លោកស្រី ស្មីត សុំឲ្យរដ្ឋមន្ត្រីដែនដី ជួយចុះបញ្ជីដីធ្លីជូនពលរដ្ឋនៅទូទាំងប្រទេស

ជាតិ

នយោបាយជាតិ

លោកស្រី ស្មីត សុំឲ្យរដ្ឋមន្ត្រីដែនដី ជួយចុះបញ្ជីដីធ្លីជូនពលរដ្ឋនៅទូទាំងប្រទេស

01, Nov 2018 , 10:15 am

រូបភាព

លោក ជា សុផារ៉ា ទទួលស្វាគមន៍ចំពោះលោកស្រី ស្មីត នៅទីស្តីការក្រសួងដែនដី។ រូបពីក្រសួងដែនដី

ដោយ: ថ្មីៗ

ភ្នំពេញ៖ មកដល់កម្ពុជា លោកស្រី រ៉ូណា ស្មីត អ្នករាយការណ៍ពិសេសផ្នែកសិទ្ធិមនុស្សនៃអង្គការសហប្រជាជាតិ បានសុំជួបលោក ជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម និង សំណង់ មុនគេ ដើម្បីពិភាក្សាពីបញ្ហាដីធ្លីនៅកម្ពុជា។

ក្រោយចប់កិច្ចប្រជុំ ក្រសួងដែនដី បានចេញសេចក្តីប្រកាសព័ត៌មានស្តីពីកិច្ចប្រជុំនេះ។ សេចក្តីប្រកាសព័ត៌មាន បានបញ្ជាក់ថា លោកស្រី រ៉ូណា ស្មីត បានគាំទ្រចំពោះវិស័យដីធ្លីនិងសំណង់ រួមទាំងកម្មវិធីសម្បទានដីសង្គមកិច្ចនិងលំនៅដ្ឋាន។

នៅចំពោះមុខលោក ជា សុផារ៉ា លោកស្រី រ៉ូណា ស្មីត បានស្នើឲ្យមានការចុះបញ្ជីដីធ្លីសហគមន៍ជនជាតិដើមភាគតិច ដើម្បីបញ្ឆៀសការចូលទន្ទ្រានកាន់កាប់ ពីបុគ្គលឬក្រុមណាមួយ។ នេះបើតាមសេចក្តីប្រកាសព័ត៌មានដដែល ដោយបានសរសេរទៀតថា លោកស្រី ក៏ជំរុញឲ្យមានការចុះបញ្ជីដីធ្លីនៅទូទាំងប្រទេសផងដែរ ដែលជាបញ្ហាស្នូលអំពីសិទ្ធិមនុស្ស ដោយការប្រើប្រាស់ដីជាមូលដ្ឋានសម្រាប់គោលដៅអភិវឌ្ឍប្រកបដោយចីរភាព លុបបំបាត់ភាពក្រីក្រ និងធានាសន្តិសុខស្បៀង។

លោក ជា សុផារ៉ា បានបង្ហោះសារលើទំព័រហ្វេសប៊ុករបស់លោកថា៖«លោកស្រី រ៉ូណា ស្មីត សម្តែងការគាំទ្រនិងវាយតម្លៃខ្ពស់ចំពោះសមិទ្ធផល ដែលរដ្ឋាភិបាលកម្ពុជា សម្រេចបាន ជាពិសេសក្នុងវិស័យដីធ្លីនិងលំដ្ឋានមានតម្លៃសមរម្យ»។

«លោកស្រី រ៉ូណា ស្មីត បានបង្ហាញពីការប្តេជ្ញាចិត្តរបស់លោករដ្ឋមន្ត្រី ក្នុងការធានាសុវត្ថិភាពដីធ្លី និងសិទ្ធិកាន់កាប់ដីធ្លីរបស់ប្រជាពលរដ្ឋ ដើម្បីលុបបំបាត់ភាពក្រីក្រ»។ នេះជាសំណេរដែលបង្ហោះទំព័រហ្វេសប៊ុករបស់ការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិប្រចាំកម្ពុជា (United Nations Human Rights in Cambodia)។

តាមកម្មវិធីដែលគ្រោងទុក អ្នករាយការណ៍ពិសេសរូបនះ ត្រូវជួបមន្ត្រីរដ្ឋាភិបាលនិងមន្ត្រីសង្គមស៊ីវិលផ្សេងៗទៀត។ ដំណើរទស្សនកិច្ចរបស់លោកស្រី នៅកម្ពុជាលើកទី៥នេះ នឹងត្រូវបញ្ចប់នៅថ្ងៃទី១១ ខែវិច្ឆិកា ឆ្នាំ២០១៨។

ក្នុងដំណើរទស្សនកិច្ចលើកនេះ លោកស្រី នៅតែសុំជួបលោក កឹម សុខា អតីតប្រធានគណបក្សប្រឆាំង។ ប៉ុន្តែ សំណើររបស់លោកស្រី ត្រូវបានច្រានចោល ដូចកាលពីលោកស្រី ស្នើសុំ ពេលមកបំពេញទស្សនកិច្ចលើកទី៤ ក្នុងឆ្នាំ២០១៧ដែរ៕