល់កីឡាកររូបណាដែលលេងបានល្អជាងគេប្រចាំឆ្នាំ ដែលមានអាយុចាប់ពី២៨ឆ្នាំឡើងទៅ ដោយផ្អែកលើការបោះឆ្នោតពីសំណាក់អ្នកសារព័ត៌មាន ប្រព័ន្ធផ្សព្វផ្សាយ និងសាធារណជន។

ខ្សែប្រយុទ្ធអន្តរជាតិអ៊ុយរូហ្គាយវ័យ ៣១ឆ្នាំនេះ បាននាំមុខពិន្ទុ Ronaldo ខ្សែប្រយុទ្ធក្រុម Juvenuts និង Messi កីឡាករឆ្នើមរបស់ Barcelona រួមទាំងមិត្តរួមជាតិរបស់គេ Luis Suarez ដើម្បីទទួលបានពាននេះ។ ពាន Golden Foot កីឡាករបាល់ទាត់ម្នាក់ឈ្នះបានតែ១លើកប៉ុណ្ណោះ។

Cavani បានប្រកបអាជីពជាកីឡាករបាល់ទាត់ដំបូងនៅក្នុងទឹកដីកំណើតរបស់ជាមួយក្លិប Danubio មុនពេលផ្លាស់ទៅអឺរ៉ុបជាមួយនឹងក្រុមនៅអ៊ីតាលី Palermo ក្នុងឆ្នាំ ២០០៧។

ចាប់តាំងពីរដូវកាល ២០០៨-០៩ រូបគេអាចស៊ុតបាល់បញ្ចូលទីដោយប្រើប្រាស់ទាំងជើងស្តាំ និងឆ្វេងនៅគ្រប់រដូវកាលអំឡុងពេលលេងឲ្យ Palermo, Napoli និងក្រុមម្ចាស់ជើងឯក Ligue 1 របស់បារាំង PSG ផងដែរ។

សម្រាប់ក្រុមជម្រើសជាតិវិញ Cavani រកគ្រាប់បាល់បាន ៤៦គ្រាប់ហើយក្នុងការបង្ហាញខ្លួន ១០៦ប្រកួត និងជួយអ៊ុយរូហ្គាយឈ្នះជើងឯក Copa America ក្នុងឆ្នាំ ២០១១ទៀតផង៕