អន្តរជាតិ
អាមេរិក៖ «ស្ត្រីមូស្លីមពីររូប»នឹងឈានឈ្នះឆ្នោតជាតំណាងរាស្ត្រអាមេរិកដំបូងក្នុងប្រវត្តិសាស្ត្រ លោកស្រី Ilhan Omar បេក្ខជនតំណាងរាស្ត្របក្សប្រជាធិបតេយ្យនៅរដ្ឋមីនីសូតា
× អ្នកនយោបាយជាស្ត្រីមូស្លីមពីររូបនឹងឈានឆ្ពោះទៅការផ្តល់សេចក្តីទុកចិត្តឲ្យធ្វើជាសមាជិកសភាតំណាងរាស្ត្រ (House of Representatives) លើកដំបូងបំផុតនៅក្នុងការបោះឆ្នោតពាក់កណ្តាលអាណត្តិ (Midterm Election) ថ្ងៃ ៦ខែវិច្ឆិកានេះ។ វាក្លាយជារឿងប្រវត្តិសាស្ត្រមួយ ហើយសភាអាមេរិកនឹងឈានទៅមានតំណាងរាស្ត្រមូស្លីមសរុបបីនាក់ដែរ។
ស្ត្រីទាំងពីររូបនោះសុទ្ធតែជាបេក្ខជនតំណាងបក្សប្រជាធិបតេយ្យ ហើយអ្នកទាំងពីរមានឈ្មោះបោះសំឡេងខ្លាំងក្នុងមណ្ឌលដែលខ្លួនឈរឈ្មោះដែរ។ ការប្រកួតប្រជែងតំណាងតំណាងរាស្ត្ររបស់អ្នកនយោបាយទាំងពីរក៏កើតឡើង ស្របពេលដែលនិន្នការប្រឆាំងមូស្លីមកើនឡើងនៅសហរដ្ឋអាមេរិកក្រោមអាណត្តិលោក ដូណាល់ ត្រាំ ដែរ។
បើតាមការចុះផ្សាយរបស់ទីភ្នាក់ងារព័ត៌មាន AFP ស្ត្រីទីមួយគឺលោកស្រី Ilhan Omar ដែលជាជនភៀសខ្លួនជនជាតិសូម៉ាលី។ ត្រូវបានគេស្នើតែតាំងជាបេក្ខជនតំណាងរាស្ត្រប្រចាំរដ្ឋមីនីសូតាដែលសម្បូរអ្នកគាំទ្របក្សប្រជាធិបតេយ្យ ភាគរយខ្ពស់ណាស់ដែលលោកស្រីនឹងត្រូវគេបោះឆ្នោតជ្រើសរើសនៅថ្ងៃ ៦ ខែវិច្ឆិកាខាងមុខឲ្យធ្វើជាតំណាងរាស្ត្រ។
លោកស្រី Omar ដែលបានរត់ភៀសខ្លួនពីប្រទេសកំណើតពេលមានសង្គ្រាមស៊ីវិលក្នុងពេលខ្លួនមានអាយុប្រាំបីឆ្នាំនោះ មានប្រជាប្រិយភាពដោយសារខ្លួនជាអ្នកមាននិន្នការនយោបាយជឿនលឿនដែលគាំទ្រការអប់រំថ្នាក់សាកលវិទ្យាល័យ និងផ្តល់លំនៅដ្ឋានមិនគិតថៃ្ល និងកែទម្រង់ប្រព័ន្ធយុត្តិធ៌ជាដើម។ ម្យ៉ាងទៀត លោកស្រីក៏នឹងក្លាយជាតំណាងរាស្ត្រជនជាតិអាមេរិកដើមកំណើតសូម៉ាលីលើកដំបូងបំផុតក្នុងប្រវត្តិសាស្ត្រ។
ចំណែកបេក្ខជនម្នាក់ទៀតគឺ លោកស្រី Rashida Tlaib។ មានឪពុកម្តាយជាជនអន្តោប្រវេសន៍ប៉ាឡេស្ទីន និងកើតនៅក្រុង Detroit លោកស្រីបានធ្វើកិច្ចការងារសង្គមយ៉ាងកម្មម្នាក់ និងធ្លាប់ធ្វើរដ្ឋអាជ្ញាផង។ នៅឆ្នាំ ២០០៨ លោកស្រីក្លាយជាស្ត្រីមូស្លីមដំបូងគេបង្អស់ដែលជាប់ឆ្នោតជាសមាជិកសភាប្រចាំរដ្ឋ Michigan ដែរ ហើយបច្ចុប្បន្ន លោកស្រីឈរឈ្មោះជាសមាជិកសភាសហព័ន្ធតំណាងរដ្ឋ Michigan ហើយការឈ្មោះលើកនេះគ្មានបេក្ខជនប្រកួតប្រជែងជាមួយឡើយ។ ក្រោយការបោះឆ្នោតសប្តាហ៍ក្រោយ លោកស្រីនឹងជំនួសលោក John Conyers តំណាងរាស្ត្របក្សប្រជាធិបតេយ្យដែលបានចុះចេញពីតំណែងដោយសារពាក់ព័ន្ធរឿងអាស្រូវផ្លូវភេទ។
ត្រឡប់មកវិញ អ្នកទាំងពីរនឹងក្លាយជាស្ត្រីមូស្លីមដំបូងបំផុតដែលនឹងបំពេញការងារជាសមាជិកសភាអាមេរិកនោះ ហើយចំនួនតំណាងរាស្ត្រមូស្លីមនៅក្នុងសភាអាមេរិកនឹងកើនឡើងដល់ បីរូបនៅពេលខាងមុខ។ សមាជិកភាបក្សប្រជាធិបតេយ្យលោក Andre Carson ប្រចាំរដ្ឋ Indiana និង ជាប្រជាជនមូស្លីមដែលនោះ នឹងអាចមានលទ្ធភាពខ្ពស់ក្នុងការទទួលបានការបោះឆ្នោតឲ្យបន្តកាន់តំណែងជាថ្មីទៀតដែរ។
តាមពិតទៅតំណាងរាស្ត្រស្ត្រីទាំងពីរខាងលើ មានគោលជំហរប្រឆាំងនឹងគោលនយោបាយប្រធានាធិបតី ត្រាំ និងបក្សសាធារណរដ្ឋដែលរឹតត្បិតលើជនអន្តោប្រវេសន៍ជាពិសេសដាក់គោលដៅលើប្រជាជនមូស្លីម ក៏ដូចជាគោលនយោបាយសុខភិបាលដែលមិនសមប្រកប។ គួរបញ្ជាក់បន្តិចដែរថា ស្ថិតក្រោមអាណត្តិលោក ត្រាំ វាមានការកើនឡើងនៃនិន្នាការស្អប់ និងរើសអើងប្រជាជនមូស្លីមនៅក្នុងសង្គមអាមេរិកខ្លាំងផងដែរ៕
Tag:
អាមេរិក
មូស្លីម
បោះឆ្នោតសភា
© រក្សាសិទ្ធិដោយ thmeythmey.com