ជាតិ
បុណ្យអុំទូក
បេក្ខជន៤រូប ទទួលបានជ័យលាភី នៃការប្រកួតរចនាខ្លោងរបារសម្រាប់ពិធីបុណ្យអុំទូកឆ្នាំ២០១៨ រូបបានពីហ្វេសប៊ុក រដ្ឋបាលរាជធានីភ្នំពេញ (១)
× ភ្នំពេញ៖ លោកប៊ិន សុបញ្ញា លោកឆៀង នឿន លោកខន រតថៃ និងលោក ហេង ភីរុន ជាបេក្ខជនទាំង៤រូបទទួលបានជ័យលាភី នៃការប្រកួតរចនាខ្លោងរបារកាត់ទទឹងផ្លូវ ដើម្បីអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០១៨។
យោងតាមគណនីហ្វេសប៊ុក របស់រដ្ឋបាលរាជធានីភ្នំពេញ កាលពីថ្ងៃទី៣០តុលា លោក ប៊ិន សុបញ្ញា ទទួលបានជ័យលាភីលេខ១។ ស្នាដៃរបស់ លោក ទទួលបានការគាំទ្រចំនួន៦,៦០០Like នឹងត្រូវរដ្ឋបាលរាជធានីដាក់ដំឡើងនៅលើមហាវិថីនរោត្តមចំណុចវិមានឯករាជ្យ។
ស្នាដៃរបស់លោក ឆៀង នឿន ទទួលបានជ័យលាភីលេខ២ មានការគាំទ្រចំនួន ២៦០០Like នឹងត្រូវដាក់ដំឡើងនៅលើវិថីព្រះស៊ីសុវត្ថិចំណុចរូបសំណាក់តេជោមាសតេជោយ៉ត។ ខ្លោងរបារ ដែលរដ្ឋបាលរាជធានីភ្នំពេញ ត្រូវដាក់ដំឡើងនៅមហាវិថីព្រះសីហនុចំណុចខាងលិចរង្វង់មូលសម្តេចជួនណាត ជាស្នាដៃរបស់ លោក ខន រតថៃ ទទួលបានការគាំទ្រចំនួន ១.៨០០Like។
ដោយឡែក ស្នាដៃរបស់លោក ហេង ភីរុន នឹងត្រូវដាក់ដំឡើងនៅរមណីយដ្ឋានប្រវត្តិសាស្ត្រវត្តភ្នំចំណុចមុខនាឡិកា។ ស្នាដៃនេះទទួលបានការគាំទ្រចំនួន ១.២០០Like ជាជ័យលាភីលេខ៤។
ស្នាដៃរបស់បេក្ខជនទាំង៤នេះ បានធ្វើឡើងបន្ទាប់ពីគណៈកម្មការវាយតម្លៃជ្រើសរើសរូបភាពចំនួន ៥រូបភាព ដើម្បីធ្វើប្រជាមតិរយៈពេល៣ថ្ងៃ នៅក្នុងPageរដ្ឋបាលរាជធានីភ្នំពេញ កន្លងទៅ។
សូមបញ្ជាក់ថា ការរចនាខ្លោងរបារកាត់ទទឹងផ្លូវនេះ ផ្ដោតលើសោភណភាពស្រស់ស្អាត រួមទាំងការបង្កប់ទៅដោយរចនាប័ទ្មខ្មែរ។ បន្ថែមលើនេះ ខ្លឹមសារអក្សរ នៅលើខ្លោងរបារគឺ អបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅថ្ងៃទី២១ ២២ និង២៣ ខែវិច្ឆិកា ឆ្នាំ២០១៨៕
Tag:
អុំទូក
ជ័យលាភី
ប្រកួត
© រក្សាសិទ្ធិដោយ thmeythmey.com