អន្តរជាតិ
ក្នុងថ្ងៃរៀបការ ព្រះនាង Ayako ស្លៀករ៉ូបដែលផលិតចេញពីសូត្រខ្មែរ Ayako ស្លៀករ៉ូបដែលផលិតចេញពីសូត្រខ្មែរនាថ្ងៃអាពាហ៍ពិពាហ៍ជាមួយលោក Kei Moriya។ រូបថត AFP
× ព្រះនាង Ayako បានរៀបអាពាហ៍ពិពាហ៍ជាផ្លូវការជាមួយលោក Kei Moriya នៅសណ្ឋាគារមួយក្នុងក្រុងតូក្យូ កាលពីថ្ងៃទី៣០ ខែតុលា កន្លងទៅនេះ។ ការសម្រេចចិត្តរៀបការជាមួយបុរសសាមញ្ញ បានធ្វើឲ្យចៅស្រីព្រះអធិរាជជប៉ុន រូបនេះ លែងជាសមាជិករាជវង្ស និងត្រូវបានប្តូរថាជាអ្នកស្រី Ayako Moriya។
Ayako ជាបុត្រីទីបីរបស់ព្រះអង្គម្ចាស់ Takamado ដែលបានសុគតក្នុងព្រះជន្ម៤៧ព្រះវស្សាកាលពីឆ្នាំ២០០២ ។ ព្រះអង្គ Takamado ជាប្អូនជីដូនមួយរបស់ព្រះចៅអធិរាជជប៉ុន Akihito។ Ayoko អាយុ២៨ឆ្នាំ បានសម្រេចចិត្តលាចេញពីគ្រួសាររាជវង្ស ដើម្បីរស់នៅជាមួយបុរសជាទីស្រឡាញ់របស់ខ្លួន គឺលោក Kei Moriya អាយុ៣២ឆ្នាំដែលបម្រើការឲ្យក្រុមហ៊ុនដឹកទំនិញមួយ។
ប្រភពរូបថត៖ AFP
នៅក្នុងពិធិអាពាហ៍ពិពាហ៍របស់ខ្លួន អតីតព្រះនាង Ayako ដែលក្លាយជាអ្នកស្រី Moriya បានស្លៀករ៉ូបពណ៌ផ្កាឈូក និងដណ្តប់អាវស្បៃពីលើ។ យោងតាមការផ្សាយរបស់ The Asahi Shimbun ដោយផ្អែកតាមប្រភពផ្សេងៗ រ៉ូបដ៏ស្រស់ស្អាតនោះ ផលិតចេញពីសរសៃសូត្រនៅកម្ពុជា។
អ្នកស្រី Kimie ម្តាយរបស់លោក Moriya ជាម្ចាស់ដើមនៃសំពត់សូត្រនោះ ដោយកាលពីឆ្នាំ២០១៤ ក្នុងនាមជានាយិកាប្រតិបត្តិនៃអង្គការកុមារគ្មានព្រំដែន (Kokkyo Naki Kodomotachi) អ្នកស្រី Kimie បានប្រគល់ដល់គ្រួសារព្រះអង្គម្ចាស់ Takamado ជាកាដូអនុស្សាវរីយ៍។
ប្រភពរូបថត៖ AFP
ពិធីជប់លៀងអាពាហ៍ពិពាហ៍ដែលប្រព្រឹត្តទៅនៅសណ្ឋាគារ Hotel New Otani មានភ្ញៀវចូលរួមប្រមាណ៧០នាក់ ដែលក្នុងនោះមានសមាជិករាជវង្សានុវង្ស អ្នកនយោបាយ រួមទាំងលោកនាយករដ្ឋមន្ត្រី Shinzo Abe ផងដែរ។
តាមពិតទៅ Ayako និង Moriya ស្គាល់គ្នា ដោយសារតែមានការណែនាំផ្ទាល់ពីព្រះនាង Hisako ដែលជាមាតារបស់ Ayako។ ព្រះនាង Hisako និងអ្នកស្រី Kimie គឺជាមិត្តភក្តិជិតស្និទ្ធនឹងគ្នា៕
© រក្សាសិទ្ធិដោយ thmeythmey.com